ரஜினியைப் போல சசிகலாவுக்கு விலக்கு அளிக்க முடியாது - வருமான வரித்துறை உயர் நீதிமன்றத்தில் தகவல்

நடிகர் ரஜினியை போன்று வருமான வரி தொகை செலுத்துவதில்
இருந்து சசிகலாவிற்கு விலக்கு அளிக்க முடியாது என்று சென்னை
உயர்நீதிமன்றத்தில் வருமானவரித்துறை தெரிவித்துள்ளது.

சசிகலா, கடந்த 1994-95ம் ஆண்டுக்கான வருமான வரி கணக்கு
தாக்கலில் 28 லட்சத்து 86 ஆயிரம் ரூபாய்க்கு கணக்கு தாக்கல்
செய்திருந்தார்.

அதைத்தொடர்ந்து நடைபெற்ற லஞ்ச ஒழிப்புத்துறை சோதனையில்
சசிகலா அதே நிதியாண்டில் 80 ஏக்கர் நிலத்தை வாங்கி கணக்கில்
காட்டாமல் மறைத்திருந்தது கண்டுபிடிக்கப்பட்டது

இதுதொடர்பாக லஞ்ச ஒழிப்புத்துறை அளித்த அறிக்கையின் அடிப்படையில்,
1994-95ம் ஆண்டுக்கான வருமான வரியாக 48 லட்சம் ரூபாய் செலுத்தும்படி
சசிகலாவிற்கு 2002ம் ஆண்டு வருமானவரித்துறை உத்தரவிட்டது.

ஆனால், இந்த உத்தரவை மேல்முறையீட்டு தீர்ப்பாயம் ரத்துசெய்தது.
இதனை எதிர்த்து சென்னை உயர்நீதிமன்றத்தில் வருமான வரித்துறை
சார்பில் வழக்கு தொடரப்பட்டது.

கடந்த 2008ம் ஆண்டு முதல் நிலுவையில் இருந்த இந்த வழக்கு, நீதிபதிகள்
வினீத் கோத்தாரி மற்றும் சுரேஷ் குமார் அடங்கிய அமர்வில் விசாரணைக்கு
வந்தது. அப்போது, ஒரு கோடி ரூபாய்க்கும் குறைவான தொகை என்பதால்
தனக்கு எதிரான வருமானவரித்துறை உத்தரவை ரத்து செய்ய வேண்டும்
என்று சசிகலா தரப்பில் வாதிடப்பட்டது.

இதற்கு வருமானவரித்துறை தரப்பில் ஆஜரான வழக்கறிஞர் செந்தில் குமார்,
ஒரு கோடி ரூபாய்க்கும் குறைவான அபராதம் தொடர்பான வழக்கை
கைவிடுவதாக மத்திய நேரடி வரிகள் வாரியத்தின் சுற்றறிக்கை சசிகலா
வழக்கிற்கு பொருந்தாது என்று கூறினார்.

மேலும், வருவாய் தணிக்கை பிரிவினர் ஆட்சேபனை தெரிவித்தாலோ
அல்லது ஒரு வழக்கில் நடவடிக்கை தொடங்கிவிட்டாலோ அந்த வழக்கை
கைவிட முடியாது என்றும் வாதிட்டார்.

இருதரப்பு வாதங்களை கேட்ட நீதிபதிகள், சசிகலா மீதான வழக்கு
விசாரணை எந்த நிலையில் உள்ளது என்பதை 2 வாரத்தில் அறிக்கையாக
சமர்ப்பிக்கும்படி வருமானவரித்துறைக்கு உத்தரவிட்டு வழக்கை
ஒத்திவைத்தனர்.

-நியூஸ் 18