மராட்டியத்தில் ரூ.10-க்கு சாப்பாடு வழங்கும் ‘சிவ்போஜன்’ திட்டம் 26-ந் தேதி தொடக்கம் - அரசின் முதன்மை செயலாளர் தகவல்

**ayyasamy ram** · **ayyasamy ram** Sun Jan 05, 2020 4:46 am

மும்பை,

தமிழ்நாட்டில் அம்மா உணவகத்தில் மலிவு விலையில் சாப்பாடு வழங்கப்பட்டு வருகிறது. அதேபோல மராட்டியத்திலும் பொது மக்களுக்கு ரூ.10-க்கு முழு சாப்பாடு வழங்கப்படும் என சட்டசபை தேர்தல் அறிக்கையில் சிவசேனா அறிவித்து இருந்தது. இந்தநிலையில் சிவசேனா தலைமையிலான அரசு கடந்த மாதம் 24-ந் தேதி 10 ரூபாய்க்கு சாப்பாடு வழங்கும் சிவ்போஜன் திட்டத்துக்கு ஒப்புதல் அளித்தது.

இந்த திட்டத்தின் கீழ் மாநிலம் முழுவதும் ரூ.10-க்கு 2 சப்பாத்தி, 150 கிராம் அரிசி சாதம், 100 கிராம் காய்கறி கூட்டு, 100 கிராம் பருப்பு குழம்பு வழங்கப்பட உள்ளது.

இந்தநிலையில் இந்த திட்டம் குறித்து உணவு பொருள் வழங்கல் துறையின் முதன்மை செயலாளர் மகேஷ் பாதக் கூறியதாவது:-

சிவ்போஜன் திட்டத்தை குடியரசு தினமான வருகிற 26-ந்தேதி தொடங்க திட்டமிட்டு உள்ளோம். முதல் கட்டமாக மாநிலம் முழுவதும் 15 இடங்களில் வெள்ளோட்ட அடிப்படையில் இந்த திட்டம் தொடங்கப்பட உள்ளது. அதன்பிறகு படிப்படியாக மாநிலம் முழுவதும் 36 மாவட்டங்களில் சிவ்போஜன் உணவகம் தொடங்கப்படும். உணவகம் அமைய உள்ள இடத்தை தாலுகா, மாவட்டம், மாநகராட்சி அளவில் நியமிக்கப்பட்டுள்ள கமிட்டி தேர்வு செய்யும்.

ரெயில்நிலையம், பஸ்நிலையம், அரசு ஆஸ்பத்திரி பகுதிகளில் சிவ்போஜன் உணவகம் அமைய அதிக வாய்ப்பு உள்ளது.

இவ்வாறு அவர் கூறினார்.

மேலும் சிவ்போஜன் திட்டம் குறித்து அரசு வெளியிட்டுள்ள அறிக்கையில் கூறப்பட்டு இருப்பதாவது:-

சிவ்போஜன் உணவகத்தில் மதியம் 12 மணி முதல் 2 மணி வரை சாப்பாடு வழங்கப்படும். இங்கு வழங்கப்படும் ஒரு சாப்பாடு சமைக்க அரசுக்கு நகர்பகுதியில் ரூ.50, புறநகர் பகுதியில் ரூ.35 செலவாகும். முதல் 3 மாதங்களுக்கு மட்டும் அரசுக்கு இந்த திட்டத்தை செயல்படுத்த ரூ.6 கோடியே 48 லட்சம் செலவாகும். 3 மாதங்களுக்கு பிறகு இந்த திட்டத்தை விரிவுப்படுத்துவது குறித்து முடிவு எடுக்கப்படும்.

இவ்வாறு அதில் கூறப்பட்டுள்ளது.

தினத்தந்தி

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக