கேரளத்தில் இயல்பு நிலை திரும்புகிறது: பலி எண்ணிக்கை 104 ஆனது

-
வெள்ளத்தால் பாதிக்கப்பட்ட கேரளத்தில் மழை குறைந்து,
வெள்ளம் வடியத் தொடங்கியுள்ளதால் மெல்ல இயல்பு நிலை
திரும்பி வருகிறது. அங்கு மழை, வெள்ளச் சம்பவங்களில்
பலியானோர் எண்ணிக்கை 104ஆக உயர்ந்துள்ளது.

அண்டை மாநிலமான கேரளத்தில் கடந்த 8ஆம் தேதியில்
இருந்து கனமழை பெய்தது. இதனால் பல்வேறு மாவட்டங்கள்
வெள்ளக்காடாக மாறின. வயநாடு, மலப்புரம் ஆகிய
மாவட்டங்களில் பெரிய அளவிலான நிலச்சரிவுகள் ஏற்பட்டன.

வியாழக்கிழமை பகல் 3 மணி நிலவரப்படி, மழை, வெள்ள
பாதிப்புகளுக்கு பலியானோர் எண்ணிக்கை 104 ஆக
உயர்ந்துள்ளதாக மாநில அரசு வெளியிட்ட தகவல் தெரிவிக்கிறது.

மாநிலத்தின் வடக்குப் பகுதியில் அமைந்துள்ள மலப்புரம்
மாவட்டத்தில்தான் அதிகபட்சமாக 43 உயிரிழப்புகள் ஏற்பட்டுள்ளன.
அங்கு இன்னும் 28 பேரைக் காணவில்லை.

அடுத்ததாக, கோழிக்கோட்டில் 17 பேரும், வயநாட்டில் 12 பேரும்
இறந்தனர். வயநாட்டில் மேலும் 7 பேரைக் காணவில்லை.
கண்ணனூரில் 9 பேரும் திருச்சூரில் 9 பேர் உயிரிழந்தனர்.

இந்நிலையில், கேரளத்தில் மழை குறைந்துள்ளதால், வெள்ளம்
வடியத் தொடங்கியுள்ளது. மாநிலத்தின் பல்வேறு பகுதிகளிலும்
வியாழக்கிழமை வெயில் அடித்தது. மக்களின் இயல்பு வாழ்க்கை
மெல்லத் திரும்பி வருகிறது.

மழையின் தீவிரம் குறைந்து விட்டதால் கேரளத்தின்
14 மாவட்டங்களில் ஒன்றில் கூட மிக பலத்த மழைக்கான ரெட் அலர்ட்
எச்சரிக்கை வியாழக்கிழமை விடுக்கப்படவில்லை. எனினும்,
ஆங்காங்கே கனமழைக்கான ஆரஞ்சு அலர்ட் மற்றும் யெல்லோ
அலர்ட் எச்சரிக்கைகள் கண்ணனூர், காசர்கோடு, இடுக்கி
மாவட்டங்களுக்கு விடுக்கப்பட்டன.

நிலச்சரிவுகள் ஏற்பட்ட மலப்புரம் மாவட்டத்தின்
கவளப்பாறையிலும், வயநாடு மாவட்டத்தின் புத்துமலை
பகுதியிலும் வியாழக்கிழமையும் தேடுதல் நடவடிக்கை தொடர்ந்து.
அங்கு வீடுகளுக்குள் உயிரோடு புதைந்து பலியானதாக
கருதப்படுவோரைத் தேடுவதற்காக இப்பணி மேற்கொள்ளப்பட்டு
வருகிறது.

புத்துமலை பகுதியில் வியாழக்கிழமை வெயில் காய்ந்தது.
அங்கு எர்த் மூவர் இயந்திரங்கள் மற்றும் மோப்ப நாய்களின்
உதவியுடன் மீட்புப் படையினர் தேடுதல் பணியில் ஈடுபட்டனர்.

கவளப்பாறை பகுதியில் நிலச்சரிவு ஏற்பட்ட இடங்களில் டிரோன்
எனப்படும் சிறிய விமானங்கள் மூலம் தேடுதல் நடவடிக்கை
மேற்கொள்ளப்பட்டது.

பல்வேறு பகுதிகளிலும் வெள்ளம் வடிந்து வருவதைத் தொடர்ந்து,
நிவாரண முகாம்களில் இருந்து மக்கள் வெளியேறி வீடுகளுக்கு
செல்லத் தொடங்கியுள்ளனர்.

எனினும், இன்னும் 1 லட்சத்து 75 ஆயிரத்து 373 பேர் 1,057 முகாம்களில்
தங்கியுள்ளதாக தகவல்கள் தெரிவிக்கின்றன.

அரசு வெளியிட்ட தகவலின்படி மழை வெள்ளத்தால் 11,901 வீடுகள்
ஓரளவு சேதமடைந்துள்ளன; 1,115 வீடுகள் முற்றிலும் சேதமடைந்துள்ளன.
வெள்ளத்தால் பாதிக்கப்பட்ட குடும்பங்களுக்கு கேரள அரசு
புதன்கிழமை இழப்பீடு அறிவித்தது.

அனைத்துக் குடும்பங்களுக்கும் ரூ.10,000 உடனடி உதவி என்பதும்
அதில் அடங்கும்.
-
--------------------------------------
தினமணி