கொரோனா: சீனாவில் பலி 213 ஆக உயர்வு

பீஜிங் :
வேகமாக பரவி வரும் கொரோனா வைரஸ் தாக்குதலில்,
சீனாவில் பலியானவர்களின் எண்ணிக்கை 213ஆக அதிகரித்துள்ளது.
மேலும் 9,692 பேருக்கு இந்த வைரஸ் பாதிப்பு இருப்பது உறுதி
செய்யப்பட்டுள்ளது.

சீனாவின் வுஹான் நகரில் முதலில் கண்டறியப்பட்ட கொரோனா
வைரஸ், பீஜிங், ஷாங்காய் போன்ற சீன நகரங்களில் மட்டுமின்றி
அமெரிக்கா, தென்கொரியா, இந்தோனேசியா உள்ளிட்ட நாடுகளிலும்
பரவி வருகிறது.

கடல் உணவு மற்றும் வனவிலங்கு சந்தையில் பாதிக்கப்பட்ட
விலங்குகளிடம் இருந்து தான் இந்த வைரஸ் பரவியதாக கூறப்படுகிறது.

அவசர நிலை பிரகடனம்:

சீனா தவிர்த்து 18 உலக நாடுகளில் 98 பேருக்கு கொரோனா வைரஸ்
பாதிப்பு உள்ளதாக தெரிவித்துள்ள உலக சுகாதார அமைப்பு,
சர்வதேச சுகாதார அவசர நிலையை பிரகனப்படுத்தி உள்ளது.

பலி அதிகரிப்பு:

இந்நிலையில் சீனாவில் கொரோனா வைரசிற்கு பலியானவர்களின்
எண்ணிக்கை 213ஆக அதிகரித்துள்ளது. பாதிக்கப்பட்டவர்களின்
எண்ணிக்கையும் 9,692 ஆக அதிகரித்துள்ளது. நேற்று ஒரே நாளில்
43 பேர் பலியாகி உள்ளனர். 1,982 பேர் புதிதாக வைரஸ் பாதிப்பு
ஆளாகி உள்ளதாக அந்நாட்டு அரசு அறிவித்துள்ளது.

வைரஸ் வேகமாக பரவி வருவதால், பலி எண்ணிக்கை மேலும்
உயரும் என அஞ்சப்படுகிறது.

எல்லைகள் மூடல்:

சீனாவில் 31 மாகாணங்களில் இந்த பாதிப்பு இருப்பதாக
கூறப்பட்டுள்ளது. அதில், வூபய் மாகாணம் கடுமையாக பாதிக்கப்பட்டு
உள்ளது. சீனாவில் இருந்து, மற்ற நாடுகளுக்கும் இந்த வைரஸ்
பாதிப்பு பரவி வருகிறது. அதையடுத்து, சீனாவுக்கான விமான
சேவையை நிறுத்துவதாக, பல விமான நிறுவனங்கள் அறிவித்துள்ளன.

அதேபோல், சீனாவில் படிக்கும் மாணவர்களை அழைத்துச் செல்லும்
முயற்சியிலும், பல நாடுகள் ஈடுபட்டுள்ளன. சீனாவுடன் எல்லையை
பகிர்ந்து கொள்ளும் பல நாடுகளும், எல்லையை மூடியுள்ளன;

கடும் கட்டுப்பாடுகளை விதித்துள்ளன. அந்த வரிசையில்,
ரஷ்யாவும் இணைந்துள்ளது.

தினமலர்