ஊரடங்கை மீறி சரக்கு விமானத்தில் பறந்தாரா பிரசாந்த் கிஷோர்?

புதுடில்லி:
ஊரடங்கை மீறி திமுக தலைவர் ஸ்டாலின் மற்றும் மேற்குவங்க
முதல்வர் மம்தா பானர்ஜியின் அரசியல் ஆலோசகர்
பிரசாந்த் கிஷோர், டில்லியில் இருந்து கோல்கட்டாவுக்கு சரக்கு விமானம்
மூலம் ரகசியமாக சென்றதாக செய்திகள் வெளியான நிலையில், அதனை
மறுத்துள்ளார்.

கொரோனா வைரஸ் பரவல் காரணமாக நாடு முழுவதும் ஊரடங்கு
அமலில் உள்ள நிலையில், வைரஸ் தொற்றை எதிர்கொள்ளும் விவகாரத்தில்
மேற்குவங்க முதல்வர் மம்தா பானர்ஜிக்கும், மத்திய அரசுக்கும் இடையே
மோதல் போக்கு ஏற்பட்டுள்ளது.

இதனை தீர்த்துவைக்க அரசியல் சாணக்கியர் பிரசாந்த் கிஷோர், சரக்கு
விமானம் மூலமாக டில்லியிலிருந்து கோல்கட்டா சென்றதாக செய்திகள்
வெளியாகின. இதனை பிரசாந்த் கிஷோர் மறுத்த நிலையில், மத்திய விமானப்
போக்குவரத்து அமைச்சகம் விசாரணை நடத்த முடிவு செய்துளளதாக தகவல்
வெளியாகியுள்ளன.

இதற்காக டில்லி, கோல்கட்டா, கவுகாத்தி ஆகிய மூன்று விமான நிலையங்களில்
72 மணிநேர சிசிடிவி காட்சிகளை சோதிப்பதற்காக மத்திய அரசு
கோரியுள்ளததாக, ஏஎன்ஐ செய்தி நிறுவனம் தெரிவித்துள்ளது. மேலும்,
ஏர் இந்தியா, ஸ்பைஸ்ஜெட் மற்றும் புளூடார்ட் சார்பில் கடந்த 3 நாட்களில்
டில்லியிலிருந்து கோல்கட்டாவுக்கு மொத்தம் 9 சரக்கு விமானங்கள்
இயக்கப்பட்டதாகவும் கூறப்பட்டுள்ளது.

இது குறித்து பிரசாந்த் கிஷோர் கூறியதாவது:

நான் விமானப்பயணம் செய்தது உண்மையெனில், அதற்குரிய ஆவணங்களை
வெளியிட வேண்டும். விமானம் எங்கிருந்து புறப்பட்டது, எங்கு சென்றது உள்ளிட்ட
விபரங்களை தெரிவிக்க வேண்டும். விமான செயல்பாடுகள், மத்திய அரசின்
விமான இயக்குனரகத்தின் அனுமதியுடன் இயக்கப்பட்டு வருகிறது.

இதனால் என்மீது குற்றம் சுமத்தியவர்களுக்கு அதுகுறித்த தகவல்களை பெற
எந்தவொரு கஷ்டமும் இருக்காது. என்மீதான குற்றம் நிரூபிக்கப்பட்டால், மன்னிப்பு
கேட்க தயார். அதேபோல் அவர்களும் மன்னிப்பு கேட்பார்களா?.
இவ்வாறு அவர் கூறியுள்ளார்.
-
---------------------------
தினமலர்