மீண்டும் போயஸ் தோட்டத்துக்கு தாவியது பா.ம.க

மீண்டும் போயஸ் தோட்டத்துக்கு தாவியது பா.ம.க., : எதிர்பார்த்தது போலவே அ.தி.மு.க.,வுடன் ஐக்கியம்

சென்னை: அனைவரும் எதிர்பார்த்தது போல, மீண்டும் அ.தி.மு.க.,வுடன் கூட்டணி அமைக்க பா.ம.க.,வின் பொதுக்குழுவில் முடிவெடுக்கப்பட்டது. இதனால், பரபரப்பு, உப்புச்சப்பு எதுவும் இல்லாமல் முடிந்தது பொதுக்குழுக் கூட்டம். வரும் லோக்சபா தேர்தலில் எந்தக் கட்சியுடன் கூட்டணி அமைப்பது என்பது குறித்து முடிவெடுக்கும் பா.ம.க., பொதுக்குழுக் கூட்டம், சென்னையை அடுத்த வானகரம் ஸ்ரீவாரு திருமண மண்டபத்தில் நடந்தது.


தைலாபுரம் தோட்டத்தில் நடப்பதாக அதிகாரப்பூர்வமாக அறிவிக்கப்பட்டிருந்த இந்தக் கூட்டம், சத்தமில்லாமல் அ.தி.மு.க., பொதுக்குழு கூட்டம் நடக்கும் மண்டபத்துக்கு மாற்றப்பட்டது. அப்போதே, பொதுக்குழுவின் முடிவு, அனைவருக்கும் தெரிந்துவிட்ட ரகசியமாகிவிட்டது.

கூட்டத்தில் பா.ம.க., நிறுவனர் ராமதாஸ், மத்திய அமைச்சர்கள் அன்புமணி, வேலு, பா.ம.க., தலைவர் மணி, வன்னியர் சங்கத் தலைவர் குரு மற்றும் அந்தக் கட்சியின் எம்.பி.,க்கள் - எம்.எல்.ஏ.,க்கள் பொதுக்குழு உறுப்பினர்கள் கலந்துகொண்டனர்.


பொதுக்குழு உறுப்பினர்களிடையே ஓட்டு சீட்டு அளிக்கப்பட்டு பார்வையாளர்கள் முன்னிலையில், "ஜனநாயக அடிப்படையில்' ஓட்டெடுப்பு நடத்தப்பட்டது. தலைமைத் தேர்தல் அதிகாரியாக பத்திரிகையாளர் ராயப்பன் செயல்பட்டார். தேர்தல் அதிகாரிகளாக வழக்கறிஞர் அனந்தநாராயணன், அன்னை தெரசா பல்கலை முன்னாள் துணைவேந்தர் ஜானகி, முன்னாள் துணை ஆட்சியர் சேஷாத்ரி செயல்பட்டனர்.


இதில், அ.தி.மு.க., அணிக்கு ஆதரவாக 2,453 ஓட்டுகளும், தி.மு.க.,விற்கு ஆதரவாக 117 ஓட்டுகளும், யாருக்கும் ஓட்டளிக்க விரும்பவில்லை என்று 10 பேரும் ஓட்டளித்தனர். வழக்கம் போல ஒரு செல்லாத ஓட்டும் பதிவானது.


பொதுக்குழுவில், அமைச்சர் அன்புமணி பேசும்போது, ""ராமதாஸ் கட்சியை துவங்கும்போது, நானோ, எனது குடும்பத்தினரோ பதவிக்கு வரமாட்டோம் என்றார். ஆனால், உங்களின் வற்புறுத்தலால் எனக்கு மந்திரி பதவி வழங்கப்பட்டது. எனக்கு கொடுத்த பணியை உலக நாடுகள் பாராட்டும் வகையில் செய்தேன். ""எனக்கு நல்ல ஒத்துழைப்பு கொடுத்த பிரதமர் மன்மோகன்சிங், சோனியா ஆகியோருக்கு நன்றி. தேர்தல் தொடர்பாகவும், கூட்டணி தொடர்பாகவும் ஊடகங்கள் பல்வேறு விதமான செய்திகளை வெளியிடுகின்றன. கொஞ்சம் மனசாட்சியுடன் செயல்படுங்கள்; உண்மையை எழுதுங்கள்,'' என உருக்கமாக வேண்டுகோள் விடுத்தார்.


