விளையாட்டு மைதான குண்டு வெடிப்பு :பலியானோர் எண்ணிக்கை 95 ஆக உயர்வு

இஸ்லாமாபாத் : பாகிஸ்தானின் வடமேற்கு பகுதியில் அமைந்துள்ள விளையாட்டு மைதானத்தில், வெடிபொருட்கள் நிரப்பிய வாகனத்தை மோதி, வெடிக்கச் செய்த தற்கொலைப் படை தாக்குதலில், பலியானோர் எண்ணிக்கை நேற்று 95 ஆக உயர்ந்தது.

இதுகுறித்து, பாகிஸ்தான் அதிகாரிகள் தரப்பில் கூறியதாவது:பாகிஸ்தானில், ஷா ஹசன்கொல் பகுதியில் அமைந்துள்ள விளையாட்டு மைதானத்தில், உள்ளூரைச் சேர்ந்த இரண்டு அணியினர் கலந்து கொண்ட கைப்பந்து போட்டி நேற்று முன்தினம் நடைபெற்றது. இதை ஏராளமான மக்கள் பார்த்துக் கொண்டிருந்தனர்.அப்போது, 300 கிலோ வெடிபொருட்கள் நிரப்பப்பட்ட வாகனத்தை மைதானத்திற்குள் ஓட்டி வந்த ஒருவர், அதை வெடிக்கச் செய்தார். இந்த தற்கொலைப் படை தாக்குதலால், அருகில் இருந்த 20க்கும் மேற்பட்ட வீடுகள் இடிந்து விழுந்துள்ளன.போலீசார் மற்றும் அவசர சேவை பிரிவு அதிகாரிகள், இடிபாடுகளை அகற்றி, மீட்பு நடவடிக்கையில் ஈடுபட்டுள்ளனர்.

இச்சம்பவத்தில் பலியானோர் எண்ணிக்கை 95 ஆக அதிகரித்துள்ளது. நூற்றுக்கும் மேற்பட்டோர் காயமடைந்தனர்; சிலரின் நிலைமை மிகவும் மோசமாக உள்ளது. காயமடைந்தவர்கள், லக்கி மார்வாட், பன்னு மற்றும் பெஷாவரில் உள்ள மருத்துவமனைகளில் சேர்க்கப்பட்டுள்ளனர்.இவ்வாறு அவர்கள் கூறினர்.

குண்டு வெடிப்பு சம்பவத்தால்,வீடுகளை இழந்த பலரும், இரவு முழுவதும் கடுங்குளிரில் திறந்த வெளியில் தங்கினர். இச்சம்பவத்திற்கு இதுவரை, எந்த பயங்கரவாத இயக்கமும் பொறுப்பேற்கவில்லை. ஆனால், ஷா ஹசன்கெல் பகுதியில் இருந்து தலிபான்களை வெளியேற்றும், அரசின் முயற்சியை முறிடிக்கவும், அதற்குப் பழிக்கு பழிவாங்கவே இவ்வாறு செய்யப்பட்டுள்ளதாக போலீசார் கூறினர்.

இந்நிலையில், பாகிஸ்தானின் வடமேற்கில், பஜாவூர் பழங்குடியின பகுதியில் இருந்த இரண்டு பள்ளிகள் மற்றும் சுகாதார மையத்தை, பயங்கரவாதிகள் குண்டு வைத்து தகர்த்துள்ளதாக, அதிகாரிகள் தெரிவித்தனர். குண்டு வெடிப்பு நிகழ்ந்த போது, அப்பகுதிகளில் யாரும் இல்லாததால், உயிரிழப்பு ஏற்படவில்லை.பாகிஸ்தானில் நடந்த தற்கொலைப் படை தாக்குதலுக்கு அமெரிக்கா கடும் கண்டனம் தெரிவித்துள்ளது.

இதுகுறித்து அமெரிக்க வெளியுறவு அமைச்சர் ஹிலாரி கிளின்டன் வெளியிட்டுள்ள அறிக்கையில்,""பாகிஸ்தானில் நேற்று முன்தினம் நடந்த தற்கொலைப் படைத் தாக்குதலுக்கு, அமெரிக்கா கடும் கண்டனம் தெரிவிக்கிறது. பயங்கரவாதத்தை ஒழிக்கும், பாகிஸ்தான் மக்களின் முயற்சிக்கு, அமெரிக்கா தொடர்ந்து ஆதரவளிக்கும்,'' என தெரிவித்துள்ளார்