செப்.28-இல் ஐ.நா.சபையில் பிரதமர் மோடி உரை

ஐ.நா. பொதுச் சபையின் வருடாந்திரக் கூட்டத்தில் செப்டம்பர் 28-ஆம் தேதி பிரதமர் நரேந்திர மோடி உரையாற்றவுள்ளார்.

ஐ.நா.பொதுச் சபையின் 74-ஆவது ஆண்டு கூட்டத்தின் பொது விவாதம் செப்டம்பர் 24 ஆம் தேதி முதல் செப்டம்பர் 30 ஆம் தேதி வரை நடைபெறுகிறது. அந்தக் கூட்டத்தில் உரையாற்றவிருக்கும் உலக தலைவர்களின் பெயர் பட்டியலை ஐ.நா. வெளியிட்டுள்ளது. இந்தக் கூட்டத்தில் 112 நாடுகளின் பிரதமர்கள், அதிபர்கள், 48 நாடுகளின் அரசின் தலைவர்கள், 30 நாடுகளின் வெளியுறவுத் துறை அமைச்சர்கள் ஆகியோர் பங்கேற்கவுள்ளனர்.

பொது விவாதத்தின் முதல் நாளில், அமெரிக்க அதிபர் உரையாற்றுவது பாரம்பரியமாக கடைப்பிடிக்கப்பட்டு வருகிறது. அதன்படி, அமெரிக்க அதிபர் டிரம்ப் செப்டம்பர் 24-ஆம் தேதி உரையாற்றவுள்ளார்.

அதற்கடுத்த நாள்களில் பல்வேறு நாடுகளின் தலைவர்கள் உரையாற்றவுள்ளனர். செப்டம்பர் 28-ஆம் தேதி காலை மோடி உரையாற்றவுள்ளார். நீடித்த வளர்ச்சிக்கான 17 இலக்குகள், பருவநிலை மாற்றத்துக்கான பாரீஸ் ஒப்பந்தத்தை செயல்படுத்துவது உள்ளிட்டவை குறித்து மோடி பேசுவார் என்று எதிர்பார்க்கப்படுகிறது.

ஐ.நா. கூட்டத்தில் பங்கேற்பதற்கு முன், அமெரிக்காவின் ஹூஸ்டன் நகரில் வசிக்கும் இந்தியர்களுடன் செப்டம்பர் 22-ஆம் தேதி மோடி உரையாற்றவுள்ளார். இந்தப் பயணத்தின்போது, பல நாடுகளின் தலைவர்களைச் சந்தித்து இந்தியாவுடனான உறவை வலுப்படுத்துவதற்கு பல்வேறு ஒப்பந்தங்கள் மேற்கொள்ளப்பட வாய்ப்புள்ளது.

முன்னதாக, கடந்த 2014-ஆம் ஆண்டு பிரதமராக பதவியேற்ற பின்னர், ஐ.நா.பொது சபையில் முதல்முறையாக மோடி உரையாற்றினார். அதைத் தொடர்ந்து 2015-ஆம் ஆண்டில் ஐ.நா. சபையில் உரையாற்றிய மோடி, நீடித்த வளர்ச்சிக்கான இலக்குகளை உலக நாடுகள் செயல்படுத்துவது குறித்து விவாதித்தார். இந்நிலையில், மக்களவைத் தேர்தலில் அமோக வெற்றி பெற்று

பிரதமராக மீண்டும் பதவியேற்ற பின்னர், ஐ.நா.சபையில் மோடி உரையாற்றவிருக்கும் முதல் கூட்டம் இதுவாகும்.

தினமணி