சிலம்ப விளையாட்டில் கலக்கல்; 5 வயது சிறுமி அபார சாதனை

ஓசூர் : சூளகிரி அருகே, சிலம்ப போட்டிகளில் சாதனை படைத்து வரும் மாணவி, 'பிரேவோ இன்டர்நேஷனல் புக் ஆப் வேர்ல்டு ரெக்கார்டில்' இடம் பெற்றுள்ளார்.

கிருஷ்ணகிரி மாவட்டம், சூளகிரி அடுத்த சப்படியில் வசித்து வருபவர்கள் பவித்ராமன் - அனிதா தம்பதி. சூளகிரியில், 'இந்தியன் கிங் ஸ்போர்ட்ஸ் அகாடமி' என்ற பெயரில், மாணவ - மாணவியருக்கு, குங்பூ, சிலம்பம் மற்றும் வில்வித்தை பயிற்சிகளை, பவித்ராமன் வழங்கி வருகிறார். இவருக்கு, ஸ்வேதாஸ்ரீ, 5, மற்றும் 3, வயதில் ஒரு மகள் உள்ளனர். ஸ்வேதா ஸ்ரீ, சூளகிரியில் உள்ள தனியார் பள்ளி யில், யு.கே.ஜி., படித்துவருகிறார்.

எட்டு மாதங்களாக, தந்தையிடம் சிலம்ப பயிற்சி பெற்று வரும் ஸ்வேதாஸ்ரீ, மாநில, மாவட்ட, தேசிய, சர்வதேச அளவில் நடந்த போட்டிகளில் முதலிடம் பெற்று, பல்வேறு பதக்கங்களை பெற்று உள்ளார்.கிருஷ்ணகிரியில் நடந்த மாவட்ட சிலம்ப போட்டி, ஈரோட்டில், உலக சிலம்ப விளையாட்டு சங்கம் நடத்திய மாநில அளவிலான போட்டி, கோவாவில், யூத் ஓவர் ஆல் கேம்ஸ் அசோசியேஷன் நடத்திய, தேசிய அளவிலான போட்டி, சேலத்தில் நடந்த சர்வதேச அளவிலான சிலம்ப போட்டி ஆகியவற்றில், மாணவி ஸ்வேதாஸ்ரீ முதலிடம் பெற்று உள்ளார்.

இதனால், சிலம்பத்தில் இளம் வயது சாதனையாளருக்கான அங்கீகாரம் அவருக்கு கிடைத்துள்ளது. அது மட்டுமின்றி, 'பிரேவோ இன்டர்நேஷனல் புக் ஆப் வேர்ல்டு ரெக்கார்ட்' புத்தகத்தில், மாணவி ஸ்வேதாஸ்ரீ இடம் பிடித்துள்ளார். இதற்கான ஆவணங்களை, கலெக்டர் பிரபாகர் மற்றும் சூளகிரி தாசில்தார் ரெஜினா ஆகியோரிடம் காண்பித்து, மாணவி வாழ்த்து பெற்றார்.

dinamalar