மலேசியா செல்லும் அப்பாவி தமிழர்களுக்கு 'மொட்டை'

தமிழகத்தின் வறட்சி மாவட்டங்களான புதுக்கோட்டை, வேலூர், ராமநாதபுரம், சிவகங்கை, விருதுநகர், தூத்துக்குடி, நெல்லை மாவட்டங்களில் இருந்து வேலைவாய்ப்பு இன்றி, வெளிநாடுகளுக்கு வேலை தேடி செல்பவர் எண்ணிக்கை அதிகம். குறிப்பாக மலேசியாவுக்கு செல்வோர் எண்ணிக்கை அதிகம். ஆனால், அங்கு எதிர்பார்த்த சம்பளமின்றி கடினமான, ஆபத்தான, அசுத்தமான பணிகளில் ஈடுபடுத்தப்படுகின்றனர். அந்நிய நாடுகளில் கொத்தடிமைகளாக தவிக்கும் இவர்களின் நிலை பரிதாபம்.


சித்ரவதை அனுபவிப்பு:

மலேசியாவிலுள்ள தனியார் நிறுவனம் பல்வேறு வேலைக்கு ஆட்கள் தேவை என்ற சில ஆண்டுகளுக்கு முன் விளம்பரம் செய்தது. அதை நம்பி தென் மாவட்டங்களை சேர்ந்தவர்கள் விண்ணப்பித்தனர். 2005ம் ஆண்டு ஏஜன்ட்கள் தலா ரூ.1 முதல் 3 லட்சம் வரை வாங்கி கொண்டு 51 பேரை அனுப்பினர். குறிப்பிட்ட ஓரிடத்தில் தங்க வைக்கப்பட்ட அவர்கள், 16 மணி நேரம் வேலையில் ஈடுபடுத்தப்பட்டனர். சித்ரவதை அனுபவித்த 51 பேரும் சில மாதங்களுக்கு முன், மலேசியாவிலுள்ள இந்திய தூதரக அலுவலகத்தில் முறையிட சென்ற போது, வெளிநாட்டு குடியுரிமை அலுவலர் களால் கைது செய்யப்பட்டனர். வழக்கமாக வேலைக்கு சென்றவுடன் தனியார் நிறுவன முதலாளிகள் தொழிலாளர்களிடமிருந்து பாஸ்போர்ட், விசா போன்றவைகளை வாங்கி வைத்து விடுவர். அவர்கள் வெளியில் செல்லும் போது கொடுக்க மாட்டார்கள். பாஸ்போர்ட், விசா போன்ற ஆவணங்கள் இன்றி வெளியில் செல்லும் தமிழர்களை விசாரணை ஏதுமின்றி மலேசியா போலீசார் கைது செய்து விடுவர்.


சிறையில் மொட்டை:

மேலும் சிறையில் அடைக்கும் முன் தலையை மொட்டையடித்து விடுவர். புதுக்கோட்டையில் இருந்து, எட்டு பெண்கள் வீட்டு வேலை என்ற பெயரில் அழைத்து செல்லப்பட்டு விபச்சாரத்தில் ஈடுபடுத்தப்பட்டனர். இவர்கள் அனைவரும் சமூக சேவகர் கமலநாதன் என்பவர் மூலம் சிறையில் இருந்து மீட்கப்பட்டு தமிழகத்திற்கு அனுப்பி வைக்கப்பட்டனர். போலி ஏஜன்ட்டுகளை நம்பி கந்து வட்டிக்கு கடன் வாங்கி வெளிநாட்டு கனவுகளுடன் செல்லும் தமிழர்களுக்கு ஏமாற்றமே காத்திருக்கிறது. குறிப்பிட்ட சில நிறுவனங்களுக்கு செல்வோர் மட்டும் இதிலிருந்து தப்பிக்கின்றனர். மலேசியாவில் மட்டும் இருபது லட்சம் தமிழர்கள் உள்ளனர். இவர்களில் முறைதவறி சென்று சிறையில் வாடும் அப்பாவிகளின் எண்ணிக்கை மட்டும் பல நூறை தாண்டும் என அங்குள்ள சமூக சேவர்கள் கூறுகின்றனர்.


தூதரகத்தில் தமிழர்கள் இல்லை:

மலேசியாவில் மூன்று தலைமுறைகளாக வசிக்கும் சமூக சேவகர் கமலநாதன் மற்றும் தனியார் தொண்டு நிறுவன நிர்வாகி சிவசோமசுந்தரம் சமீபத்தில் இந்தியா வந்திருந்தனர். அவர்கள் கூறியதாவது: வெளிநாட்டு வேலை மோகத்தில் எதையும் விசாரிக்காமல் மலேசியா வந்து மாட்டி கொள்வதற்கு பதிலாக, வேலை தேடி வருவோர் தீர விசாரித்து அங்கீகாரம் பெற்ற தனியார் நிறுவனங்களில், முறையாக அனுமதி பெற்று வர வேண்டும். ஏஜன்டுகளில் போலி வாக்குறுதிகளை கேட்டு பணத்தை செலுத்தாமல், அவர்களை பற்றி விசாரிக்க வேண்டும். 20 லட்சம் தமிழர்கள் வசிக்கும் மலேசிய இந்திய தூதரகத்தில் ஒரு அதிகாரி கூட தமிழர் இல்லை. வடமாநிலங்களை சேர்ந்தவர்கள் மட்டுமே 50 ஆண்டுகளாக பணியில் உள்ளனர். அங்கு தமிழர்களை அதிகாரிகளாக நியமித்து, முறைதவறி சென்று மாட்டி கொண்டு தவிக்கும் தமிழர்கள் கொடுக்கும் புகார்களை முறையாக விசாரித்து, அவர்களை மீட்க வழிமுறைகளை காண வேண்டும். இந்திய அரசும், இதற்கென தனி துறையை ஏற்படுத்தி, இத்தகைய பிரச்னைகளுக்கு தீர்வு காண வேண்டும்.

முறை தவறி வந்த தமிழர்கள் உதவிக்கு 016 974 4404 என்ற போனில் தொடர்பு கொள்ளலாம். இவ்வாறு கூறினர்.

அப்ப அண்ணா உங்க மொட்டைக்கு பின்னாடி என்ன கதை இருக்கு........

என் மொட்டைக்குப் பின்னால் சொட்டை இருக்கிறது!!!

இல்ல நீங்களும் இது மாதிரி ஏதாவது பிரச்சனைல மாட்டிக்கிட்டீங்களோன்னு தான் கேட்டேன்...

அதுக்காக உண்மைய இப்படி சபைல போட்டு உடைச்சு இருக்க வேணாம்னு நினைக்கிறேன்......

மதிப்புக்குரிய சிவா அவர்களே
வணக்கம்
வேதனை அளிக்கும் விடயம். தமிழனுக்குச் சொந்த நாட்டிலும் வேறு எந்த நாட்டிலும் அவமானம் தான். நெஞ்சு கொதிக்கிறது
வேதனையுடன்
நந்திதா