மன நிம்மதி தரும் கோவில்!

நெற்றியில் குங்குமம், விபூதி என, மங்களகரமாக இருப்பது
குறித்து, தி.மு.க., தலைவர் ஸ்டாலின் மனைவி துர்கா:

நெற்றியில் பெரிய, 'சைஸ்' குங்கும பொட்டு, திருநீறு
இல்லாமல் என்னைப் பார்க்க முடியாது.

குளிச்சதும் நெற்றியில் திருநீறு வைத்துக் கொள்வேன்.
வியர்வையால் திருநீறு மறைந்தாலும், மீண்டும் வைத்துக்
கொள்வேன். கோபாலபுரத்தில் இருந்த போது, நெற்றி நிறைய,
பெருசா திருநீறு வைத்துக் கொள்வேன்.

'மாமனார் கருணாநிதி பார்த்தால், ஏதாவது சொல்வார்;
திருநீறை அழித்து விடு' என, வீட்டில் இருக்கும் பிறர் சொல்வர்;
எனினும், நான் கேட்பதில்லை; அப்படியே தான் இருந்தேன்;
மாமனாரும் ஒன்றும் சொல்லவில்லை. தலையில் ஏதாவது
ஒரு பூ வைப்பது வழக்கம்.

எங்கள் வீட்டு தோட்டத்தில் விளையும் பூக்களான
நந்தியாவட்டை, செம்பருத்தி, அரளி போன்றவற்றை,
தினமும் பறித்து, சாமிக்கு வைத்து கும்பிடுவேன்.
௧௨ இலை உடைய, ராஜ வில்வ மரம், சாமிக்காகவே
வைத்துள்ளேன்.

பல வித்தியாசமான பூக்கள், மரங்களும் உண்டு. குபேர
இலைன்னு சொல்லப்படும் பெருந்தும்பை அல்லது பேய்
மிரட்டி செடி உள்ளது. அதன் இலையை சுருட்டி, விளக்கு
திரி ஏற்றலாம்; நுால் திரி போல நன்றாக எரியும்.

எனக்கு ஏதாவது மனக்கஷ்டம் இருந்தால், கோவிலுக்குத்
தான் செல்வேன். அந்த சமயம், எந்த ஊரில் இருக்கிறேனோ,
அங்குள்ள கோவிலுக்கு போய், சுவாமி கும்பிடுவது பழக்கம்.

பிரச்னையை எல்லாம் சாமி மேல போட்டுட்டு வந்துடுவேன்.
அப்படி கோவிலுக்கு போகும் போது, ஊடகத்தினர் சுற்றி
சுற்றி வந்து போட்டோ எடுக்கும் போது, கஷ்டமாக இருக்கும்.

திருக்கோஷ்டியூர் கோவிலுக்கு, நானும், என் கணவர்
ஸ்டாலினும் சென்ற போது, அங்கு நிறைய பேர் காத்திருந்தனர்.
அங்கிருந்த குருக்கள், எங்களை சன்னிதிக்குள் அழைத்துச்
சென்றார். காத்திருந்த பெண்களில் சிலர், 'நாங்க எவ்வளவு
நேரமாக காத்திருக்கிறோம். நீங்க இப்படி போவது நியாயமா?'
என்றனர். நான் அவர்களிடம் போய், 'மன்னித்துக் கொள்ளுங்கள்'
என, மன்னிப்பு கேட்டேன்.

என்னை பொறுத்தவரை, கோவில் தரும் மன நிம்மதியை,
வேறு எதுவும் தருவதில்லை. என் கணவர், 'மிசா' எனப்படும்
அவசர காலத்தில், சிறையில் இருந்த போது, நானும்,
என் நாத்தனார் செல்வியும் போகாத கோவில் கிடையாது.

ரொம்ப காலமாக, திருவண்ணாமலை தீபம் பார்க்க வேண்டும்
என ஆசை. அந்த நாளில், ஏராளமான கூட்டம் சேரும் என்பதால்,
தவிர்த்து வந்தோம். கடந்த ஆண்டு தான், நானும், என் தங்கையும்
சென்று வந்தோம். அதுபோல, மன அமைதி இல்லாத நேரத்தில்,
மனம் அமைதியை தேடும் காலத்தில், பக்தி பாடல்கள் கேட்பது
வழக்கம்.

எம்.எஸ்.,சின், 'குறை ஒன்றும் இல்லை; மறைமூர்த்தி கண்ணா'
பாடலை, எத்தனை முறை கேட்டிருப்பேன் என, சொல்ல முடியாது!
-
---------------------------------------தினமலர்