சீரமைப்பு பணி நிறைவு: விவேகானந்தா படகு மீண்டும் இயக்கம்

**ayyasamy ram** · **ayyasamy ram** Tue Aug 20, 2019 8:59 am

கன்னியாகுமரி கடலில் அமைந்துள்ள விவேகானந்தர்
நினைவு மண்டபம் மற்றும் திருவள்ளுவர் சிலைக்கு
சுற்றுலாப் பயணிகளை ஏற்றிச் செல்லும் விவேகானந்தா
படகு சீரமைப்பு பணிக்குப் பின்னர் மீண்டும்
செவ்வாய்க்கிழமை (ஆக. 20) இயக்கப்படுகிறது.

கன்னியாகுமரி கடலின் நடுவே அமைந்துள்ள இருவேறு
பாறைகளில் விவேகானந்தர் நினைவு மண்டபமும்,
133 அடி உயர திருவள்ளுவர் சிலையும் அமைந்துள்ளது.

இவற்றை தினமும் ஆயிரக்கணக்கான உள்நாடு மற்றும்
வெளிநாட்டு சுற்றுலாப் பயணிகள் படகில் சென்று பார்த்து
வருகின்றனர்.

இதற்காக தமிழக அரசின் பூம்புகார் கப்பல் போக்குவரத்துக்
கழகம் எம்.எல்.பொதிகை, எம்.எல்.குகன், எம்.எல்.விவேகானந்தா
ஆகிய 3 படகுகள் இயக்கி வருகிறது. தினமும் காலை 8 மணிக்கு
தொடங்கும் படகுப் போக்குவரத்து மாலை 4 மணி வரை
நடைபெற்று வருகிறது.

இந்த 3 படகுகளிலும் தலா 150 பேர் பயணம் செய்யலாம்.
மேலும், சீசன் காலங்களில் நாளொன்றுக்கு10 ஆயிரம் பேரும்,
சீசன் இல்லாத காலங்களில் தினமும் 2 ஆயிரம் பேரும் படகில்
சென்று விவேகானந்தர் மண்டபம் மற்றும் திருவள்ளுவர்
சிலையை பார்வையிட்டு வருகின்றனர்.

சீரமைப்பு பணி: இந்நிலையில் விவேகானந்தா படகு
பராமரிப்பு பணிக்காக கடந்த ஜூன் மாதம் சின்னமுட்டம்
மீன்பிடித் துறைமுகத்தில் அமைந்துள்ள படகு தளத்துக்கு
கொண்டு செல்லப்பட்டது.

ரூ.25 லட்சம் செலவில் இப்படகு சீரமைக்கப்பட்டு பணிகள்
முடிக்கப்பட்டது. இதையடுத்து மாநில துறைமுக அதிகாரி
முன்னிலையில் தமிழ்நாடு கடல்சார் வாரியத்தின் துறைமுக
அதிகாரிகள் திங்கள்கிழமை சோதனை ஓட்டம் நடத்தினர்.

இதைத்தொடர்ந்து சுற்றுலாப் பயணிகள் பயன்பாட்டுக்கு
புதுப்பொலிவுடன் செவ்வாய்க்கிழமை முதல் இந்தப் படகு
இயக்கப்படுகிறது.
-
--------------------------
தினமணி

சீரமைப்பு பணி நிறைவு: விவேகானந்தா படகு மீண்டும் இயக்கம்

சீரமைப்பு பணி நிறைவு: விவேகானந்தா படகு மீண்டும் இயக்கம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக