சென்னையில் மூட்டை மூட்டையாக பணம் பறிமுதல்

**ayyasamy ram** · **ayyasamy ram** Sat Dec 14, 2019 7:41 am

சென்னை:
சென்னை கேகே நகரில் உள்ள இஎஸ்ஐ மருத்துவமனை வளாகத்தில்,
ரூ.27 லட்சம் மதிப்பிலான பண மூட்டைகளை போலீசார் பறிமுதல் செய்து,
வருமான வரித்துறை அதிகாரிகளிடம் ஒப்படைத்தனர்.

சென்னை கே.கே.நகர் இஎஸ்ஐ மருத்துவமனை வளாகத்தில், மர்மமான
முறையில் மூட்டைகள் வைக்கப்பட்டுள்ளதாக கேகேநகர் போலீசாருக்கு
தகவல் கிடைத்தது. இதனையடுத்து அங்கு வந்த போலீசார், அந்த
மூட்டைகளை எடுத்து சென்று விசாரணை நடத்தி வந்தனர்.

இந்நிலையில், திருவள்ளூரை சேர்ந்த அய்யப்பன் என்பவர், தான்
சென்னையில் வியாபாரிகளிடம் இருந்து ரூ.500 மற்றும் ரூ.2000
நோட்டுகளை வாங்கி சென்று, கேரளாவில் 10 ரூபாய் கட்டுகளாகவும்,
சில்லரையாக மாற்றி வரும் தொழில் செய்து வருவதாக தெரிவித்தார்.

மேலும் அவர், இன்று(டிச.,13) கேரளாவில் இருந்து தனியார் பஸ் மூலம்
ரூ.27 லட்சம் மதிப்பிலான ரூ.10 கட்டுகள், சில்லரைகள் அடங்கிய
மூட்டைகளுடன் வந்தேன்.

கேகே நகர் இறங்கிய தன்னை, அழைத்து செல்ல வேண்டிய கார்
வர தாமதமானதால், இஎஸ்ஐ மருத்துவமனை வளாகத்தில்
மூட்டைகளை வைத்துவிட்டு காத்திருந்தேன் எனக்கூறினார்.

இதையடுத்து, அந்த மூட்டைகளை போலீசார் ஆய்வு செய்தனர்.
அதில் ரூ.20 லட்சம் ரூபாய்க்கு ரூ.10 நோட்டுகளும், ரூ.7 லட்சத்திற்கு
சில்லரைகளும் இருந்தது தெரியவந்தது.

இருப்பினும், இந்த பணத்தை அவரிடம் கொடுக்க மறுத்த போலீசார்,
வருமான வரித்துறை அதிகாரிகளிடம் போலீசார் ஒப்படைத்தனர்.
உரிய ஆவணங்களை அளித்து பெற்றுக்கொள்ளும்படி, அய்யப்பனிடம்
போலீசார் அறிவுறுத்தினர்.

இந்த பணம் குறித்து வருமான வரித்துறை அதிகாரிகள் விசாரணை
நடத்தி வருகின்றனர்.

தினமலர்