நிலத்தடி நீர்மட்டத்தை அதிகரிக்க 45,000 தெருக்களில்...மாநகராட்சி நடவடிக்கை உறை கிணறு

சென்னை:
''சென்னையில், நிலத்தடி நீர்மட்டத்தை அதிகரிக்க,
45 ஆயிரம் தெருக்களில், உறை கிணறுகள் அமைக்க
வேண்டும்,'' என, அதிகாரிகளுக்கு, மாநகராட்சி கமிஷனர்,
பிரகாஷ் உத்தரவிட்டுள்ளார்.

சென்னை மாநகராட்சி பகுதிகளில் உள்ள, அனைத்து
வகையான கட்டடங்களிலும், மழைநீர் சேகரிப்பு
கட்டமைப்புகள் ஏற்படுத்த, மாநகராட்சி நடவடிக்கை
எடுத்து வருகிறது. இதற்காக, 200 குழுக்கள் அமைக்கப்பட்டு,
புதிதாக, இரண்டு லட்சம் மழைநீர் சேகரிப்பு கட்டமைப்புகளை
ஏற்படுத்த, ஆய்வு பணிகள் நடைபெறுகின்றன.

இந்த பணிகள் குறித்த ஆலோசனை கூட்டம், மாநகராட்சி
ரிப்பன் மாளிகையில், கமிஷனர் பிரகாஷ் தலைமையில்,
நேற்று நடந்தது. அப்போது, ஆய்வு குழுவினர் தாக்கல் செய்த
அறிக்கையில், 'இதுவரை, 2 லட்சத்து, 468 கட்டடங்களில்,
மழை நீர் சேகரிப்பு கட்டமைப்புகள் குறித்து ஆய்வு செய்யப்
பட்டுள்ளது.

இதில், ஒரு லட்சத்து, 15 ஆயிரத்து, 779 கட்டடங்களில், மழை நீர்
சேகரிப்பு கட்டமைப்புகள் உள்ளன.'34 ஆயிரத்து, 538 கட்டங்களில்,
சிறிய சீரமைப்பு ஏற்படுத்த வேண்டும்.

62 ஆயிரத்து, 151 கட்டடங்களில், புதிதாக மழை நீர் சேகரிப்பு
கட்டமைப்புகள் அமைக்க வேண்டும். மழை நீர் சேகரிப்பு
கட்டமைப்பு சீரமைப்பு மற்றும் புதிதாக அமைப்பதற்கு,
வீட்டின் உரிமையாளர்களுக்கு, ஆலோசனைகளும், அறிவுரைகளும்
வழங்கப்பட்டுள்ளன' என, தெரிவிக்கப்பட்டுள்ளது.

கூட்டத்தில், மாநகராட்சி கமிஷனர் பிரகாஷ் பேசியதாவது:

பருவ மழைக்கு முன், மழை நீர் சேகரிப்பு கட்டமைப்புகளை
ஏற்படுத்த, நடவடிக்கை எடுக்க வேண்டும். சென்னையில்
உள்ள, 45 ஆயிரம் தெருக்களில், மழைநீரை சேகரிக்கும்
வகையில், உறைகிணறுகள் அமைக்க வேண்டும்.

அமைக்கப்படும் இடம், பொதுமக்களுக்கோ, போக்குவரத்திற்கோ
பாதிப்பு ஏற்படாமல் இருக்க வேண்டும். ஆய்வு குழுவினர்,
உறைகிணறுகள் அமைக்க ஏதுவான இடங்களை, தேர்வு செய்து,
மாநகராட்சிக்கு தெரியப்படுத்தலாம்.மாநகராட்சி மழை நீர் வடிகால்
துறையினர், உறை கிணறுகள் அமைக்கும் பணிகளை, பருவ
மழைக்கு முன் முடிக்க வேண்டும்.இவ்வாறு, அவர் பேசினார்
-
-----------------------------
தினமலர்

நடக்குமா? அல்லது கூட்டம் , ஆய்வு குழுவுடன் முடியுமா?