நான் மலையாள பெண் எனக்கு தமிழில் 'சாகித்ய' விருது!

-
மலையாளத்திலிருந்து தமிழில் மொழிபெயர்த்ததற்காக,
'சாகித்ய அகாடமி' விருது பெற்றுள்ள, கே.வி.ஜெயஸ்ரீ:

கேரளா தான் என் பூர்வீகம். அப்பாவும், அம்மாவும்
பாலக்காடைச் சேர்ந்தவர்கள். கல்யாணம் முடிந்த
கையோடு, தமிழகம் வந்து விட்டனர்.

திருவண்ணாமலையில் தான், நானும், என் சகோதரியும்
பிறந்தோம். அப்பா சிறு வயதிலேயே தவறி விட்டதால்,
எங்கள் தாய் மாமன் வீட்டில், கூட்டுக் குடும்பமாகத் தான்
வாழ்ந்து வந்தோம்.

துவக்கத்தில் வீட்டில், மலையாளம் தான் பேச்சு மொழியாக
இருந்தது. பள்ளி செல்ல துவங்கிய பின், தமிழை பேசவும்,
எழுதவும் கற்றுக் கொண்டேன்.

இப்போது நான், என் கணவர், தங்கை, தங்கை கணவர்
என, எங்கள் குடும்பமே, தமிழ் எழுத்தாளர்கள் நிரம்பிய
குடும்பமாக மாறி விட்டது.

என் மகள் சுகனாவும், மொழிபெயர்ப்பாளர் தான்;
மூன்று புத்தகங்களை அவர் மொழிபெயர்த்துள்ளார்.
ஜாதி, மதம், மொழி என அனைத்தையும் கடந்து,
எழுத்தின் மீதும், இலக்கியத்தின் மீதும் கொண்டிருந்த
பேரார்வமே என்னையும், என் கணவர்
உத்திரகுமாரனையும் இணைத்தது. அவரும்,
இலக்கியத்தின் மீது பேரார்வம் கொண்டவர்;
மொழிபெயர்ப்பு பணிகளையும் செய்து வருகிறார்.

என் உடன்பிறந்த சகோதரி, கே.வி.ஷைலஜாவும்
மொழிபெயர்ப்பாளர் தான்; பதிப்பாளராகவும்
உள்ளார்.

என் சகோதரியின் கணவர் தான், எழுத்தாளர்
பவா செல்லத்துரை,வீட்டில், மலையாளத்தில்
எழுதவும், படிக்கவும் அம்மா கற்றுக் கொடுத்தார்.
பதிலுக்கு, பள்ளியில் நான் படித்த தமிழை,
அம்மாவுக்கு கற்றுக் கொடுத்தேன்.

நாளடைவில், தமிழை பிழையின்றி எழுதவும்,
பேசவும் அம்மாவுக்கு முடிந்தது. இதனால், அம்மா
படிப்பதற்காக, பிறர் வீடுகளில் இருந்து, தமிழ்
புத்தகங்களை வாங்கி வந்து, அம்மாவிடம்
கொடுப்பேன்.

அப்படி, அம்மா படித்ததை, மலையாளத்தில்
கதையாகச் சொல்வார். அம்மாவின் கதை சொல்லும்
திறனால், வாசிப்பு பழக்கம் எங்களுக்கும் ஏற்பட்டது.
கல்லுாரியில் சேர்ந்த பிறகு, தமிழ் இலக்கியங்கள்
மீது ஆர்வம் ஏற்பட்டு, ஜெயகாந்தன், பிரபஞ்சன்,
கி.ராஜநாராயணன், அம்பை, சுந்தரராமசாமி என,
எங்கள் வாசிப்பு நகர்ந்தது.

அதன் பின், முற்போக்கு எழுத்தாளர் சங்கத்தின்
தொடர்பு கிடைத்தது. ஆண், பெண் பேதமற்ற
வாழ்க்கை முறையை தெரிந்து கொண்டதும், அந்த
சங்கத்தில் தான். தமிழ், மலையாளம் என இரு
மொழிகளும் தெரிந்திருந்ததால், ஏதாவது உருப்படியாக
செய்யலாமே என்று எண்ணி, எனக்கு பிடித்த
மலையாள நுால்களை தமிழில் மொழிபெயர்த்தேன்.

'நிலம் பூத்து மலர்ந்த நாள்' என்ற நாவலை,
மலையாளத்திலிருந்து தமிழில் மொழிமாற்றம்
செய்ததற்காக, சாகித்ய அகாடமி விருது எனக்கு
கிடைத்தது.

அந்த நாவலை, தமிழ் வாசகர்கள் கொண்டாடி
மகிழ்ந்து விட்டனர்!
-
-----------------------
தினமலர்