சூடுபிடிக்கிறது மாநிலங்களவைத் தேர்தல்!

மாநிலங்களவை உறுப்பினர் பதவிகளைப் பெறுவதற்கு
திமுகவினர் இடையே கடும் போட்டி நிலவி வருகிறது.
இதன் காரணமாகவே, காங்கிரஸுக்கு மாநிலங்களவை
இடம் ஒதுக்கப்படுமா என்கிற கேள்வி திமுகவில்
எழுந்திருக்கிறது.

மாநிலங்களவை உறுப்பினர் பதவியைப் பெறுவதற்கு
அதிமுகவிலும் 50-க்கும் மேற்பட்டோர் முயற்சி செய்து
வருகின்றனர். அதிமுகவின் சார்பில் மாநிலங்களவை
உறுப்பினர்களாக இருக்கும் டி.ரத்தினவேல், மைத்ரேயன்,
கே.ஆர்.அர்ஜுனன், ஆர்.லஷ்மணன், அதிமுகவின்
ஆதரவுடன் தேர்ந்தெடுக்கப்பட்ட இந்திய கம்யூனிஸ்ட்
கட்சியின் தேசியச் செயலாளர் டி.ராஜா ஆகிய 5 பேரின்
பதவிக்காலம் ஜூலை 24-ஆம் தேதியுடன் முடிவடைய
உள்ளது.

திமுகவின் சார்பில் மாநிலங்களவை உறுப்பினராக
இருந்த கனிமொழி, தூத்துக்குடி தொகுதியில்
போட்டியிட்டு வெற்றிபெற்று மக்களவை
உறுப்பினராகியுள்ளார். தமிழகத்தில் காலியாகும்
இந்த 6 இடங்களுக்கான தேர்தல் ஜூலை 18-ஆம் தேதி
நடைபெற உள்ளது.

ஒரு மாநிலங்களவை உறுப்பினர் பதவியைப் பெறுவதற்கு
34 சட்டப்பேரவை உறுப்பினர்களின் வாக்குகள் தேவைப்படும்.
இதில், 34 உறுப்பினர்கள் கட்டாயம் இருக்க வேண்டும்
என்கிற அவசியம் இல்லை. ஓரிரு வாக்குகள் குறைந்தாலும்
மாநிலங்களவை உறுப்பினர்களாகத் தேர்ந்தெடுக்கப்பட்டு
விடுவர்.

அதன் அடிப்படையில் தமிழகத்தில் பேரவைத் தலைவருடன்
அதிமுகவின் பலம் 123-ஆக உள்ளது. திமுகவின் பலம்
காங்கிரஸ் முஸ்லிம் லீக் உறுப்பினர்களையும் சேர்த்து 108-
ஆக உள்ளது. இதனால், அதிமுக, திமுக ஆகிய இரு கட்சிகளுமே
தலா மூன்று மாநிலங்களவை உறுப்பினர்களைப் பெறுவதற்கான
வாய்ப்பு இருக்கிறது.

மாநிலங்களவைத் தேர்தலைப் பொருத்தவரை மட்டும்
அதிமுகவும் திமுகவும் போட்டியில்லாமல் ஒருங்கிணைந்து
செயல்படுவது என்பது கடந்த காலங்களில் இருந்து தொடர்ந்து
வரும் ஆரோக்கியமான அரசியலாகவே இருந்து வந்துள்ளது.

அந்த அடிப்படையில் இப்போதும் எந்தவித பிரச்னையும்
இல்லாமல் இரு கட்சிகளும் தலா 3 மாநிலங்களவை
உறுப்பினர்களைப் பெறப் போகின்றன.

ஆனால், இந்த 3 இடங்களையும் யார் யாருக்கு கொடுப்பது
என்பது குறித்துதான் இரு கட்சிகளுமே திணறிக்
கொண்டிருக்கின்றன.

மதிமுகவின் பொதுச்செயலாளர் வைகோவுக்கு ஒரு
மாநிலங்களவை உறுப்பினர் பதவியைத் தருவதாக மக்களவைத்
தேர்தலின்போது மு.க.ஸ்டாலின் உறுதியளித்து, அதற்கான
உடன்பாட்டு ஒப்பந்தத்திலும் கையெழுத்திட்டுள்ளனர்.

அதனால், மதிமுகவுக்கு ஓர் இடத்தைக் கொடுத்தது போக
மீதம் இரண்டு இடங்கள் இருக்கின்றன.

காங்கிரஸுக்கு மறுப்பு:
முன்னாள் பிரதமர் மன்மோகன் சிங்குக்காக திமுகவிடம்
மாநிலங்களவை உறுப்பினர் பதவி ஒன்றை காங்கிரஸின்
அகில இந்திய தலைமை கேட்டிருந்தது.

