இஸ்ரேலில் சொட்டு தண்ணீர் வீணாகாது!

மத்திய தரைக்கடல் பகுதி, பாலைவன பூமியான,
இஸ்ரேல் நாட்டில் பின்பற்றப்படும் அதிநவீன விவசாய
முறைகள்; அந்த துறையில் இஸ்ரேல் படைத்து வரும்
சாதனை பற்றி, அந்நாட்டின் டெல் அவிவ் நகரில்
வசித்து வரும், சென்னை இன்ஜினியர் வினோத்குமார்:

இஸ்ரேலின் பெரும் பகுதி பாலைவனம் தான். எனினும்,
விவசாயத்தில் இங்குள்ள மக்கள் பசுமைப் புரட்சியை
மேற்கொள்கின்றனர். எதற்கும் உதவாது எனக் கருதப்படும்,
பாலைவனத்தின் மலட்டு மண்ணை மேம்படுத்தி, வளமான
நிலமாக மாற்றியுள்ளனர்.

கடந்த, 1960ம் ஆண்டுகளிலேயே, சொட்டு நீர் பாசனத்தை
அறிமுகம் செய்தவர்கள் இவர்கள். இப்போது, செயற்கைக்
கோள் வழிகாட்டுதல், 'ரோபோடிக்' தொழில்நுட்பம்,
நீர் மறுசுழற்சி என, நவீன வேளாண்மை யுக்திகளை இந்த
நாடு பின்பற்றுகிறது.

தண்ணீர் விரயத்தை தவிர்க்க, சொட்டு நீர் பாசனத்துடன்,
ஆளில்லா குட்டி விமானங்கள் மூலம் மருந்து தெளிப்பது,
நீர் தெளிப்பது என அசத்துகின்றனர்.

பயிர்களுக்கு தேவைப்படும் நீரை அறிய, 'தெர்மல் இமேஜிங்'
என்ற தொழில்நுட்பத்தை பின்பற்றி, தேவைப்படும்
நேரங்களில் மட்டும் நீர் பாய்ச்சுகின்றனர். அதுவும்,
ஒரு சொட்டுநீர் கூட, வீணாகாமல் பார்த்துக் கொள்கின்றனர்.

ரசாயன உரங்களை பயன்படுத்தாமல், பெரும்பாலும்,
இயற்கை சார்ந்த இடுபொருட்களை மட்டுமே பயன்
படுத்துவதால், இஸ்ரேல் பழங்கள், காய்கறிகளுக்கு உலக
அளவில் கிராக்கி உள்ளது.

பூச்சிகளை கட்டுப்படுத்த, ரசாயன பூச்சிக்கொல்லிகளை
பயன்படுத்தாமல், பூச்சிகளை வளர்த்தே பூச்சிகளை
கொல்கின்றனர்.இவர்களின் மொத்த விவசாய உற்பத்தியில்,
50 சதவீதத்திற்கும் அதிகமாக, பழங்கள் தான்
உற்பத்தியாகின்றன.

வண்ணமய வலை அமைப்பு, பசுமைக்குடில் அமைப்பு
போன்ற தொழில்நுட்பங்கள் மூலம், சூரிய ஒளியை
கட்டுப்படுத்துகின்றனர். மகரந்த சேர்க்கை முறையை,
இயற்கை வழியில் செய்வதால், மாசு இல்லா இயற்கை
உணவுப் பொருட்களை உற்பத்தி செய்கின்றனர்.

ஆண்களுக்கு நிகராக பெண்களும், விவசாயத்தில் ஆர்வமாக
ஈடுபடுகின்றனர். ஒரே இடத்தில், பல வகையான வேளாண்
பொருட்களை உற்பத்தி செய்வது இங்கு அதிகம்.

இதனால், குறுகிய இடத்தில், பல வகை பொருட்களை
உற்பத்தி செய்ய முடிகிறது. ஒரு நிலத்தில், ஒருவர் மட்டுமே
விவசாயம் செய்ய மாட்டார்;

10, 15 பேர் இணைந்து, குத்தகை அடிப்படையில், சுழற்சி
முறையில் விவசாயம் செய்வர்.இதனால், ஒரு நபர், பல
பண்ணைகளின் பங்குதாரராக இருப்பர். விதவிதமான
சாகுபடியில் ஈடுபடும் அத்தகையோர் சிந்தனையால்,
விவசாயம் அங்கு, மதிப்புமிகு தொழிலாக மாறியுள்ளது!

தினமலர்

Code:


ஆண்களுக்கு நிகராக பெண்களும், விவசாயத்தில் ஆர்வமாக
ஈடுபடுகின்றனர். ஒரே இடத்தில், பல வகையான வேளாண்
பொருட்களை உற்பத்தி செய்வது இங்கு அதிகம்.

இதனால், குறுகிய இடத்தில், பல வகை பொருட்களை
உற்பத்தி செய்ய முடிகிறது. ஒரு நிலத்தில், ஒருவர் மட்டுமே
விவசாயம் செய்ய மாட்டார்;

10, 15 பேர் இணைந்து, குத்தகை அடிப்படையில், சுழற்சி
முறையில் விவசாயம் செய்வர்.இதனால், ஒரு நபர், பல
பண்ணைகளின் பங்குதாரராக இருப்பர். விதவிதமான
சாகுபடியில் ஈடுபடும் அத்தகையோர் சிந்தனையால்,
விவசாயம் அங்கு, மதிப்புமிகு தொழிலாக மாறியுள்ளது!




இதை படிக்கும் போது ஆர்வம் பெருக்கெடுத்து ஓடுகிறது. இதைப் போல் நாமும் செய்ய மாட்டோமா என்று ?