கருப்புப் பண மோசடி வழக்கு: ராஜ் தாக்கரேவிடம் 8 மணி நேரம் விசாரணை

கோஹினூர் சிடிஎன்எல் நிறுவனம் மீது கருப்புப் பண
மோசடித் தடுப்புச் சட்டத்தின் கீழ் பதியப்பட்ட வழக்கு
தொடர்பாக மகாராஷ்டிர நவநிர்மாண் சேனை
(எம்என்எஸ்) கட்சியின் தலைவர் ராஜ் தாக்கரேவிடம்
அமலாக்கத் துறை அதிகாரிகள் 8 மணி நேரம் விசாரணை
நடத்தினர்.

மகாராஷ்டிர மாநில முன்னாள் முதல்வரும், சிவசேனை
கட்சியின் மூத்த தலைவருமான மனோகர் ஜோஷியின்
மகன் உன்மேஷ் ஜோஷி, ராஜ் தாக்கரே உள்ளிட்டோர்
இணைந்து கோஹினூர் சிடிஎன்எல் என்ற நிறுவனத்தைக்
கடந்த 2005-ஆம் ஆண்டு தொடங்கினர்.

மும்பையிலுள்ள தாதர் பகுதியில் கோஹினூர் டவர்ஸ்
என்ற பெயரிலான கட்டடத்தை, கோஹினூர் சிடிஎன்எல்
நிறுவனம் கட்டிவருகிறது.

இந்த நிறுவனத்துக்கு முதலீடாகவும், கடனாகவும்
ரூ.450 கோடியை ஐஎல்எஃப்எஸ் நிதி நிறுவனம்
வழங்கியிருந்தது. அந்தத் தொகையைத் திருப்பிச்
செலுத்துவதில் முறைகேடு நடைபெற்றதாகக் குற்றச்சாட்டு
எழுந்தது.

இதுதொடர்பாக, கருப்புப் பண மோசடித் தடுப்புச் சட்டத்தின்
கீழ் அமலாக்கத் துறை வழக்குப்பதிவு செய்து விசாரணை
நடத்தி வருகிறது.

இது தொடர்பான விசாரணைக்கு ஆஜராகுமாறு
ராஜ் தாக்கரேவுக்கு அமலாக்கத் துறை நோட்டீஸ்
அனுப்பியிருந்தது. இந்நிலையில், மும்பையிலுள்ள
அமலாக்கத் துறை அலுவலகத்தில் ராஜ் தாக்கரே
வியாழக்கிழமை காலை ஆஜரானார். இதன் காரணமாக,
அலுவலகத்தைச் சுற்றிலும் காவல் துறையினர் பலத்த
பாதுகாப்பில் ஈடுபட்டனர்.

தாக்கரேவிடம் அமலாக்கத் துறை அதிகாரிகள் 8 மணி
நேரத்துக்கு மேலாக விசாரணை நடத்தினர்.

வியாழக்கிழமை காலை 11.25 மணிக்கு அமலாக்கத் துறை
அலுவலகத்தில் ஆஜரான அவர் இரவு 8.15 மணியளவில்
வெளியேறினார். அவரிடம் வாக்குமூலம் பெற்ற அதிகாரிகள்,
அது குறித்தான எந்த தகவலையும் வெளியிடவில்லை.

இதனிடையே, அமலாக்கத் துறை அலுவலகத்துக்கு
வெளியேயும், மும்பையின் தாதர் பகுதியிலுள்ள
ராஜ் தாக்கரேவின் இல்லத்துக்கு வெளியேயும் எம்என்எஸ்
கட்சித் தொண்டர்கள் போராட்டத்தில் ஈடுபட்டனர்.

இதையடுத்து, அப்பகுதிகளில் காவல் துறையினர்
144 தடையுத்தரவைப் பிறப்பித்தனர். தடையை மீறி
போராட்டம் நடத்திய அக்கட்சியின் மூத்த தலைவர்
சந்தீப் தேஷ்பாண்டேவையும், அக்கட்சியின் தொண்டர்கள்
சிலரையும் காவல் துறையினர் கைது செய்தனர்.
-
------------------------------------
தினமணி