ராணுவ தளபதி கொல்லப்பட்ட விவகாரத்தில் அமெரிக்க ராணுவத்தை பயங்கரவாத இயக்கமாக அறிவித்த ஈரான்

டெஹ்ரான்,

அணுசக்தி ஒப்பந்தம் தொடர்பான விவகாரத்தில் அமெரிக்காவுக்கும், ஈரானுக்கும் இடையே மோதல் வெடித்தது. இந்த மோதல் காரணமாக ஈரானின் புரட்சிகர ராணுவ படையை பயங்கரவாத அமைப்பாக அமெரிக்கா அறிவித்தது.

இதற்கு பதிலடியாக அமெரிக்காவை பயங்கரவாத ஆதரவு நாடு என்றும் தங்கள் பிராந்தியத்துக்குள் இருக்கும் அமெரிக்க வீரர்களை பயங்கரவாதிகளாகவும் ஈரான் அறிவித்தது.

இது தொடர்பான மசோதா கடந்த ஆண்டு ஏப்ரல் மாதம் ஈரான் நாடாளுமன்றத்தில் தாக்கல் செய்யப்பட்டு ஒரு மனதாக நிறைவேற்றப்பட்டது. பின்னர் அது சட்டமானது.

இந்த சூழலில் கடந்த வெள்ளிக்கிழமை ஈராக்கில் அமெரிக்க ராணுவம் நடத்திய வான்தாக்குதலில் ஈரான் ராணுவ தளபதி காசிம் சுலைமானி கொல்லப்பட்டார். இதனால் இருநாடுகளுக்கும் இடையே போர் மூளும் அபாயம் ஏற்பட்டு உள்ளது.

இந்த நிலையில் சுலைமானி கொலைக்கு காரணமான அமெரிக்க ராணுவத்தை பயங்கரவாத இயக்கமாக ஈரான் அறிவித்துள்ளது.

அமெரிக்காவை பயங்கரவாத ஆதரவு நாடாக அறிவித்து கடந்த ஆண்டு ஏப்ரல் மாதம் கொண்டு வரப்பட்ட சட்டத்தில் திருத்தம் செய்து, நாடாளுமன்றத்தில் மசோதா தாக்கல் செய்யப்பட்டது.

இந்த மசோதா அமோக ஆதரவுடன் நிறைவேற்றப்பட்டது. அப்போது அவையில் இருந்த உறுப்பினர்கள் அனைவரும் “அமெரிக்கா ஒழிக” என முழுக்கமிட்டனர். சபாநாயகர் அலி லாரிஜானி, “டிரம்ப் அவர்களே கேளுங்கள், இதுதான் ஈரானின் குரல்” என்று தெரிவித்தார்.

அந்த மசோதாவில் அமெரிக்க படைகள், அதனை சார்ந்த அனைத்து அமைப்புகள், ஊழியர்கள், ஒப்பந்தக்காரர்கள் மற்றும் சுலைமானியை கொல்ல உத்தரவிட்டவர்கள் அனைவரும் பயங்கரவாதிகள் என குறிப்பிடப்பட்டுள்ளது.

மேலும் இவர்களுக்கு ராணுவம், நுண்ணறிவு, நிதி, தொழில்நுட்பம் உள்ளிட்ட வகைகளில் உதவி செய்வது பயங்கரவாதத்துக்கு துணைபோகும் செயலாகவே கருதப்படும் எனவும் அந்த மசோதாவில் தெரிவிக்கப்பட்டுள்ளது.

இதற்கிடையே ஈராக்கில் இருந்து அமெரிக்க படைகளை வெளியேற்ற அந்த நாட்டு நாடாளுமன்றத்தில் தீர்மானம் நிறைவேற்றப்பட்டுள்ள சூழலில், அமெரிக்க கடற்படையின் ஜெனரல் வில்லியம் ஹெச் சீலே எழுதிய கடிதத்தில், “ஈராக் நாடாளுமன்றம் நிறைவேற்றிய தீர்மானத்துக்கும், இறையாண்மைக்கும் மதிப்பளிக்கிறோம். எங்கள் படை விரைவில் புறப்படுவதற்கான ஏற்பாடுகளைத் தொடங்கும்” என தெரிவித்தார்.

ஆனால், இந்த கடிதம் வெளியான சில மணிநேரங்களில் அமெரிக்க ராணுவ மந்திரி மார்க் எஸ்பர் மறுப்பு அறிக்கை வெளியிட்டார். அதில், அவர் “ஈராக்கில் குவிக்கப்பட்டுள்ள அமெரிக்க ராணுவத்தினர் யாரும் வெளியேறுவது குறித்து எந்தவிதமான முடிவும் இன்னும் எடுக்கவில்லை” என தெரிவித்தார்.

மேலும் “அமெரிக்க படைகள் வெளியேறுவதற்காக தயாராகி வருகிறது என்ற செய்தி தவறானது. அங்கிருந்து வெளியேறுவது குறித்து அமெரிக்கா எந்த முடிவும் எடுக்கவில்லை, இதுவரை எந்தத் திட்டமிடலும் இல்லை” என அந்த அறிக்கையில் அவர் கூறியிருந்தார்.

இது குறித்து ஈராக்கில் இருக்கும் அமெரிக்க ராணுவ பிரிவின் தளபதி மார்க் மில்லே நிருபர்களிடம் கூறுகையில், “வில்லியம் சீலே எழுதிய கடிதத்தில் தவறுதலாகப் படைகளை வாபஸ் பெறுகிறோம் என்று குறிப்பிடப்பட்டுவிட்டது. அந்தக் கடிதத்தில் எந்த அதிகாரியும் கையொப்பம் இடவில்லை. அந்தக் கடிதத்தையும் யாரும் வெளியிட கூடாது” என தெரிவித்தார்.

தினத்தந்தி