தொடர்ந்து பா.ம.க., நிறுவனர் ராமதாஸ் பேசும்போது, ""இன்று பொதுக்குழு உறுப்பினர்கள் அனைவரும் சேர்ந்து, அ.தி.மு.க.,வுடன் கூட்டணி வைக்க வேண்டும் என்று ஆதரவு தெரிவித்திருக்கிறீர்கள். அதன்படி கூட்டணி அமைக்கப்படும். இந்தக் கூட்டணி வெற்றிக் கூட்டணியாக அமையும். நாங்கள் நாற்பது இடங்களிலும் வெற்றி பெறுவோம்,'' என ஆரூடம் கூறினார். அம்பத்தூர் சேர்மன் சேகர் நன்றி கூறினார்.

பொதுக்குழுவில், "அ.தி.மு.க.,வுடன் கூட்டணி அமைப்பது; இலங்கையில் உடனடியாக போர் நிறுத்தம் செய்து அரசியல் தீர்வு தர வேண்டும்; கச்சத்தீவை இலங்கை புனித பகுதியாக அறிவித்திருப்பதை ரத்து செய்து, அதை இந்தியாவுடன் இணைக்க வேண்டும்' என மூன்று தீர்மானங்கள் நிறைவேற்றப்பட்டன.


பா.ம.க.,வின் "பல்டி' வரலாறு : ஒவ்வொரு தேர்தலுக்கும் கூட்டணி மாறிவந்த பா.ம.க., 2004, 2006 தேர்தல்களுக்கு மட்டும் தி.மு.க., அணியில் இருந்து சாதனை படைத்துள்ளது. பா.ம.க., ஒவ்வொரு தேர்தலுக்கும் அணி மாறி வந்துள்ளது. 1996 சட்டசபை தேர்தலில் இக்கட்சி தனித்து போட்டியிட்டது. 1998 லோக்சபா தேர்தலில் அ.தி.மு.க.,வுடன் கூட்டணி சேர்ந்தது. அதற்கு அடுத்த ஆண்டான 1999ல் நடந்த லோக்சபா தேர்தலில் தி.மு.க.,வுடன் கூட்டணி வைத்தது. இரண்டே ஆண்டுகளுக்கு பின், அதாவது 2001ல் நடந்த சட்டசபை தேர்தலில், மீண்டும் அ.தி.மு.க., கூட்டணிக்கு தாவியது.

அங்கும் நீண்ட நாள் நிலைக்கவில்லை. ஓராண்டுக்குள்ளாகவே கூட்டணியை முறித்துக்கொண்டது. 2004ல் நடந்த லோக்சபா தேர்தலில், மீண்டும் தி.மு.க., கூட்டணிக்கு வந்தது. வரலாறு காணாத வகையில், 2006 சட்டசபை தேர்தலிலும் தி.மு.க., கூட்டணியிலேயே தொடர்ந்தது.

அதன்பின், இரண்டு ஆண்டுகளுக்குள் மீண்டும் தி.மு.க., - பா.ம.க., கூட்டணி முறிந்தது. தற்போது 2009 லோக்சபா தேர்தலுக்காக மீண்டும் அ.தி.மு.க., கூட்டணிக்கு பா.ம.க., தாவியுள்ளது. ஒவ்வொரு முறை கூட்டணி மாறும் போதும், தங்களது "சீட்'களின் எண்ணிக்கையை பா.ம.க., அதிகரித்து வந்துள்ளது.

அதுமட்டுமன்றி, கூட்டணி மாறும் போதெல்லாம், எதிர்தரப்பு கட்சியையும், அதன் தலைமையையும் கடுமையாக பா.ம.க., விமர்சிப்பது வழக்கம். கூட்டணியில் சேரும் கட்சியின் தலைமையை வெகுவாக புகழ்வது பழக்கம்.

mozama political chi...