முதல் வணக்கம் எங்கள் முருகனுக்கே! இன்று பங்குனி உத்திரம்

ஏப் 06, 2020
பங்குனி உத்திர நாளான இன்று இந்த வழிபாட்டை படித்தால்
முருகனருளால் வாழ்வு வளம் பெறும்.

* குன்று தோறும் குடிகொண்ட முருகனே! சிவனின் நெற்றிக் கண்ணில்
அவதரித்த சிவபாலனே! வடிவேலனே! கார்த்திகைப் பெண்களின்
அரவணைப்பில் வளர்ந்த கார்த்திகேயனே!

அகத்தியருக்கு உபதேசித்த குருநாதனே! உன் திருவடியைத் தஞ்சம்
என வந்து விட்டோம்.

* ஆறுபடை வீட்டில் அமர்ந்திருக்கும் அண்ணலே! திருத்தணியில்
வாழும் தணிகாசலனே! பழநி தண்டாயுதபாணியே!
தமிழில் வைதாரையும் வாழ வைக்கும் கருணைக் கடலே!
சிக்கல் சிங்கார வேலவனே! மயில் வாகனனே! சேவல் கொடி ஏந்தியவனே!
உன் சன்னிதியில் அடைக்கலம் புகுந்து விட்டோம். நீயே அருள்புரிய வேண்டும்.

* சூரனை அழித்து தேவர்களைக் காத்தவனே! தேவசேனாபதியே!
தெய்வானை மணவாளனே! அருணகிரிநாதருக்கு அருள்புரிந்தவனே!
ஆறுமுகனே! பன்னிரு கைகளால் வாரி வழங்கும் வள்ளல் பெருமானே!
திருமாலின் மருமகனே! ஆனைமுகனின் தம்பியே! குழந்தை தெய்வமே!
எங்களுக்கு வாழ்வில் ஆரோக்கியம், செல்வ வளத்தையும் தந்தருள்வாயாக.

* பார்வதி பெற்ற பாலகனே! கந்தனே! கடம்பனே! கதிர்வேலவனே!
சிவசுப்பிரமணியனே! செந்துார் முருகனே! குறிஞ்சி ஆண்டவனே!
அவ்வைக்கு கனி கொடுத்தவனே! மயிலேறிய மாணிக்கமே!
முத்துக்குமரனே! சுவாமிநாதனே! சரவணபவனே! சண்முகனே!
தாயினும் சிறந்த தயாபரனே! வாழ்வில் குறுக்கிடும் துன்பங்களைப்
போக்கி வெற்றி தருவாயாக.

* வேதம் போற்றும் வித்தகனே! குகனே! வள்ளி மணவாளனே!
பக்தர்கள் உள்ளத்தில் வாழ்பவனே! காங்கேயனே! கண்கண்ட தெய்வமே!
கலியுக வரதனே! திருப்புகழ் நாயகனே! தமிழ்க்கடவுளே!
வாழ்வில் எல்லா வளமும் பெற்று, இன்பமுடன் வாழ வரம் தருவாயாக.

இந்த நாள் நல்ல நாள்

சிறப்பு மிக்க உத்திர நன்னாளில் நடந்தவை

* இமவானின் மகள் பார்வதியை சிவன் மணந்த நாள்
* மதுரை மீனாட்சி சுந்தரேஸ்வரர் திருமணம்
* சக்கரவர்த்தி திருமகன் ராமர் சீதையை மணந்தார்
* பரதன், லட்சுமணன், சத்ருகனன் திருமணம்
* இடும்பன் மூலம் காவடி துாக்கும் பழக்கம் ஆரம்பம்
* திருப்பரங்குன்றம் முருகன் தெய்வானை திருமணம்
* ஸ்ரீவில்லிபுத்துார் ஆண்டாள் - ரங்கமன்னார் திருமணம்
* தர்மசாஸ்தாவான சபரிமலை ஐயப்பன் அவதரித்தநாள்
* சிவனின் தவம் கலைக்க முயன்ற மன்மதனை எரித்தல்
* ரதியின் வேண்டுகோளால் மன்மதனை சிவன் உயிர்பித்தல்
* மார்க்கண்டேயனுக்காக சிவன் காலனை தன் காலால் உதைத்தல்
* பஞ்ச பாண்டவர்களி்ல் ஒருவரான அர்ஜூனன் பிறந்தார்

'48' ரகசியம்!

48 ஆண்டுகள் தொடர்ந்து பங்குனி உத்திர விரதம் மேற்கொண்டால்,
அடுத்த பிறவி தெய்வப்பிறவியாக அமையும்.

ஜனன, மரண சக்கரத்தில் இருந்து விடுபட்டு உயிர் மோட்சம் பெறும்.
உத்திர நட்சத்திரத்திற்குரிய கிரகமான சூரியன், பங்குனி மாதத்தில்
உக்கிரம் அடைவார். சந்திரன் பலம் பெற்று கன்னி ராசியிலும்,
சூரியன் மீன ராசியிலும் இருப்பர்.

இருவரும் இந்நாளில் ஒருவரை ஒருவர் ஏழாம் பார்வையால்
பார்த்துக் கொள்வர். எனவே, இந்நாளில் விரதமிருப்போருக்கு உடல்,
மனதால் செய்த பாவம் நீங்கும். உடல் நலம், நீண்ட வாழ்நாள்,
மனதைரியம் கிடைக்கும்.

மணவாழ்வு தரும் மாவிளக்கு

பங்குனி உத்திரத்தன்று திருச்செந்துார் சுப்பிரமணிய சுவாமி
கோயிலில் வள்ளி திருமணம் நடக்கும். இதற்காக அதிகாலையில்
பள்ளியறையிலிருந்து முருகன் கருவறைக்கு சென்றதும்
அபிஷேகம் நடக்கும். தீபாராதனை முடிந்ததும் பெரிய
பூஞ்சப்பரத்தில் மேலக்கோயில் சென்று தவத்தில் ஆழ்ந்திருப்பார்.

மாலை நான்கு மணிக்கு தங்க மயில் வாகனத்தில் எழுந்தருளும்
முருகன் மேலக்கோயில் முன்புறம் உள்ள பந்தல் மண்டபத்திற்கு
வருவார்.

அப்போது வள்ளி மணமகள் கோலத்தில் எழுந்தருளியதும்,
மாலை மாற்றும் வைபவம் நிகழும். வள்ளி தேனும்,
தினைமாவும் வழங்கியதை நினைவூட்டும் விதமாக, வள்ளிக்கு
தினை மாவிளக்கு ஏற்றுவர். வள்ளி கல்யாணத்தை தரிசித்து
மாவிளக்கு ஏற்றினால் திருமணத்தடை நீங்கும்.

தினமலர்