எப்ப கொடுத்தீங்க

சார் யாரு? அதிகமாப் பேசாமே உங்க கூட ரொம்ப அடக்கமா உக்கார்ந்திருக்கார்?

இவன் என் பக்கத்துக்கு வீட்டுக்காரன் சார். அதிகமாப் பேசிக்கிட்டிருந்தவன் தான்! தலையிலே அடிப்பட்டுப்போச்சி. அதுலேயிருந்து இப்படி பேசமாட்டேங்கறான்!

இதை லேசா விடப்புடாது! மூளையிலே காயம்பட்டிருக்கான்னு பார்க்கணும்! மூளையிலே காயம்பட்டா எப்படியெல்லாம் நினைவு பிசகிப் போவுதுங்கறதைப் பத்தி நிறைய ஆச்சரியமான ஆராய்ச்சிகள் எல்லாம் நடந்திருக்கு.

எப்படி?

மூளையிலே காயம்பட்டா சில பேருக்கு நிற வித்தியாசம் தெரியறதில்லை! சிலபேரு நேர்லே பார்க்கறப்போ ரெண்டு பொருளுக்கு இடையிலே வித்தியாசம் தெரியறதில்லை. ஆனா அந்தப் பொருளைப் பத்திக் கேட்டா வித்தியாசம் என்னங்கறதை சொல்லுவாங்களாம்.

அது எப்படி?

அதாவது இதுமாதிரி நோயாளிகிட்டே புலிக்கும், சிங்கத்துக்கும் வித்தியாசம் என்னுன்னு கேட்டா சொல்வார். ஆனா அவரை ஒரு மிருகக்காட்சி சாலைக்கு அழைச்சிட்டுப் போயி நேர்லே புலியையும் சிங்கத்தையும் காட்டி என்னன்னு கேட்டா அது ரெண்டுக்கும் உள்ள வித்தியாசத்தை அவராலே சொல்ல முடியாது.

ரொம்ப ஆச்சரியமா இருக்கே?

ஆமாம்! மூளையிலே காயம் படற நோயாளிகள் இப்படி யெல்லாம் ரொம்ப விசித்திரமான முறையிலே பாதிக்கப்படறாங்களாம்! சில பேரு உணவு வகைகள் பற்றின நினைவாற்றலையே இழந்துடறாங்க. உதாரணத்துக்கு அவங்ககிட்டே ஆரஞ்சு பழத்தையும், வாழைப் பழத்தையும் கொடுத்தா வித்தியாசம் தெரியாது!

எனக்குத் தெரிஞ்ச டாக்டர்கிட்டே இது மாதிரி ஒரு நோயாளி வந்தார். சிலை மாதிரி உட்கார்ந்துட்டார். அவரை டெஸ்ட் பண்றதுக்காக டாக்டர் முதல்லே ஓர் ஆரஞ்சுப் பழத்தைக் கொடுத்தார். அவரு பேசாமே அதை வாங்கிச்சாப்பிட்டார். அதுக்கப்புறம் ஒரு வாழைப்பழத்தைக் கொடுத்தார். அதையும் வாங்கிச் சாப்பிட்டார். அப்புறமா டாக்டர் அவரைப் பார்த்து, இப்ப ரெண்டு வித பழம் உங்களுக்குக் குடுத்தோமே அது என்னென்ன? சொல்லுங்க பார்க்கலாம்னார்!

சரி! இதுக்கு அந்த ஆள் என்ன சொன்னார்?

நீங்க எப்ப குடுத்தீங்க? ன்னு கேட்டார்!