குழந்தையின் முத்தம் ... அப்பாவின் நேசம்... -கவிதைகள்

**ayyasamy ram** · **ayyasamy ram** Sat Apr 18, 2020 5:49 pm

-
உமா மகேஸ்வரி:

ஆண்டாண்டு காலமாக அளவு மாறாதது
தோசைகளின் விட்டம்.
விளிம்பு தாண்டாதது அவற்றின் வட்டம்.
வடிவம் மாறாதது தோசைகள்
வாழும் வாழ்தலற்று
அம்மாவின் பாட்டியின்
பாட்டியின் அம்மாவின்
இன்னும் என்னுடைய தோசைகள்
ஆண்டாடு காலமாய் அப்படியே'
--------------------

- 'வெறும்பொழுது' தொகுப்பிலிருந்து.

**ayyasamy ram** · **ayyasamy ram** Sat Apr 18, 2020 5:50 pm

அ.வெண்ணிலா:

எதிர் இருக்கை கம்பி பிடித்து
இருக்கையின் நுனியிலேயே
அமர்ந்திருக்கிறாய்
புடவை நுனி
உரசி விடாதிருக்கப் பிரயத்தனப்பட்டு
முது சாய்க்காமல் இருக்கிறாய்
இயல்பாய் இருப்பதாய்க் காட்டிக் கொள்ள
முகம் பார்த்துப் பேச முயற்சிக்கிறாய்...
உன் கூச்சத்தில் சிக்கி
மூச்சுவிட முடியாமல்
சிரமப்படுகிறது நம் நட்பு.
இயல்பின்றி நிற்கும் நம்மைப்
பார்த்துச் சிரிக்கவோ என்னவோ
இடையில் உட்கார்ந்திருந்தது - உன்
தோழி என்ற வார்த்தை...
---------------------------------

- 'நீரிலலையும் முகம்' தொகுப்பிலிருந்து.

**ayyasamy ram** · **ayyasamy ram** Sat Apr 18, 2020 5:50 pm

தமிழச்சி தங்கப்பாண்டியன்

எப்பொழுதும் போலவே
இந்தக் கோடையிலும்
எனக்காகக் காத்திருக்கும்
எல்லாமும் இருக்கின்றன
என் பிறந்த ஊரில்...
ஒரு மாலை நேரத்து மாரடைப்பில்
பாராமல் எனைப் பிரிந்த
என் அப்பாவைத் தவிர...
----------------------------

- 'எஞ்சோட்டுப் பெண்' தொகுப்பிலிருந்து.

**ayyasamy ram** · **ayyasamy ram** Sat Apr 18, 2020 5:51 pm

சந்திரா:

குழந்தை

பொம்மைகளை விற்க
பொம்மைக்காரன் குட்டிக்கரணம் அடிக்கிறான்
பொம்மைகளை விடுத்து
பொம்மைக்காரனே வேண்டுமென்று கேட்கிறது குழந்தை.

#=====================

வாராதவர்களுக்கான மழை

வாராதவர்களுக்கான காத்திருப்பில்
கடைசியாக மழை வந்தது
வழிந்த கண்ணீரை அழித்து தூய்மைபடுத்தியது.
இனி வருபவர்கள்
மழையோடு போகட்டும்
நான் மழையில் வளர்ந்த
அன்பின் செடியைப் பூக்க வைப்பேன்
அது என்னை அடர்ந்த காட்டுக்குள் அழைத்துச் செல்லும்
வழியெங்கும் நினைவின் மழையின்
பசுமை துளிர்க்க துளிர்க்க
காட்டின் பாடலைப் பாடிச் செல்வேன்
நிலம் சிலிர்க்கும்
ஆகாயம் நட்சத்திரங்களை உதிர்க்கும்
என்னுடன் நானிருப்பேன் எப்போதும்...
==============

- 'வழி தவறியது ஆட்டுக்குட்டியல்ல கடவுள்' தொகுப்பிலிருந்து.

**ayyasamy ram** · **ayyasamy ram** Sat Apr 18, 2020 5:52 pm

மனுஷி:

மழைக்குழந்தை

வெளியில் கிளம்பும்போது
காலைக் கட்டிக்கொண்டு அடம்பிடிக்கும்
சிறு குழந்தையைப் போல
வெளியில் செல்ல விடாமல்
கொட்டித் தீர்க்கிறது மழை
வேறு வழியே இல்லை
நனைவதைத் தவிர

#==========================

கடைசி நம்பிக்கை

உடைந்துபோன கண்ணாடித் தொட்டி நான்.
உடைந்த சில்லுகளை எடுத்து வைத்து
உருக்கொடுக்கிறாய்.
என் கடைசி நம்பிக்கை
நீ.
=========================

- 'முத்தங்களின் கடவுள்' தொகுப்பிலிருந்து.

**ayyasamy ram** · **ayyasamy ram** Sat Apr 18, 2020 5:53 pm

கனிமொழி.ஜி:

எங்கெங்கும் குழந்தைகள்

நீல நிறத்தில் டோரிமான் ஸ்டிக்கர் கேட்டு வாங்கி,
விரல்களால் வருடும் தருணம்
சட்டென முகத்தில் ஒளியேற்றிக் கொண்டவன்...
நெருங்கத் தொடுத்து அன்போடு கொடுத்த
வெளிர்பூச்சரத்தை வாங்குபோது
அந்நிறத்தை பிரதிபலிப்பவள்...
பணம் செலுத்தி பருத்த பைகளை
தளர்வாய் வாங்கித் திரும்ப,
அழைத்துத் தந்த எளிய அன்பளிப்பில்
பெருத்த மலர்ச்சி காட்டுபவள்...
தலை கவிழ்ந்து நடந்த
எல்லாரும் தாத்தாவென அழைக்கும் தன்னை
தன் பெயர் கொண்டு விளிக்கும் பின்புற குரலை
திரும்பி சட்டென பற்றிக்கொள்பவர் என....

எங்கெங்கும் குழந்தைகள்.
============================

- 'மழை நடந்தோடிய நெகிழ் நிலம்' தொகுப்பிலிருந்து.

நன்றி- வி.எஸ்.சரவணன்
விகடன்