மத்திய அரசு அனுமதி அளித்துள்ள நியூட்ரினோ திட்டத்துக்கு எதிர்ப்பு

-

தேனி,

தேனி மாவட்டம் தேவாரம் அருகே பொட்டிப்புரம்
ஊராட்சிக்கு உட்பட்ட டி.புதுக்கோட்டை கிராமத்தில் உள்ள
அம்பரப்பர் மலையில் ரூ.1,500 கோடி செலவில் நியூட்ரினோ
ஆய்வு மையம் அமைக்கப்பட உள்ளது. இந்திய அணுசக்தி
ஆணையமும், இந்திய அறிவியல் மற்றும் தொழில்நுட்பத்
துறையும் இணைந்து இந்த ஆய்வை மேற்கொள்ள உள்ளது.

நியூட்ரினோ ஆய்வில் வெற்றி பெற்றால் பிரபஞ்சம் எப்படி
உருவானது? என்பதை கண்டறிய வாய்ப்பு இருப்பதாகவும்,
எக்ஸ்ரேயை விட ஆயிரம் மடங்கு பயனை பெற முடியும்
என்றும் விஞ்ஞானிகள் கூறுகின்றனர். பூமி அதிர்ச்சி,
எரிமலை உருவாதல், சுனாமி போன்ற நிகழ்வுகளை
முன்கூட்டியே அறிந்துகொள்ள வேண்டியது அவசியமாகிறது.

அதற்கு இந்த ஆராய்ச்சி பலன் அளிக்கும் என்பதும்
விஞ்ஞானிகளின் கருத்து.

எதிர்ப்பு

அதே நேரத்தில் இந்த திட்டத்துக்கு விவசாயிகள், இயற்கை
ஆர்வலர்கள் மத்தியில் கடும் எதிர்ப்பு கிளம்பி உள்ளது.
பாறைகளை வெடிவைத்து தகர்க்கும் போது சுற்றுச்சூழல்
பாதிப்பு ஏற்படும் என்றும், விளை நிலங்கள் பாதிக்கப்படும்
என்றெல்லாம் கூறி விவசாயிகள் எதிர்ப்பு தெரிவித்து
வருகின்றனர்.

பசுமைத் தீர்ப்பாயம் இந்த திட்டத்துக்கு மத்திய வனம் மற்றும்
சுற்றுச்சூழல் துறை வழங்கிய அனுமதியை ரத்து செய்து
2 ஆண்டுகளுக்கு முன்பு உத்தரவிட்டது.

இந்நிலையில், இந்த
ஆய்வு திட்டத்தை செயல்படுத்த மத்திய அரசு மீண்டும் உறுதி
அளித்துள்ளது.

நாடாளுமன்ற மாநிலங்களவையில் இதுதொடர்பான கேள்விக்கு
மத்திய மந்திரி ஜிதேந்திரசிங் எழுத்துப்பூர்வமாக அளித்த பதிலில்,
‘நியூட்ரினோ ஆய்வு மையம் அமைக்க மத்திய அரசு ஒப்புதல்
அளித்துள்ளது. இந்த ஆய்வகத்தால் சுற்றுச்சூழலுக்கு எந்த
பாதிப்பும் ஏற்படாது. எந்த கதிர்வீச்சு அபாயமும் ஏற்படாது’
என்று கூறியுள்ளார்.

போராட்டம்

இந்த திட்டத்தை கைவிட வேண்டும் என்று விவசாயிகள்
வலியுறுத்தி வரும் நிலையில், இதை செயல்படுத்த மத்திய
அரசு உறுதியாக உள்ளது. இது விவசாயிகள் மத்தியில்
கொந்தளிப்பை ஏற்படுத்தி இருக்கிறது.

இந்த திட்டத்தை ரத்து செய்யக்கோரி போராட்டத்தில்
ஈடுபட போவதாக தேனி மாவட்ட விவசாயிகள், பொதுமக்கள்
அறிவித்துள்ளனர்.
-
-----------------------------
தினத்தந்தி

மாநில அரசுடன் கலந்து பேசாமல் ஹைட்ரோ கார்பன் திட்டத்திற்கு
மத்திய அரசு அனுமதி வழங்கியுள்ளது; நாராயணசாமி குற்றச்சாட்டு
-

-
புதுச்சேரி,

புதுவை-காரைக்காலில் ஹைட்ரோ கார்பன் திட்டத்தை ரத்து செய்ய வேண்டும், மத்திய அரசு சுற்றுச்சூழல் துறை வேதாந்தா நிறுவனத்திற்கு வழங்கியுள்ள அனுமதியை ரத்து செய்ய வேண்டும் என்பது உள்பட பல்வேறு கோரிக்கைகளை வலியுறுத்தி புதுவையில் காங்கிரஸ்-தி.மு.க. மற்றும் கூட்டணி கட்சிகள் சார்பில் வருகிற 16-ந் தேதி மனித சங்கிலி போராட்டம் நடைபெற உள்ளது.


