சசிகலா பினாமி சொத்துகள் முடக்கம் ஆதாரம் உள்ளதாக வரித்துறை விளக்கம்

சென்னை:

சசிகலா, கிருஷ்ணப்ரியா வாக்குமூலத்தின்
அடிப்படையிலேயே, புதுச்சேரி நகைக் கடைக்கு
சொந்தமான சொத்துகள் முடக்கப்பட்டதாக,
சென்னை உயர் நீதிமன்றத்தில்,
வருமான வரித்துறை தெரிவித்துள்ளது.

புதுச்சேரியில், 'லட்சுமி ஜுவல்லர்ஸ்' என்ற பெயரில்
நகைக் கடை நடத்தும் நவீன்பாலாஜி உட்பட, ஐந்து பேர்,
சென்னை உயர் நீதிமன்றத்தில் தாக்கல் செய்த மனு:

நாங்கள் நடத்தி வந்த, 'ஓசன் ஸ்பிரே' என்ற கேளிக்கை
விடுதியை, 2016ல், விற்க முடிவு செய்தோம். சசிகலாவின்
பிரதிநிதிகள் இருவர், 168 கோடி ரூபாய்க்கு, அதை
வாங்குவதாக தெரிவித்தனர்.

அந்த சமயம், 500 - 1,000 ரூபாய், பண மதிப்பிழப்பு
நடவடிக்கை மேற்கொள்ளப்பட்டது.

2016, நவ., 22ல், சசிகலா தரப்பினர், திடீரென, 148 கோடி
ரூபாய்க்கு, 500 - 1,000 நோட்டுகளை கொடுத்து, அந்த
தொகையை மாற்றிக் கொள்ளுமாறு கூறினர்

.'மாற்ற முடியவில்லை எனில், திரும்ப பெற்றுக்
கொள்கிறோம்' எனக் கூறி, ஒப்பந்தத்தில் கையெழுத்தும்
பெற்றனர். அந்த ஒப்பந்தத்தை நகல் எடுக்கவும்,
எங்களை அனுமதிக்கவில்லை.

எங்கள் சொத்தை வாங்குபவர் யார் என்ற விபரமும்,
அதில் இல்லை.இதற்கு கமிஷனாக, 12 கோடி ரூபாயை
எடுத்துக் கொண்டனர். பின், சசிகலா சொத்துகள்
தொடர்பாக நடந்த வருமான வரி சோதனைக்கு பின்,
சசிகலா பினாமிகள் என அறிவித்து, எங்கள் சொத்துகளை,
ஜன., 20ல், வருமான வரித் துறை முடக்கி உள்ளது.

சசிகலா, அவரது உறவினர் கிருஷ்ணப்ரியா அளித்த
ஒப்புதல் வாக்குமூலத்தையும், வருமான வரித் துறை,
எங்களுக்கு தர மறுக்கிறது.

சசிகலா பினாமிகள் என அறிவித்து, எங்களது
சொத்துகளை முடக்கி, பிறப்பித்த உத்தரவை ரத்து
செய்ய வேண்டும்.இவ்வாறு, மனுவில் கூறப்பட்டுள்ளது.

இந்த வழக்கில், வருமான வரித் துறை பதில் அளிக்க,
உயர் நீதிமன்றம் உத்தரவிட்டிருந்தது.

இந்த வழக்கு, நீதிபதி அனிதா சுமந்த் முன், நேற்று
விசாரணைக்கு வந்தது.அப்போது, வருமான வரித் துறை
தரப்பில், 'கிருஷ்ணப்ரியா மற்றும் சசிகலாவிடம்
பெற்ற ஒப்புதல் வாக்குமூலம் அடிப்படையில்,
பினாமிகள் தடை சட்டத்தின் கீழ், மனுதாரர்களின்
சொத்துகள் முடக்கப்பட்டு உள்ளன;
அதற்கான ஆதாரங்கள் உள்ளன. எனவே, இந்த வழக்கை
தள்ளுபடி செய்ய வேண்டும்' என, வாதிடப்பட்டது.

இதையடுத்து, மார்ச், 18ம் தேதிக்கு, வழக்கை நீதிபதி
தள்ளிவைத்தார்.
-
-------------------------

தினமலர் ,