வங்கி ஊழியர்கள் 5 நாட்கள் வேலை நிறுத்தம்

புதுடில்லி:
நிலுவை தொகையை வழங்க வலியுறுத்தி 5 நாட்கள்
வேலை நிறுத்தத்தில் ஈடுபட உள்ளதாக வங்கி ஊழியர்
சங்கங்கள் அறிவித்துள்ளன.

கடந்த 2017 நவ., 1முதல் வழங்க வேண்டிய நிலுவை
தொகைகளை விரைந்து வழங்க வலியுறுத்தி வரும்
ஜன.,31 பிப்.,1 மற்றும் மார்ச் 11, 12,13 ஆகிய தேதிகளில் வேலை
நிறுத்தத்தில் ஈடுபட உள்ளதாக வங்கி ஊழியர் சங்கங்களின்
கூட்டமைப்பு தெரிவித்துள்ளது.

தினமலர்

பட்ஜெட் கூட்டத்தொடர் தொடங்கும் நாளான ஜன. 31, பிப். 1ல்
வங்கிகள் ‘ஸ்டிரைக்’: ஒன்பது தொழிற்சங்கங்கள் கூட்டாக அறிவிப்பு
----------------------
புதுடெல்லி:
மத்திய பட்ஜெட் கூட்டத் தொடர் தொடங்கும் நாளான ஜன. 31ம் தேதி மற்றும் பிப். 1ம் தேதியில் ஒன்பது வங்கி ஊழியர் சங்கங்கள் நாடு தழுவிய வேலை நிறுத்த போராட்டத்தை அறிவித்துள்ளன.

இந்திய வங்கிகள் சங்கத்துடன் (ஐபிஏ) ஊதிய திருத்த பேச்சுவார்த்தைகள் தோல்வியடைந்ததால், வங்கி ஊழியர் சங்கங்கள் ஜன. 31ம் தேதி மற்றும் பிப். 1ம் தேதி ஆகிய இரண்டு நாட்கள் நாடு தழுவிய வங்கி வேலைநிறுத்தத்திற்கு அழைப்பு விடுத்துள்ளன.

இந்த மாதம், இது இரண்டாவது வங்கி வேலைநிறுத்தமாக இருக்கும். முதலாவதாக ஜன. 8ம் தேதி நாடு முழுவதும் வங்கிகள் வேலை நிறுத்தம் இருந்தது. வருகிற 31ம் தேதி மத்திய பட்ஜெட் தொடர்பாக பொருளாதார ஆய்வறிக்கை நாடாளுமன்றத்தில் மத்திய நிதியமைச்சர் நிர்மலா சீதாராமன் தாக்கல் செய்யவுள்ளார்.

அதை தொடர்ந்து அடுத்தநாள் பிப். 1ம் தேதி நிதியமைச்சர் நிர்மலா சீதாராமன் தனது இரண்டாவது பட்ஜெட்டை தாக்கல் செய்ய உள்ளார்.

பிப். 1ம் தேதி மாதத்தின் முதல் சனிக்கிழமை என்பதால், பட்ஜெட் நாளில், அனைத்து வணிக வங்கிகளும் திறந்திருக்க வேண்டும் என்பது விதிமுறை. பட்ஜெட் தாக்கல் ஆவதால் பங்குச் சந்தைகள் திறக்க முடிவு செய்துள்ளன.

முன்னதாக ஒன்பது தொழிற்சங்கங்களை பிரதிநிதித்துவப்படுத்தும் ஐக்கிய மன்றம் (யுஎஃப்யூ), ஐபிஏ-வுடன் இருதரப்பு பேச்சுவார்த்தைகளை நடத்தியது. இதில் ஊதியம் தொடர்பான கோரிக்கைகள் நிராகரிக்கப்பட்டன.

புதிய ஓய்வூதிய திட்டத்தை நீக்குதல், குடும்ப ஓய்வூதியத்தை மேம்படுத்துதல் மற்றும் அதிகாரிகளுக்கான தனித்துவமான வேலை நேரம் ஆகிய கோரிக்கைகள் புதியதாக முன்வைக்கப்பட்டன.இதுகுறித்து, யுஎஃப்யூவின் பொதுச் செயலாளர் டெபாசிஷ் பாசு சவுத்ரி கூறுகையில், “சங்க அங்கத்தினர்களிடையே ஐபிஏ பேச்சுவார்த்தை நடத்தியது.

ஆனால், கோரிக்கை நிறைவேற்றப்படவில்லை. அதனால், யுஎஃப்யூ கூட்டம் திட்டமிட்டபடி நடைபெற்றது. அப்போது மீண்டும் போராட்டங்கள் மற்றும் வேலைநிறுத்த நடவடிக்கைகளைத் தொடங்க முடிவுகள் எடுக்கப்பட்டன.

ஜன. 31 மற்றும் பிப். 1ம் தேதி வங்கிகள் வேலை நிறுத்த போராட்டம் நாடுதழுவிய அளவில் இருக்கும். தொடர்ந்து மார்ச் 11 - 13 வரை மூன்று நாள் வேலைநிறுத்தம் நடத்தப்படும்.

அதன்பிறகு சம்பள உயர்வு கோரிக்கைகள் நிறைவேற்றப்படாவிட்டால் ஏப். 1 முதல் காலவரையற்ற வேலைநிறுத்தம் நடைபெறும்’’ என்றார்.

தினகரன்