காங்கிரஸ் ஆளும் மாநிலங்களில் இருந்துகூட, தற்போது
காங்கிரஸால் ஒரு மாநிலங்களவை உறுப்பினரைப் பெற
முடியாத இக்கட்டான சூழல் இருப்பதாலேயே திமுகவைக்
கடைசியாக காங்கிரஸ் நாடியிருந்தது.

ஆனால், மக்களவைத் தேர்தலில் தமிழகத்தில் காங்கிரஸுக்கு
9 இடங்கள் ஒதுக்கிய தொடர்பாகவே திமுகவிற்குள்
விமர்சனங்கள் எழுந்து, விவாதிக்கப்பட்டு வருகிறது.

அதனால், மன்மோகன் சிங்குக்கு மாநிலங்களவை உறுப்பினர்
பதவியைக் கொடுக்க திமுக மறுப்பதாகத் தெரிகிறது.

தேனி தொகுதியில் போட்டியிட்டு, தோல்வியடைந்த
ஈ.வி.கே.எஸ்.இளங்கோவனுக்கும் மாநிலங்களவை
உறுப்பினர் பதவியைப் பெறுவதற்கான முயற்சிகள்
மேற்கொள்ளப்பட்டன.

அதற்கும் திமுக மறுப்பு தெரிவித்துவிட்டது. அதனால்,
மீதமுள்ள 2 மாநிலங்களவை உறுப்பினர் பதவிகளுக்கும்
திமுகவினரே தேர்ந்தெடுக்கப்பட உள்ளனர்.

இந்த 2 பதவிகளைப் பெறுவதற்காக திமுகவில் பலத்த
போட்டி ஏற்பட்டுள்ளது. துணைப் பொதுச்செயலாளர்
வி.பி.துரைசாமி, தொமுச பேரவை பொதுச்செயலாளர்
சண்முகம், வழக்குரைஞர் வில்சன், நாடாளுமன்ற முன்னாள்
உறுப்பினர் ஏ.கே.எஸ்.விஜயன் என இந்தப் பட்டியல்
நீண்டுகொண்டே இருக்கிறது.

இதில், யாரை மு.க.ஸ்டாலின் தேர்ந்தெடுக்கப் போகிறார்
எனத் தெரியவில்லை. மருமகன் சபரீசனை மாநிலங்களவை
உறுப்பினராக்கும் முடிவில் மு.க.ஸ்டாலின் இருப்பதாக
திமுகவிலேயே சிலர் தெரிவிக்கின்றனர்.

கருணாநிதிக்கு, அவரது பிரதிநிதியாக மருமகன் முரசொலி
மாறன் தில்லியின் செயல்பட்டது போல, தனக்கும் மருமகன்
சபரீசன் செயல்பட வேண்டும் என்று மு.க. ஸ்டாலினின்
விழைவதாகவும் திமுக வட்டாரத்தில் பேச்சு அடிபடுகிறது.

இதன் காரணமாகத்தான் திமுகவின் இளைஞரணிச்
செயலாளராக உதயநிதி ஸ்டாலினை கொண்டு வருவதில்
தாமதம் ஏற்படுகிறது என்கின்றனர்.

இருவரையும் ஒரே நேரத்தில் கொண்டு வந்தால், அது
விமர்சனத்துக்கு உள்ளாகும் என்பதால் முதலில் சபரீசன்
மாநிலங்களவை உறுப்பினராக்கப்பட உள்ளார்.

அடுத்த கட்டமாக, உதயநிதி ஸ்டாலின் இளைஞரணித்
தலைவராக நியமிக்கப்படுவார் என்கிறது விவரம் தெரிந்த
திமுக வட்டாரம்.

அதிமுகவில் கடும் போட்டி: திமுகவைப் போல
அதிமுகவுக்கும் 3 மாநிலங்களவை உறுப்பினர்கள் கிடைக்க
உள்ளனர். இதில் ஓரிடத்தை பாமகவுக்குத் தருவாக
அதிமுக மக்களவைத் தேர்தலின்போதே உறுதியளித்து
விட்டது.

ஆனால், இப்போது அதிமுகவின் முக்கியப் பிரமுகர்கள்
பலர் மாநிலங்களை உறுப்பினர் பதவியில் கோருகிறார்கள்.
இதனால், பாமகவுக்கு ஓரிடத்தை அதிமுக கொடுக்குமா
என்கிற கேள்வியும் எழுப்பப்பட்டு வருகிறது.

இதனால், உடனடியாக ஒரு முடிவுக்கு வர முடியாத சூழலில்
தான் அதிமுக தலைமையும் இருந்து வருகிறது. உள்ளாட்சித்
தேர்தல் வர இருக்கும் நிலையில், கூட்டணி பலவீனப்படுவதை
அதிமுக தலைமை விரும்பவில்லை என்பதால், பாமகவுக்கு
ஓர் இடம் ஒதுக்கப்படலாம் என்று தெரிகிறது.
-
--------------------------
தினமணி