'கந்தகோட்டை' - திரை விமர்சனம்

கவிக்காதலன் · கவிக்காதலன் Tue Dec 29, 2009 1:21 am

காதல் என்ற ஒற்றை வார்த்தையை வைத்துக்கொண்டு இரண்டரை மணிநேரம் ரசிகர்களை இருக்கையில் அமர வைத்த ஒரு ஜனரஞ்சகமான படம்.

காதலையும் காதலர்களையும் வெறுக்கும் இளைஞர், நகுலன். இவர் காதாலை வெறுப்பதற்குக் காரணம், தம் பெற்றோர்கள் காதல் திருமணம் செய்துகொண்டு அடிக்கடி சண்டை போட்டுக்கொள்வதால் தான்.அதே சமயம், காதலர்களைச் சேர்த்து வைத்துச் சந்தோஷப்படும் குணம் கொண்டவர், நாயகி பூர்ணா. இவர்கள் இருவரும் சந்திக்கும் சூழ்நிலை ஏற்படுகிறது.

உண்மையான காதல் என்றால் என்ன என்று பூர்ணாவின் மூலம் உணரும் நகுலன், பூர்ணாவைக் காதலிக்க, தன் காதலைப் பூர்ணாவிடம் சொல்ல, பதில் ஏதும் பேசாமல் தனது சொந்த ஊரான நாகர்கோவிலுக்குச் சென்றுவிடும் பூர்ணா, தனது சம்மதத்தைக் கைப்பேசியின் மூலம் நகுலனுக்குத் தெரிவிக்கிறார்.

சந்தோஷம் அடையும் நகுலன், பூர்ணாவைத் தேடி நாகர்கோவிலுக்குச் செல்ல, அங்கு பூர்ணாவிற்கு இருக்கும் ஆபத்தை அறிந்துகொள்ளும் நகுலன், அந்த ஆபத்தில் இருந்து பூர்ணாவை எப்படி மீட்டுக் கரம் பிடிக்கிறார் என்பதுதான் படத்தின் கதை.

நடிப்பதற்குப் பெரிதாக இப்படத்தில் வாய்ப்பு இல்லையென்றாலும் எப்போதும் போல நகுலன், நடனம், சண்டைக் காட்சியில் வெளுத்துக் கட்டியிருக்கிறார். காதலர்களைப் பிரித்து மகிழ்ச்சி அடையும் நகுலன், தன் காதலை நாயகியிடம் சொல்லிவிட்டுத் தவிக்கும் காட்சியில் மனத்தில் நிற்கிறார்.

பூர்ணா நடிக்கத் தெரிந்த நடிகையாக வலம் வருகிறார். காதலர்களுக்காகப் பரிந்து பேசுவதிலும், வில்லன் சம்பத்திடம் மாட்டிக்கொண்டு அலறுவதும் எனத் தனக்கு நடிக்கத் தெரியும் என்பதை நிரூபித்திருக்கிறார்.

படத்திற்குப் பலம் சேர்க்கும் மற்றொருவர் சந்தானம். இவரின் நகைச்சுவை வசனத்திற்குத் திரையரங்கமே அடிமை. அந்த அளவிற்குச் சிரிக்க வைத்துள்ளார்.

இயக்குநர் சக்திவேல்.எஸ், முதல் பாதியை ஜாலியாகவும் இரண்டாம் பாதியை விறுவிறுப்பாகவும் நகர்த்திச் சென்றிருக்கிறார். இதற்கு முன் பார்த்த கதையாக இருந்தாலும் அதை வேறு விதத்தில் ரசிகர்கள் விரும்பும் வகையில் சொல்லியிருப்பதில் இயக்குநர் வெற்றி பெற்றுள்ளார்.

'எப்படி என்னுள் காதல் வந்தது....', 'உன்னைக் காதலி என்று சொல்லவா......' என்ற பாடல்களை இசையமைப்பாளர் தினா, திரும்பத் திரும்பக் கேட்க வைத்திருக்கிறார். கிருஷ்ணசாமியின் கேமரா, அயல்நாடுகளின் அழகை அள்ளிக்கொண்டு வந்திருக்கிறது.

'கந்தகோட்டை' - ரசிகர்களின் ஆதரவில் உருவான வெற்றிக் கோட்டை.

**சிவா** · **சிவா** Tue Dec 29, 2009 1:26 am

படம் அருமையாக உள்ளது! ஒருமுறை நம்பிக்கையுடன் அனைவரும் இப்படத்தைக் காணலாம்!

'கந்தகோட்டை' - திரை விமர்சனம்

'கந்தகோட்டை' - திரை விமர்சனம்

Re: 'கந்தகோட்டை' - திரை விமர்சனம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக