திருப்பத்தூர், ராணிப்பேட்டையை தலைமையிடமாக கொண்டு தமிழகத்தில் 2 புதிய மாவட்டங்கள் எடப்பாடி பழனிசாமி அறிவிப்பு

-
சென்னை,

தமிழ்நாட்டில் ஏற்கனவே 33 மாவட்டங்கள் இருந்தன.

மேலும் 2 புதிய மாவட்டங்கள்

இந்த நிலையில், நெல்லை மாவட்டம் இரண்டாக பிரிக்கப்பட்டு
தென்காசியை தலைமையிடமாக கொண்டு ஒரு புதிய
மாவட்டமும், காஞ்சீ புரம் மாவட்டம் இரண்டாக பிரிக்கப்பட்டு
செங்கல்பட்டை தலைமையிடமாக கொண்டு ஒரு புதிய
மாவட்டமும் உருவாக்கப்படும் என்று முதல்-அமைச்சர் எடப்பாடி
பழனிசாமி கடந்த மாதம் 18-ந் தேதி சட்டசபையில் அறிவித்தார்.

இதனால் தமிழகத்தில் மாவட்டங்களின் எண்ணிக்கை 35 ஆக உயர்ந்தது.

இந்த நிலையில் தமிழகத்தில் புதிதாக மேலும் 2 மாவட்டங்கள்
உருவாக்கப்படுவதாக முதல்-அமைச்சர் எடப்பாடி பழனிசாமி
அறிவித்து உள்ளார்.

வேலூர் மாவட்டம் மூன்றாக பிரிப்பு

சென்னை கோட்டையில் தமிழக அரசின் சார்பில் நேற்று
நடைபெற்ற சுதந்திர தின விழாவின் போது தேசிய கொடியை
ஏற்றி வைத்து உரையாற்றிய அவர் இந்த அறிவிப்பை
வெளியிட்டார்.

அவர் பேசுகையில், தற்போது பெரிய மாவட்டமாக உள்ள
வேலூர் மாவட்டத்தை பிரிக்க வேண்டும் என்று வந்த
கோரிக்கைகளை பரிசீலித்து, நிர்வாக வசதிக்காக, வேலூரை
தலைமையிடமாக கொண்டு ஒரு மாவட்டமும், திருப்பத்தூரை
தலைமையிடமாக கொண்டு ஒரு புதிய மாவட்டமும்,
ராணிப்பேட்டையை தலைமையிடமாக கொண்டு ஒரு புதிய
மாவட்டமும் தோற்றுவிக்கப்படும் என்று கூறினார்.

அத்துடன், வேலூர் மாவட்டத்தில் உள்ள கே.வி.குப்பத்தை
தலைமையிடமாக கொண்டு ஒரு புதிய வட்டம் ஏற்படுத்தப்படும்
என தெரிவித்தார்.

புதிதாக 2 மாவட்டங்கள் உருவாக்கப்படுவதால், தமிழகத்தில்
மாவட்டங்களின் மொத்த எண்ணிக்கை 37 ஆக உயருகிறது.
-
-------------------------
தினத்தந்தி

அப்படியே தமிழ் நாட்டையும் இரண்டு
மாநிலமாக பிரித்து விட்டால் பதவி
கிடைக்காத தலைவர்ளுக்கு பதவி
கிடைக்க ஒரு வாய்ப்பாகும்...!!