தமிழகம் முழுவதும் வேகமாக பரவும் டெங்கு சென்னையில் 500 பேர் அட்மிட்: 5 ஆயிரம் பேருக்கு காய்ச்சல் பாதிப்பு

சென்னை:
தமிழகம் முழுவதும் டெங்கு காய்ச்சல் வேகமாக பரவிவரும்
நிலையில் சென்னையில் 500 பேர் உள்பட தமிழகம் முழுவதும்
5 ஆயிரம் பேர் காய்ச்சல் காரணமாக மருத்துவமனைகளில்
அனுமதிக்கப்பட்டுள்ளனர்.

தமிழகத்தில் ஒவ்வோர் ஆண்டும் மழை காலத்தில் இரட்டை
இலக்க எண்ணிக்கையில் டெங்கு காய்ச்சல் இறப்பு ஏற்பட்டு
வருகிறது. இந்நிலையில் டெங்கு காய்ச்சல், வைரஸ் காய்ச்சல்,
மர்ம காய்ச்சல் சென்னை உட்பட தமிழகம் முழுவதும் வேகமாக
பரவி வருகிறது.

இந்நிலையில் சென்னையிலுள்ள அரசு, தனியார்
மருத்துவமனைகளில் சிகிச்சைக்காக அனுமதிக்கப்பட்டுள்ளனர்.
இதனால் அரசு, தனியார் மருத்துவமனைகளில் காய்ச்சல் வார்டுகள்
வேகமாக நிரம்பி வருகிறது.

ஒவ்வோர் ஆண்டும் வடகிழக்கு பருவமழை காலம் தொடங்கிய
பின்னரே டெங்கு காய்ச்சல் பாதிப்பு அதிகரிக்கும். ஆனால் இந்த
ஆண்டு தென்மேற்கு பருவமழை, வெப்பசலனம், வளிமண்டல
மேலடுக்கில் காற்று சுழற்சி, வங்கக்கடலில் உருவான காற்றழுத்தம்
என பல்வேறு காரணங்களால் கடந்த 3 மாதங்களில் தமிழகத்தில்
வழக்கமாக பதிவாகும் மழையை விட கூடுதல் மழை பதிவாகியுள்ளது.

இதனால் ஆங்காங்கே தண்ணீர் தேங்கியுள்ளது. இதனால்
ெடங்கு காய்ச்சலை பரப்பும் ஏடிஸ் வகை கொசு முட்டையிட்டு
வளர காரணமாகி விடுகிறது. டெங்கு காய்ச்சலால் கடந்த மாத
இறுதியில் 3 குழந்தைகள் இறந்துள்ளனர்.

ஆனால், உயிரிழந்தவர்களின் எண்ணிக்கை கூடுதலாக இருக்கும்
என்று கூறப்படுகிறது. சென்னை ராஜிவ் காந்தி அரசு மருத்துவமனை,
எழும்பூர் குழந்தைகள் நல மருத்துவமனை, ராயப்பேட்டை அரசு
மருத்துவமனை, கீழ்பாக்கம் அரசு மருத்துவமனைகளில் காய்ச்சல்
வார்டுகள் அமைக்கப்பட்டுள்ளது.

அந்த வார்டுகளில் சிகிச்சைக்காக அட்மிட் செய்யப்படுவோரின்
எண்ணிக்கை தொடர்ந்து அதிகரித்த வண்ணம் இருந்தது.
சென்னையிலுள்ள அரசு, தனியார் மருத்துவமனைகளில் 500க்கும்
அதிகமானோர் காய்ச்சல் காரணமாக அனுமதிக்கப்பட்டுள்ளனர்.

இந்த நிலையில் சென்னை மாநகராட்சிக்கு உட்பட பகுதிகளில்
390 பேருக்கு டெங்கு காய்ச்சல் இருப்பது உறுதிபடுத்தப்பட்டுள்ளது.

இதை தவிர்த்து தமிழகத்தின் பல்வேறு பகுதிகளில் டெங்கு, மர்ம
காய்ச்சல், வைரஸ் காய்ச்சல் என 5 ஆயிரத்திற்கும் மேற்பட்டோர்
சிகிச்சை பெற்று வருகின்றனர்.

அவர்களில் ஆயிரத்துக்கும் அதிகமானோருக்கு டெங்கு காய்ச்சல்
இருக்கலாம் என்று கூறப்படுகிறது.இந்நிலையில் விரைவில் வடகிழக்கு
பருவமழை தொடங்க உள்ளது. இதனால் டெங்கு காய்ச்சல் பரவுதல்
வேகமெடுக்கும் என்றும் கூறப்படுகிறது.

இதனால் சுகாதாரத்துறை, பிற அரசு துறைகளுடன் இணைந்து
டெங்கு தடுப்பு, விழிப்புணர்வு நடவடிக்கைகளை மேற்கொண்டால்
மட்டுமே இந்த ஆண்டு டெங்கு காய்ச்சல் பாதிப்பால் ஏற்படும்
இறப்புகளை கட்டுப்படுத்த முடியும் என்ற நிலை ஏற்பட்டுள்ளது.

இல்லையெனில். காய்ச்சல் காரணமாக உயிரிழப்புகள் அதிகரிக்க
வாய்ப்புள்ளது என சமூக ஆர்வலர்கள் அச்சம் தெரிவித்துள்ளனர்.
-
தினகரன்