அருவம் - திரைப்பட விமர்சனம்

-

உணவு பாதுகாப்பு அதிகாரியான சித்தார்த், உணவுப்
பொருளை நுகர்ந்து பார்த்தே அதில் கலப்படம்
இருக்கிறதா, இல்லையா என்று கண்டுபிடித்து விடுவார்.

மக்களுக்கு கலப்படம் இல்லாத உணவு கிடைக்க
வேண்டும் என்பது அவருடைய கனவு.
கேத்ரின் தெரசா பள்ளி ஆசிரியை. நுகர்வுத்திறன்
குறைபாடு கொண்டவர்.

குழந்தைகளுக்கு நல்லதொரு எதிர்காலத்தை உருவாக்கியே
தீர வேண்டும் என்று நினைப்பவர். இந்நிலையில், கேத்ரின்
தெரசாவை காதலிக்கிறார் சித்தார்த். பிறகு அவரையே
திருமணம் செய்துகொள்ளவும் முடிவு செய்கிறார்.

அதற்கு கேத்ரின் தெரசா சம்மதிக்கும் நேரத்தில் விபரீத
சம்பவம் நடக்கிறது. சில கலப்பட நிறுவனங்களை கண்டு
பிடித்து, உடனே அதற்கு சீல் வைக்கிறார் சித்தார்த்.

இதனால், உணவு கலப்பட உலகின் தாதா கபீர் துஹான் சிங்,
அவரது அண்ணனான சுகாதாரத்துறை அமைச்சர் மற்றும்
மதுசூதனன், ஸ்டன்ட் சில்வா ஆகியோர் கடுமையாக
பாதிக்கப்படுகின்றனர்.

பிறகு அவர்களால் சித்தார்த் கொலை செய்யப்படுகிறார்.
கலப்படமே இல்லாத ஒரு உலகை உருவாக்க நினைத்த
சித்தார்த், கேத்ரின் தெரசாவின் உடலுக்குள் புகுந்து,
வில்லன்களை எப்படி பழிவாங்குகிறார் என்பது மீதி கதை.

வழக்கமான பேய் படத்தில் உணவு கலப்படம் என்ற கொடூர
விஷயத்தையும், ஒரு பெண்ணின் உடலுக்குள் ஆணின்
ஆவி புகுந்துபொதுநன்மைக்காக போராடுகிறது என்ற
விஷயத்தையும் ேசர்த்து, புதுமையான பேய் படம் கொடுக்க
முயற்சி செய்துள்ளார், அறிமுக இயக்குனர் சாய் சேகர்.

பேயை விட, படத்தில் அவர் காட்டும் உணவு கலப்பட
விஷயங்கள்தான் அதிகமாக பயமுறுத்துகிறது. மருந்துகள்
முதல் குடிக்கும் பால் வரை, எப்படியெல்லாம் கலப்படம்
செய்யப்படுகிறது என்பதை டீட்டெய்லாக காட்டி அதிர
வைக்கிறார்.

கடமை தவறாத அதிகாரியாக தோன்றி, அதிரடி நடவடிக்கைகள்
எடுக்கிறார் சித்தார்த். வில்லன்களை செமையாக போட்டு
பொளக்கிறார். ‘குழப்பத்தில் இருக்கீங்க. நிதானமா யோசிங்க’
என்று காதலியிடம் கனிவு காட்டுகிறார்.

அதேவேளையில், அந்த கொடூர வில்லன்களிடம் பேயாக
ருத்ரதாண்டவம் ஆடுகிறார். தனது நுகர்வுத் திறன் குறைபாடு
காரணமாக ஏற்படும் அவமானங்களை தாங்கிக்கொண்டு,
மக்கள் சேவை செய்கிறார் கேத்ரின் தெரசா.
ஆவியாக மாறும்போது ஆங்கார ரூபம் கொள்கிறார்.

சதீஷ் அவ்வப்போது வந்து, சிரிக்க வைக்க முயற்சி
செய்திருக்கிறார். வில்லன்கள் அனைவரும் வழக்கம்போல்
அடித்து மிரட்டி, பிறகு ஹீரோவிடம் செமையாக அடிவாங்கி
சாகிறார்கள்.

படத்தின் முற்பகுதியில் வரும் காதல் எபிசோடுகளில்
சுவாரஸ்யம் குறைவு. வேகமும் குறைவு. சித்தார்த் சில
காட்சிகளில் மட்டுமே வருகிறார். படத்தின் பிற்பகுதி வேகம்
எடுக்கிறது. எஸ்.எஸ்.தமன் பின்னணி இசை விறுவிறுப்பு
கூட்டினாலும், ஏற்கனவே கேட்டது போலவே தோன்றுகிறது.

என்.கே.ஏகாம்பரம் ஒளிப்பதிவு காதல் காட்சிகளையும்,
பேய் காட்சிகளையும் தனித்தனி கலர் டோனில் படம்
பிடித்து காட்டியுள்ளது. அடுத்து என்ன நடக்கும் என்பதை
எளிதாக கணிக்கக்கூடிய பலவீனமான திரைக்கதை,
படத்தின் வலுவை பெருமளவில் குறைக்கிறது.

நுகர்வுத்திறன் குறைபாடு என்ற புதுமையான கேரக்டரை
காட்டிவிட்டு, சட்டென்று அது சரியாகிவிட்டதாக காட்டி
ஏமாற்றுகிறார்கள். பேய் ஆட்டம் மற்றும் கலப்பட எதிர்ப்பு
என்று, இரு படங்கள் பார்த்த உணர்வு ஏற்படுகிறது.
-
தினகரன்