சம்ஜவுதா ரயில் நிறுத்தம் : மத்திய அரசு அறிவிப்பு

புதுடில்லி:
இந்தியா - பாக்., இடையே இயக்கப்பட்டு வந்த,
சம்ஜவுதா எக்ஸ்பிரஸ் ரயில் சேவையை, பாக்., நிறுத்தியதால்,
மத்திய அரசும் நிறுத்தியுள்ளது.

இந்தியா - பாகிஸ்தான் இடையே, சம்ஜவுதா எக்ஸ்பிரஸ்
ரயில் இயக்கப்பட்டு வந்தது. டில்லியில் இருந்து, அட்டாரி
எல்லை வரை, நமது அரசு, ரயிலை இயக்கி வந்தது.

அட்டாரியில் இருந்து லாகூர் இடையேயான ரயிலை,
பாக்., இயக்கி வந்தது. ஜம்மு - காஷ்மீருக்கு சிறப்பு அந்தஸ்து
அளிக்கும் சட்டப் பிரிவு சமீபத்தில் நீக்கப்பட்டது.

இதற்கு எதிர்ப்பு தெரிவித்து, சம்ஜவுதா எக்ஸ்பிரஸ் ரயில்
சேவையை, பாக்., சமீபத்தில் நிறுத்தியது.

இந்த நிலையில், பாக்., ரயில்வே அமைச்சர்,
ஷேக் ரஷீத் அஹமது கூறியதாவது:

இந்தப் பிரச்னை குறித்து, வெளியுறவு அமைச்சகம்தான்
முடிவு எடுக்க வேண்டும். அதே நேரத்தில், நான் ரயில்வே
அமைச்சராக இருக்கும்வரை, இந்த ரயில்களை இயக்க
அனுமதிக்க மாட்டேன்.இவ்வாறு, அவர் கூறினார்.

தற்போது, டில்லி - அட்டாரி இடையேயான ரயில் சேவையை
நிறுத்துவதாக, இந்திய ரயில்வே, நேற்று அறிவித்தது.
இது குறித்து வடக்கு ரயில்வே வெளியிட்ட செய்தியில்,
லாகூர் முதல் அட்டாரி வரையிலான சம்ஜவுதா ரயிலை
நிறுத்துவது என்ற பாகிஸ்தான் முடிவை தொடர்ந்து,
டில்லி முதல் அட்டாரி வரை இயக்கப்பட்ட சம்ஜவுதா ரயிலும்
ரத்து செய்யப்படுகிறது .

இந்த ரயிலில் பயணம் செய்ய இரண்டு பேர் டிக்கெட்
முன்பதிவு செய்திருந்தனர் எனக்கூறப்பட்டுள்ளது.

நாடு திரும்பினார் இந்திய தூதர்

பாகிஸ்தானுக்கான இந்தியத் தூதர், அஜய் பிசாரியா,
நாடு திரும்பினார்.ஜம்மு - காஷ்மீருக்கான சிறப்பு அந்தஸ்து,
நீக்கப்பட்டதை அடுத்து, இந்தியா உடனான தூதரக உறவை
விலக்கி கொள்வதாக, பாக்., அறிவித்தது. இந்தியத் தூதர்
வெளியேறும்படியும் உத்தரவிட்டது.

இந்த முடிவை மறுபரிசீலனை செய்யும்படி, மத்திய அரசு
கூறியது. ஆனால், முடிவை திரும்பப் பெற பாக்., மறுத்தது.
அதையடுத்து, பாகிஸ்தானுக்கான இந்தியத் தூதர்
அஜய் பிசாரியா, இஸ்லாமாபாதில் இருந்து நேற்று இரவு
புறப்பட்டார். துபாய் வழியாக, டில்லிக்கு வந்து சேர்ந்தார்.

இந்தியாவுக்கான பாக்., தூதராக இருந்த, சோஹைல் மஹ்மூத்,
அந்த நாட்டின் வெளியுறவுச் செயலராக நியமிக்கப்பட்டார்.
அதைத் தொடர்ந்து, மொயின் உல் ஹக்கை, புதிய தூதராக பாக்.,
நியமித்திருந்தது. ஆனால், அவரை இந்தியாவுக்கு அனுப்பப்
போவதில்லை என்றும், பாக்., கூறியுள்ளது.
-
----------------------------------
தினமலர்