பொது தகவல்களை வெளியிட அதிகாரிகள் வெட்கப்படுவது ஏன்? - ஐகோர்ட்டு கேள்வி

சென்னை,

தமிழ்நாடு டாக்டர் அம்பேத்கர் சட்டப்பல்கலைக்கழகத்தின்
மாணவர் பவன்குமார் காந்தி. இவர், தான் எழுதிய தேர்வின்
விடைத்தாள் நகலை கேட்டு தகவல் அறியும் உரிமைச்
சட்டத்தின் கீழ் விண்ணப்பம் செய்தார்.

ஆனால், நகல் வழங்க பல்கலைக்கழகம் மறுத்ததால், மாநில
தகவல் ஆணையத்திடம் பவன்குமார் காந்தி மேல்முறையீடு
செய்தார். இவரது வழக்கை விசாரித்த மாநில தகவல் ஆணையம்,
மாணவர் பவன்குமார் காந்தி கேட்கும் விடைத்தாள் விவரங்களை
வழங்கும்படி கடந்த ஆண்டு டிசம்பர் 17-ந்தேதி உத்தரவிட்டது.

இந்த உத்தரவை ரத்து செய்யக்கோரி சென்னை ஐகோர்ட்டில்,
தமிழ்நாடு டாக்டர் அம்பேத்கர் சட்டப்பல்கலைக்கழகம் வழக்கு
தொடர்ந்தது. இந்த வழக்கை விசாரித்த நீதிபதி
எஸ்.எம்.சுப்பிரமணியம் பிறப்பித்த உத்தரவில் கூறியிருப்பதாவது:-

சட்டப்பல்கலைக்கழகத்தை பொறுத்தவரை, தங்களது
பல்கலைக்கழகத்துக்கு என்று தனி விதிகள் உள்ளன.
அந்த விதிகளின்படி, உரிய கட்டணம் செலுத்தினால், விடைத்தாள்
நகல் வழங்கப்படும்.

தகவல் அறியும் உரிமைச்சட்டத்தின் கீழ் விண்ணப்பம் செய்தால்,
அந்த விவரம் தரப்படாது என்று கூறியுள்ளது.

தகவல் அறியும் உரிமைச் சட்டம் என்பது ஒரு உன்னதமான,
புனிதமான சட்டமாகும். அரசு நடவடிக்கைகள் அனைத்தும்
வெளிப்படைத் தன்மையுடன், நேர்மையாக இருக்க வேண்டும்
என்பதற்காக இந்த சட்டம் கொண்டுவரப்பட்டது.

இந்த மிகப்பெரிய தேசத்தில், பொதுமக்களாகிய நாம்தான்,
ஊழல் மற்றும் ஊழல் அல்லாத அமைப்புகளுக்கு மத்தியில்
சிக்கித் தவிக்கின்றோம். அரசு எந்திர நடவடிக்கையில்
வெளிப்படைத்தன்மை இல்லை என்றால், ஊழலையும்,
முறைகேடுகளையும் ஒழிக்க முடியாது.

சுப்ரீம் கோர்ட்டு ஒரு வழக்கில் அளித்த தீர்ப்பின்படி, தகவல்
அளிப்பது தொடர்பாக பல்கலைக்கழகத்துக்கு தனியாக
விதிமுறைகள் இருந்தாலும், அந்த விதிமுறைகளை எல்லாம்
ஒதுக்கி தள்ளிவிட்டு, தகவல் அறியும் உரிமைச்சட்டத்தை
பின்பற்றி தகவல்களை கேட்பவர்களுக்கு அளிக்க வேண்டும்.

எனவே, தகவல் அறியும் உரிமைச்சட்டத்தின் கீழ் மாணவர்
பவன்குமார் காந்திக்கு, விடைத்தாள் விவரங்களை பெற முழு
உரிமை உள்ளது. தேசப்பாதுகாப்பு உள்ளிட்ட சில துறைகளின்
விவரங்களை தவிர, மற்றவை பொதுமக்களுக்கு தெரியவேண்டும்.

ஒரு பொது தகவலை ஒருவர் கேட்கும்போது, அந்த தகவலை
பொதுமக்கள் தெரிந்துக்கொள்ளும் விதமாக வெளியிடவும்,
அந்த தகவலை கொடுக்கவும் அரசு உயர் அதிகாரிகள்
வெட்கப்படுவது ஏன்? என்பதுதான் இந்த வழக்கில் எழுந்துள்ள
மிகப்பெரிய கேள்வியாக அமைந்துள்ளது.

நாடாளுமன்றத்தில் ஒரு சட்டம் இயற்றிவிட்டால், அந்த சட்டத்தை
அனைவரும் பின்பற்ற வேண்டும். அதற்கு எதிரான விதிமுறைகளை
உருவாக்கி செயல்பட முடியாது. பல்கலைக்கழகத்தின் இந்த
வழக்கை தள்ளுபடி செய்கிறேன்.

இவ்வாறு நீதிபதி கூறியுள்ளார்.

தினத்தந்தி