இது தொடர்பாக பொதுமக்களிடம் விழிப்புணர்வு ஏற்படுத்தும் வகையில் பிரசார பயணம் நேற்று நடைபெற்றது. இதன் தொடக்க நிகழ்ச்சி சோனாம்பாளையத்தில் நடந்தது. நிகழ்ச்சியில் முதல்-அமைச்சர் நாராயணசாமி கலந்து கொண்டு பிரசார பயணத்தை தொடங்கி வைத்து பேசினார். அப்போது அவர் கூறியதாவது:-

மத்திய அரசு தன்னிச்சையாக முடிவு செய்து புதுவை மாநில அரசுடன் கலந்து பேசாமல் புதுவை, காரைக்காலில் 112 இடங்களில் ஹைட்ரோ கார்பன் திட்டம் தொடர்பாக அகழ்வாராய்ச்சி நடத்த வேதாந்தா நிறுவனத்திற்கு அனுமதி வழங்கியுள்ளது. இது தொடர்பாக புதுவை அரசுக்கு கடந்த 2 மாதங்களுக்கு முன்பு கடிதம் அனுப்பியுள்ளது. இதனை தொடர்ந்து நான் பிரதமர் நரேந்திர மோடிக்கும், மத்திய பெட்ரோலிய துறை மந்திரிக்கும் புதுவை மாநிலத்தில் ஹைட்ரோ கார்பன் எடுக்கும் திட்டத்தை கைவிட வேண்டும் என்று கடிதம் அனுப்பி உள்ளேன்.

ஆனால் மத்திய அரசிடம் இருந்து இதுவரை எனக்கு எந்த விதமான பதிலும் வரவில்லை. புதுவையில் ஹைட்ரோ கார்பன் திட்டத்தை கடல் பகுதியின் செயல்படுத்தும்போது மீனவர்களின் வாழ்வாதாரம் பாதிக்கும். நிலப்பகுதியில் செயல்படுத்தும் போது விவசாயிகளின் வாழ்வாதாரம் பாதிக்கும். எனவே இந்த திட்டத்தை கைவிடக்கோரி மாநில மக்களின் எதிர்ப்பை காட்டும் வகையில் வருகிற 16-ந் தேதி காங்கிரஸ் கூட்டணி கட்சிகள் சார்பில் மனித சங்கிலி போராட்டம் நடைபெற உள்ளது.

இந்த திட்டம் தொடர்பாக கடந்த 2 ஆண்டுகளுக்கு முன்பு சட்டசபையில் எம்.எல்.ஏ.க்கள் பிரச்சினை எழுப்பினர். அப்போது புதுவை மாநிலத்தில் மக்கள் நலனை பாதிக்கும் எந்த ஒரு திட்டத்திற்கும் மாநில அரசு அனுமதி வழங்காது என்று நான் உறுதி அளித்தேன். ஆனால் தற்போது அந்த திட்டத்தை மாநில அரசின் அனுமதி இல்லாமலேயே செயல்படுத்த மத்திய அரசு அனுமதி வழங்கியுள்ளது.

இந்த திட்டத்திற்கு எதிராக எந்த விதமான போராட்டம் நடத்தவும் காங்கிரஸ் மற்றும் கூட்டணி கட்சி தலைவர்கள் தயாராக உள்ளோம். எனவே மத்திய அரசு இந்த திட்டத்தை கைவிட வேண்டும். நான் டெல்லி சென்றபோது மத்திய பெட்ரோலிய துறை மந்திரியை சந்திக்க நேரம் கேட்டிருந்தேன். ஆனால் நேரம் ஒதுக்கி தரவில்லை. எனவே அவரை சந்திக்க முடியவில்லை.

இவ்வாறு அவர் கூறினார்.

தினத்தந்தி

எதிர்ப்பது மட்டும் எதிர்க்கட்சி அல்ல.நல்லதை ஆதரிக்க வேண்டும்.
ஆனால்...............

ஹைட்ரொகார்பன், ஆயில் கழிவுகளால் பாழடைந்த நைஜீரிய டெல்டா ஆற்றுப் படுக்கைகளை/பகுதிகளை துப்பரவு செய்ய 30-40 ஆண்டுகள் ஆகும் என்கிறார்கள் மீண்டும் பயன்படும் நிலமாக மாறுமா என ஐயம் தெரிவிக்கிறார்கள்.ஆயில் ஆய்வுகளை நடத்தி முடித்துவிட்டு சத்தமில்லாமல் வெளியேறிய Shell நிறுவனம்.
(UN/ Amnesty)





ஒவ்வொரு வினாடியும் நமது உடலை கோடிக்கணக்கான நியூட்ரினோ துகள்கள் முத்தமிட்டு செல்கின்றன. அவற்றால் பாதிப்போ அல்லது ரேடியோ ஆக்டிவோ கிடையாது.
ஆனால் நியூட்ரினோ திட்டத்தால் சுற்றுச்சூழல் பாதிக்காமல் இயற்கை வளங்கள் அழியாமல் பார்த்துக்கொள்ள வேண்டும்.