தேனி அருகே பெண்கள் நுழையாத கோயிலில் 6 ஆயிரம் ஆண்களுக்கு அன்னதானம்

-
தேனி :
தேனி அருகே பூதிப்புரம் கிராமத்தில் பெண்கள் நுழையாத
ஊர்காலப்பன் கோயிலில் ஆடி அமாவாசையை முன்னிட்டு
நேற்று நடந்த சைவ அன்னதானத்தில் 6 ஆயிரம் ஆண்கள்
பங்கேற்றனர்.

தேனி அருகே பூதிப்புரத்தில் உள்ளது ஊர்காலப்பன் கோயில்.
இந்த கோயிலில் ஒரு மாத குழந்தையில் இருந்து நூறு வயதை
தாண்டி மூதாட்டி வரை எந்த வயது பெண்களாக இருந்தாலும்
உள்ளே நுழைய மாட்டார்கள்.

ஆண்கள் மட்டுமே கோயிலுக்குள் சென்று வழிபாடு நடத்துவார்கள்.
இங்கு கிடா வெட்டி விருந்து வைத்தாலோ, பொங்கல் வைத்து
அன்னதானம் வழங்கினாலோ அத்தனையும் கோயிலுக்குள்ளேயே
முடித்து விட வேண்டும். கோயில் திருநீரை கூட வீட்டிற்கு கொண்டு செல்லக்கூடாது.

சாப்பாடு, பிரசாதம் என எதுவும் கோயில் வாசலை தாண்டி
வெளியே வரக்கூடாது. கோயிலுக்குள் அமர்ந்து எவ்வளவு
வேண்டுமானாலும் சாப்பிடலாம்.

இப்படி விநோத பழக்கம் உள்ள இந்த ஊர்காலப்பன் கோயிலில்
நேற்று ஆடி அமாவாசையை முன்னிட்டு சைவ அன்னதானம்
நடந்தது. பூதிப்புரம், கோடாங்கிபட்டி, மஞ்சநாயக்கன்பட்டி,
மாரியம்மன்கோயில்பட்டி, கெப்புரெங்கன்பட்டி, ஆதிபட்டி,
வலையபட்டி உள்ளிட்ட சுற்றுக்கிராமங்களை சேர்ந்த
6 ஆயிரத்திற்கும் மேற்பட்ட ஆண்கள் அன்னதானத்தில்
பங்கேற்றனர்.

காலை 7 மணிக்கு தொடங்கிய அன்னதானம் மாலை வரை
நடைபெற்றது. கோயில் பூசாரி செந்தில்குமார் கூறியதாவது:

எந்த சூழலிலும் எந்த வயது பெண்களும் இந்த கோயில்
இருக்கும் பாதையில் கூட நடக்க மாட்டார்கள். அப்போது
கோயில் குடியிருப்பு பகுதிக்கு வெளியே இருந்தது.

இதனால் பெண்கள் இந்த பக்கமே வரமாட்டார்கள்.
கோயில் சாமி சுற்றி வரும் போதும், கோயில் மாடு உலா வரும்
போது முன்பாகவே அறிவிப்போம்.

பெண்கள் கதவை பூட்டி வீட்டிற்குள் இருந்து கொள்வார்கள்.
சாமி கண்ணில் பட மாட்டார்கள். தற்போது கோயில் அருகில்
உள்ள பகுதியிலும் குடியிருப்புகள் வந்து விட்டன.

இருப்பினும் கோயில் அருகே உள்ள ரோட்டில் மட்டும் பெண்கள்
நடந்து செல்வார்கள். கோயில் பக்கம் திரும்பிக்கூட பார்க்க
மாட்டார்கள். இக்கிராமத்தை சுற்றி உள்ள நிலங்கள் அனைத்தையும்
‘ஊர்காலப்பன் பூமி’ என்றே அழைப்பார்கள்.

இவரை வழிபட்ட பின்னரே விதைப்பு, அறுவடை பணிகளை
மேற்கொள்வார்கள். ஒவ்வொரு அமாவாசை, பவுர்ணமியின்
போதும், வாரந்தோறும் சனிக்கிழமையும் சிறப்பு பூஜை,
வழிபாடு, அன்னதானம் நடக்கும்.

3 ஆண்டுகளுக்கு ஒருமுறை திருவிழா நடக்கும் என்று அவர் கூறினார்.
-
தினகரன்

சபரி மலையில் பெண்கள் நுழையலாம் என்று சட்டம் கொண்டுவந்த மாதிரி,
இங்கும் நடக்குமோ?

ரமணியன்