அரசு விழாக்களில்தி.மு.க. எம்.எல்.ஏ.க்களுக்கு ஏன் அழைப்பு விடுக்கவில்லை?மு.க.ஸ்டாலின் கேள்வி

சென்னை,

சட்டசபையில் நேற்று, பூஜ்ஜிய நேரத்தில், தி.மு.க. உறுப்பினர் ஆஸ்டின், அரசு நிகழ்ச்சிகளில் தி.மு.க. எம்.எல்.ஏ.க்களை அழைப்பது தொடர்பாக அரசின் கவனத்தை ஈர்த்து பேச முயன்றார். ஆனால் அவருக்கு வாய்ப்பு வழங்கப்படவில்லை. இருப்பினும் தொடர்ந்து எழுந்து நின்று தன்னை பேச அனுமதிக்கும்படி கேட்டுக்கொண்டே இருந்தார்.

இந்த நேரத்தில் எதிர்க்கட்சித்தலைவர் மு.க.ஸ்டாலின் எழுந்து, பேசினார். அப்போது நடந்த விவாதம் வருமாறு:-

மு.க.ஸ்டாலின் (தி.மு.க.):- மாவட்டங்களில் நடக்கும் அரசு நிகழ்ச்சிக்கு தி.மு.க. உறுப்பினர்கள் அழைக்கப்படுவதில்லை என்பது தொடர்பாக எங்கள் உறுப்பினர் ஆஸ்டின் பேச அனுமதி கேட்டுள்ளார். இது தொடர்பாக அவர் கொண்டு வந்த உரிமை மீறல் நோட்டீஸ் பற்றி கேட்க விரும்புகிறார்.

சபாநாயகர்:- அவர் உரிமை மீறல் கடிதம் கொடுத்து இருக்கிறார். நான் இது குறித்து கலெக்டரிடம் விளக்கம் கேட்டு இருக்கிறேன். விளக்கம் வந்த பிறகு இது குறித்து பதிலை தெரிவிக்கிறேன்.

எல்லா தொகுதிகளிலும்...

மு.க.ஸ்டாலின்:-இது கன்னியாகுமரி மாவட்டத்தில் மட்டுமல்ல, தி.மு.க. உறுப்பினர்கள் உள்ள அனைத்து தொகுதிகளிலும் இதுபோன்றுதான் நடக்கிறது.

துணை முதல்-அமைச்சர்:- தேனி மாவட்டத்தில் நடந்த அரசு விழாவில் பெரியகுளம் எம்.எல்.ஏ.வுக்கு அழைப்பு விடுக்கப்பட்டு, அவர் கலந்து கொண்டு இருக்கிறார். சில மாவட்டங்களில் இதுபோன்ற பிரச்சினை இருந்தால் அதனை முறையாக சொல்லுங்கள். வரும் காலங்களில் அனைவருக்கும் அழைப்பு அனுப்ப நடவடிக்கை எடுக்கப்படும்.

மு.க.ஸ்டாலின்:- முதல்- அமைச்சர் தலைமையில் சேலத்தில் நடந்த விழாவில் கூட எங்கள் உறுப்பினர்கள் கலந்து கொண்டு இருக்கிறார்கள். முதல்-அமைச்சர், துணை முதல்-அமைச்சர் மாவட்டங் களை தவிர மற்ற பகுதிகளில் எங்கள் உறுப்பினர்களுக்கு முறையாக அழைப்பு விடுக்கப்படவில்லை. அதை தான் நான் கேட்கிறேன். கரூர் மாவட்டத்தில் நடந்த விழாவில் எங்கள் உறுப்பினர் அழைக்கப்படவில்லை.

ஒகி புயல்

அமைச்சர் தங்கமணி:-தி.மு.க. உறுப்பினர்களை எல்லாவற்றிற்கும் அழைக்கிறோம். கன்னியாகுமரியில் ஒகி புயல் வந்தபோது, நாங்கள் அங்கே முகாமிட்டு பணிகளை விரைவுபடுத்தி கொண்டிருந்தோம். உங்கள் உறுப்பினர்களுக்கும் அழைப்பு விடுத்தோம். ஒருநாள் வந்தார்கள். அதன் பிறகு ஒவ்வொரு நாளும் அழைப்பு விடுத்தோம். ஆனால் ஒரு நாளைக்கு பிறகு அவர்கள் வரவே இல்லை.

சபாநாயகர்:-
இந்த விவகாரம் தொடர்பாக மாவட்ட கலெக்டர்களுக்கு தெரியப்படுத்தப்படும்.
வரும் காலங்களில் அரசு விழாக்களுக்கு அந்தந்த மாவட்டத்தை சேர்ந்த உறுப்பினர்களுக்கு அழைப்பு விடுக்கப்படும்.

இவ்வாறு விவாதம் நடந்தது.
-
தினத்தந்தி