சரியான எச்சரிக்கை

பஸ் நிலையத்தில் காத்திருந்தேன். கூட்டம் சற்று அதிகமாக இருந்தது.
அப்போது, மோட்டார் சைக்கிளில் வந்த இளைஞன், அங்கிருந்த மூதாட்டியிடம், 'ஏம்மா... இந்த வேகாத வெயில்ல பஸ்சுக்காக காத்து கெடக்கறீங்க... அப்படியே பஸ் வந்தாலும், உட்கார்ந்து போக இடம் கிடைக்காம நின்னுட்டே தான் பயணிக்கணும்... நீங்க எங்கே போகணும்ன்னு சொல்லுங்க, போற வழியில இறக்கி விடறேன்...' என்றான்.
இளைஞனின் மனிதநேயம் ஒருபுறம் மகிழ்ச்சியை கொடுத்தாலும், இன்னொரு புறம், நிறைய மூதாட்டியர் நிலையத்தில் காத்திருக்க, இவரை மட்டும் அழைப்பது ஏன் என, சிந்திக்க வைத்தது. பிறகு, எதேச்சையாக அவரின் கழுத்தை பார்த்தபோது, தங்க சங்கிலி, 'பளபள'வென மின்னுவது தெரிந்தது.
அதை பறிப்பதற்காக, அவன் திட்டமிடலாம் என்பதை யூகித்த நான், 'அவன், சந்தேகத்திற்குரியவன்..' என்பதை, கண்களாலேயே, மூதாட்டிக்கு சைகையில் எச்சரிக்கை செய்து, அவனுடன் செல்வதை தடுத்து நிறுத்தினேன்.
உடனே, சுதாரித்த மூதாட்டி, 'இல்ல தம்பி... எனக்கு, வண்டியில உட்கார்ந்து பழக்கமில்லை... குண்டும், குழியுமான சாலைகளில் வண்டி ஏறி இறங்கறப்ப, விழுந்தாலும் விழுந்துடுவேன்...' என, சமயோசிதமாக சொல்லி, அவனை அனுப்பி வைத்தார். என்னை தனியே அழைத்து, பாராட்டினார், மூதாட்டி.
பெரியோர்களே... இதுபோல, நைச்சியமாக பேசி, ஏமாற்றும் பேர்வழிகளை அடையாளம் கண்டு, உஷாராக இருங்கள்!
— கே. ஜெகதீசன், கோவை.

நன்றி தினமலர் வாரமலர்.

ரமணியன்

இப்படியான சம்பவங்கள் அடிக்கடி நடப்பதாக காவல்துறை எச்சரித்துள்ளது.சிலர் மாட்டிக் கொள்கிறார்கள்,சிலரால் சிலர் காப்பாற்றப்படுகிறார்கள்.

சென்னையில் தனியாக செல்லும் முதியவர்களிடம் தெரிந்த நபர் போல் பேசி, செல்ல வேண்டிய இடத்திற்கு அழைத்துச் சென்று உதவுவதாக நூதன முறையில் பணம் பறிக்கும் நபரை சிசிடிவி காட்சிகளை கொண்டு போலீசார் தேடி வருகின்றனர். 
சென்னை கீழ்ப்பாக்கம் கார்டன் பகுதியைச் சேர்ந்தவர் 93 வயதான முதியவர் சதாசிவம். மீன்வளத் துறையில் அதிகாரியாக பணியாற்றி கடந்த 1980-ஆம் ஆண்டு ஓய்வு பெற்றவர்.
வெள்ளிக்கிழமை காலை வீட்டிற்கு அருகிலுள்ள இந்தியன் வங்கிக்கு தனது பென்ஷன் பணத்தை எடுப்பதற்காக சென்றார். அப்போது தலைகவசத்தை அணிந்து கொண்ட எதிரில் வந்த ஒருவர், சதாசிவத்தை ஏற்கனவே தெரிந்தவர் போல் நலம் விசாரித்தார். எங்கு செல்ல வேண்டும் என்று கேட்ட அந்த நபரிடம், அருகில் உள்ள வங்கிக்கு செல்வதாக கூறி சென்றார் சதாசிவம்.
வங்கிக்கு சென்று 20 ஆயிரம் ரூபாயை எடுத்து கொண்டு திரும்பிய போது, பின் தொடர்ந்து கவனித்த அந்த நபர், எதேச்சையாக எதிர்கொள்வது போல், முதியவரை சந்தித்தார். தனக்கு வந்த வேலை முடிந்துவிட்டது, வீட்டு வழியாக தான் செல்கிறேன், வண்டியில் அமருங்கள் தாத்தா என வாஞ்சையுடன் அழைத்தார்.
இதை நம்பி, தனது குடும்பத்தினருக்கு தெரிந்த நபராக இருக்கும் என நினைத்து அவருடன் சதாசிவம் சென்றார். வீட்டிற்கு அருகில் இறக்கிவிட்டு அந்த நபர் சென்ற பிறகு கைப்பை பார்த்த போது தான் 20 ஆயிரம் ரூபாயை அந்த நபர் திருடிச் சென்றது தெரியவந்தது.