வெங்காய இறக்குமதிக்கான கட்டுப்பாடுகளை தளா்த்தியது மத்திய அரசு

கா்நாடக மாநிலம், சிக்கமகளூரில் கனமழையால் ஈரப்பதமான வெங்காயங்களை காய வைக்கும் தொழிலாளா்கள்.
உள்நாட்டுச் சந்தையில் வெங்காயத்தின் விநியோகத்தை மேம்படுத்தும் வகையில், வெளிநாடுகளில் இருந்து அதை இறக்குமதி செய்வதற்கான கட்டுப்பாடுகளை வரும் 30-ஆம் தேதி வரை மத்திய அரசு தளா்த்தியுள்ளது.

ஆப்கானிஸ்தான், எகிப்து, துருக்கி, ஈரான் ஆகிய நாடுகளில் இருந்து தனியாா் வா்த்தகா்கள் வெங்காயத்தை இறக்குமதி செய்ய அனுமதிப்பதென முடிவு செய்துள்ள மத்திய அரசு, இறக்குமதி வெங்காயத்துக்கு பூச்சிக் கொல்லி புகைமூட்டம் போடுவது உள்ளிட்ட நடவடிக்கைகள் மீதான கட்டுப்பாடுகளை தளா்த்தியுள்ளது.

இதுதொடா்பாக மத்திய வேளாண்துறை அமைச்சகம் புதன்கிழமை வெளியிட்ட அறிக்கையில் கூறப்பட்டுள்ளதாவது:

சந்தைகளில் வெங்காயத்தின் விலை கடுமையாக அதிகரித்துள்ள நிலையில், வெளிநாடுகளில் இருந்து வெங்காயத்தை இறக்குமதி செய்வதற்கான கட்டுப்பாடுகளை வரும் 30-ஆம் தேதி வரையில் தளா்த்திக் கொள்வதென முடிவு செய்யப்பட்டுள்ளது.

வெளிநாடுகளில் பூச்சிக் கொல்லி புகைமூட்டம் போடப்படாத வெங்காயத்தை இறக்குமதி செய்யும் வா்த்தகா்கள் இந்தியாவிலேயே, அங்கீகாரம் பெற்ற நிறுவனங்களிடம் அத்தகைய புகைமூட்டம் போட்டுக்கொள்ள அனுமதி அளிக்கப்படுகிறது.

அந்த நடவடிக்கைக்குப் பிறகு துறை சாா்ந்த அதிகாரிகள் அந்த வெங்காயத்தில் பூச்சிகளின் தாக்கமோ, நோய்த் தாக்கமோ இல்லாததை ஆய்வின் மூலம் உறுதி செய்த பிறகே அவை சந்தை விநியோகத்துக்கு அனுமதிக்கப்படும். இந்த கட்டுப்பாடு தளா்வுகளின் அடிப்படையில் இறக்குமதி செய்யப்படும் வெங்காயத்துக்கு 4 மடங்கு கூடுதல் ஆய்வுக் கட்டணம் விதிக்கப்படாது என்று அந்த அறிக்கையில் கூறப்பட்டுள்ளது.

தற்போதைய நிலையில், ஏற்றுமதி செய்யும் நாட்டில் வைத்தே பூச்சிக் கொல்லி புகைமூட்டம் போடப்பட்டு, அதற்காக அந்த நாட்டிடம் சான்று பெறப்பட்ட வெங்காயத்தை மட்டுமே இந்தியாவில் இறக்குமதி செய்ய அனுமதிக்கப்படுகிறது. இந்த விதிகளை மீறும் இறக்குமதியாளா்கள் அதிக அளவில் கட்டணம் செலுத்த வேண்டியிருக்கும்.

45 சதவீதம் அதிகரித்த விலை: இதனிடையே, உள்நாட்டுச் சந்தையில் வெங்காயத்தின் விலை கடந்த ஒரு வாரத்தில் 45 சதவீதம் அதிகரித்துள்ளது. சென்னையில் கிலோ வெங்காயம் ரூ.90 முதல் ரூ.100 வரை விற்பனையாகிறது. தில்லியில் ஒரு கிலோ வெங்காயம் ரூ.80-க்கு விற்பனையாகிறது.

‘மகாராஷ்டிரம், ராஜஸ்தான், கா்நாடகத்தில் விளைவிக்கப்பட்ட வெங்காயம் சந்தைக்கு வரத்தொடங்கியுள்ளதால், வரும் நாள்களில் அதன் விலை குறையலாம். பருவம் தவறி பெய்த மழை காரணமாக அந்த இடங்களில் இருந்து வெங்காயத்தை கொண்டுவருவது தாமதமானது’ என்று நுகா்வோா் விவகாரங்கள் துறை அமைச்சக மூத்த அதிகாரி தெரிவித்தாா்.

தினமணி