பண்டைய இசைக் கருவிகளை சேகரிக்கிறேன்!

தமிழர்களின் இசைக் கருவிகளை தேடிப் பிடித்து,
மீட்டெடுத்து வரும், சென்னை கோயம்பேடைச் சேர்ந்த
சிவகுமார்:

எங்கள் குடும்பத்திற்கும், இசைக்கும் எந்த சம்பந்தமும்
இல்லை. எங்கள் ஊர், சரபேஸ்வரர் கோவிலுக்கு வழிபடச்
செல்லும் போது, இசைக் கருவிகள் அங்கு வாசிக்கப்படுவதை
ஆர்வமாக பார்ப்பேன்.

முதலில், திருச்சங்கை தான் ஊதிப் பார்த்தேன்.
தொடர்ந்து பிற இசைக் கருவிகளை வாசிக்கத் துவங்கினேன்.
அதன் பிறகு, அந்த கருவிகளின் வரலாற்றை அறிந்து
கொள்ளும் ஆர்வம் ஏற்பட்டது. தமிழர்கள் பயன்படுத்திய
இசைக் கருவிகள் தேடல், அப்போது தான் துவங்கியது.

நெடுந்தாரை, எக்காளம், துத்தேரி, நமரி, தாரை, உறுமி, உடல்,
திருச்சின்னம், தவண்டை, பலகை, துடி, தமுக்கு, கொக்கரை,
துரும்பு, பம்பை, மரம் என, பழந்தமிழ் பெயர்களில் ஏராளமாக
உள்ளன.

அந்த காலத்தில் வேறு பொழுதுபோக்கு கிடையாது என்பதால்,
இசைக் கருவிகளை இசைத்து, அவற்றை கேட்டு நேரத்தை
போக்கியுள்ளனர். அந்த வகையில் தான், கோவில் திருவிழாக்கள்,
பண்டிகைகள் வந்துள்ளன.

ஒவ்வொரு பண்டிகைக்கும் வித விதமான இசைக் கருவிகளை
பயன்படுத்தியுள்ளனர். ஒவ்வொரு கோவிலுக்கும், வெவ்வேறான
இசைக் கருவிகள் பயன்படுத்தப்பட்டுள்ளன.

பன்னிரு திருமுறைகளில் மட்டும், 72 வகையான இசைக்
கருவிகளின் பெயர்கள் குறிப்பிடப்பட்டுள்ளன; அவற்றை தேடத்
துவங்கினேன்; 20 வகைகள் கிடைத்தன.

இவ்வாறு, 108 இசைக் கருவிகள் பட்டியலை தயாரித்து,
2009ம் ஆண்டு முதல், அவற்றை தேடத் துவங்கினேன். இதுவரை,
50 இசைக் கருவிகளை மீட்டெடுத்துள்ளேன்;

அவற்றை வைத்துள்ளேன். அந்த காலத்தில், செய்திகளை மக்கள்
அறிந்து கொள்ளவும், அறிவிக்கவும் இசைக் கருவிகளைத் தான்
பயன்படுத்தியுள்ளனர். சங்கு ஒலிப்பதன் மூலம், நேரத்தை தெரிந்து
கொண்டுஉள்ளனர்.

மன்னரின் வருகைக்கு, கொம்பு தாரை என்ற கருவி இசைக்கப்
பட்டுள்ளது; எதிரிகள் வருகையை, எக்காளம் என்ற கருவி
உணர்த்தியுள்ளது. காலப் போக்கில் அவை மறைந்து, பெரும்பாலான
இசைக் கருவிகளை, பழைய இரும்புக் கடைகளில் தான் இப்போது
கண்டறிய முடிந்தது.

என்னிடம் உள்ள இசைக் கருவிகளை இசைக்க, தன்னார்வக் குழு
ஒன்றை உருவாக்கியுள்ளேன். அதில், ஐ.டி., துறையில் பணியாற்றுவோர்
உட்பட பல இளைஞர்கள் உள்ளனர்.

பண்டைய இசைக் கருவிகளை மீட்டெடுத்ததுடன் நின்று விடாமல்,
அவற்றை தற்கால வாழ்வியலுடன் எப்படி பொருத்துவது என
யோசித்தேன்.பண்டைய கருவிகள் முழக்கமிடும், தமிழ் முறை
திருமணங்களை நடத்தி வருகிறேன். தமிழர் வீட்டு திருமணங்களில்,
நம் பாரம்பரிய இசைக் கருவிகளை இசைக்கத் துவங்கினால் மட்டுமே,
பண்டைய இசைக் கருவிகள் மீண்டெழும்!
-
-----------------------------------
தினமலர்