பாகிஸ்தான் வான் பகுதி மூடல்: இந்திய விமான நிறுவனங்களுக்கு இழப்பு

பாகிஸ்தான் வான் பகுதி மூடப்பட்டதன் எதிரொலியாக,
இந்தியாவை சேர்ந்த ஏர் இந்தியா உள்ளிட்ட அனைத்து
விமான நிறுவனங்களும் தொடர்ந்து இழப்பைச் சந்தித்து
வருகின்றன.

இதுகுறித்து மக்களவையில் எழுப்பப்பட்ட கேள்விக்கு
மத்திய விமானப் போக்குவரத்து துறை அமைச்சர்
ஹர்தீப் சிங் புரி எழுத்துப்பூர்வமாக அளித்துள்ள பதிலில்
தெரிவிக்கப்பட்டிருப்பதாவது:

புல்வாமா பயங்கரவாதத் தாக்குதல் சம்பவத்துக்குப்
பதிலடியாக, பாகிஸ்தானின் பாலாகோட்டில் இந்திய விமானப்படை
விமானங்கள் கடந்த பிப்ரவரி மாதம் 26-ஆம் தேதி தாக்குதல் நடத்தின.

இதையடுத்து பாகிஸ்தான் வான் பகுதியில் இந்திய விமானங்கள்
பறப்பதற்கு அந்நாட்டு அரசு தடை விதித்தது. பாகிஸ்தான் வான்
பகுதியில் 11 பாதைகளை இந்திய விமானங்கள், தங்களது பயணத்துக்கு
முன்பு பயன்படுத்தின.

பாகிஸ்தானின் தடை காரணமாக, அந்தப் பாதை வழியே இந்திய
விமானங்கள் பயணிக்க முடியாத நிலை ஏற்பட்டது.

இதனிடையே, பாகிஸ்தான் வான் பகுதியில் உள்ள 11 பாதைகளில்
2 பாதைகளை மட்டும் இந்திய விமான நிறுவனங்களுக்கு
பாகிஸ்தான் அண்மையில் திறந்து விட்டது.

அந்த 2 பாதைகளும், பாகிஸ்தானின் தெற்கு பகுதியில் உள்ளவை
ஆகும். பிற பாதைகளில் பயணிக்க இந்திய விமானங்களுக்கு
விதிக்கப்பட்ட தடை இன்னமும் தொடர்கிறது. இதன் காரணமாக,
பாகிஸ்தான் வான் பகுதியில் உள்ள 9 பாதைகளை தனது
போக்குவரத்துக்கு பயன்படுத்த முடியாத நிலை இந்திய
விமானங்களுக்கு ஏற்பட்டுள்ளது. எனவே, ஐரோப்பிய நாடுகள்,
அமெரிக்கா ஆகியவற்றுக்குச் செல்லும் இந்திய விமானங்கள்
தங்களது பாதைகளை மாற்றிக் கொண்டு பயணித்து வருகின்றன.

ஏர் இந்தியா நிறுவனம், சில சர்வதேச விமானங்களை ரத்து செய்து
விட்டது.

இந்தியாவில் உள்நாட்டு போக்குவரத்தில் மிகப்பெரிய விமான
நிறுவனமாக திகழும் இன்டிகோ, பாகிஸ்தானின் நடவடிக்கையால்,
தில்லியில் இருந்து துருக்கி தலைநகர் இஸ்தான்புல் நகரத்துக்கு
நேரடி விமானத்தை இயக்க முடியாத நிலை ஏற்பட்டுள்ளது.

இந்நிலை காரணமாக, பொதுத் துறை நிறுவனமான
ஏர் இந்தியா விமான நிறுவனத்துக்கு ஜூலை மாதம் 2-ஆம் தேதி
வரையிலும் ரூ.491 கோடி நஷ்டம் ஏற்பட்டுள்ளது. தனியார் விமான
நிறுவனங்களான ஸ்பைஸ் ஜெட்டுக்கு ரூ.30.73 கோடியும்,
இன்டிகோவுக்கு ரூ.25.1 கோடியும், கோ ஏர் நிறுவனத்துக்கு
ரூ.2.1 கோடியும் நஷ்டம் ஏற்பட்டுள்ளது.

இந்திய விமானங்களுக்கு வான் பகுதியில் பறப்பதற்கு தடை
விதிக்கும் முடிவை பாகிஸ்தான் தன்னிச்சையாகவே எடுத்தது.
ஆதலால் அதன்மீது அடுத்தக்கட்ட முடிவையும் பாகிஸ்தான்
அரசுதான் எடுக்க வேண்டும் என்று அந்தப் பதிலில்
ஹர்தீப் சிங் புரி குறிப்பிட்டுள்ளார்.
-
------------------------------------
தினமணி