ராம பிரான் மகன் குசா வழித்தோன்றல், சொல்கிறார் பா.ஜ., - எம்.பி.,

ஜெய்ப்பூர்:
''கடவுள் ராம பிரானின் வழித் தோன்றல்கள், இப்போதும்
உள்ளனரா என, உச்ச நீதிமன்றம் கேள்வி எழுப்பியுள்ளது.

இதற்கு, நானே உதாரணம். ராம பிரானின் மகன், குசாவின்
வழித் தோன்றல்கள் தான், எங்கள் குடும்பத்தினர்,'' என்று,
ராஜஸ்தான் மாநில, பா.ஜ., - எம்.பி., தியா குமாரி கூறியுள்ளார்

ராஜஸ்தான் மாநிலத்தின், ராஜ்ஸாமான்ட் தொகுதியின், எம்.பி.,யாக
இருப்பவர், பா.ஜ., வைச் சேர்ந்த, தியா குமாரி, 48. இவர், ஜெய்ப்பூர்
அரச குடும்பத்தை சேர்ந்தவர்.ஜெய்ப்பூரில், நேற்று இவர்,
செய்தியாளர்களிடம் கூறியதாவது:

அயோத்தியில், சர்ச்சைக்குரிய நிலம் யாருக்கு சொந்தம் என்பது
தொடர்பான வழக்கின் விசாரணை, உச்ச நீதிமன்றத்தில் நடக்கிறது.
சமீபத்தில் நடந்த விசாரணையின் போது, 'ராம பிரானின் ரகு
வம்சத்தை சேர்ந்தவர்கள், யாராவது, இப்போதும் வசிக்கின்றனரா'
என, நீதிபதிகள் கேள்வி எழுப்பினர்.

ராம பிரானின் வழித் தோன்றல்கள், உலகெங்கும் வசிக்கின்றனர்.
அதற்கு, நானே சிறந்த உதாரணம். எங்கள் குடும்பத்தை சேர்ந்தவர்கள்,
ராம பிரானின் மகன், குசாவின் வழித் தோன்றல்கள்.

இதை உறுதி செய்வதற்கான ஆவணங்கள், எங்கள் குடும்பத்திடம்
உள்ளன, மனு சாஸ்திரம், பாரம்பரிய நடைமுறை ஆகியவற்றின்
அடிப்படையில், இதை கூறுகிறேன். நீதிமன்றம் விரும்பினால்,
இவற்றை அளிக்க தயார்.

ஆனால், தேவையில்லாமல் இந்த விஷயத்தை பெரிது படுத்த
விரும்பவில்லை.இவ்வாறு, அவர் கூறினார்
-
தினமலர்