22 மாவட்டங்களில் நிலத்தடி நீர்மட்டம் சரிந்தது

-

-


சென்னை:தமிழகத்தில், மே மாத நிலவரப்படி, 22 மாவட்டங்களில்,
நிலத்தடி நீர்மட்டம், 15 அடி வரை குறைந்துள்ளதாக, மத்திய
நிலத்தடி நீர் ஆய்வுத் துறை தெரிவித்துள்ளது.

தமிழகத்தில் மாவட்ட வாரியாக, நிலத்தடி நீர்மட்ட நிலவரம்
குறித்து, மத்திய நிலத்தடி நீர் ஆய்வுத் துறை, மாதந்தோறும்,
அரசுக்கு அறிக்கை அளித்து வருகிறது. மே மாத நிலவர அறிக்கை,
தற்போது வெளியாகி உள்ளது.

நிலத்தின் தரைமட்டத்தில் இருந்து, கிணறுகளில் நீர்மட்டம்,
2018 மே மாதம் எத்தனை மீட்டர் ஆழத்தில் இருந்தது; இந்தாண்டு
மே மாதம் எத்தனை மீட்டர் ஆழத்தில் உள்ளது என, ஒப்பிடப்பட்டுள்ளது.

இதன்படி, தமிழகத்தில், 22 மாவட்டங்களில், நிலத்தடி நீர்மட்டம்
வெகுவாக சரிந்துள்ளது தெரிய வந்துள்ளது. அதிகபட்சமாக,
பெரம்பலுாரில், 4.65 மீட்டர், அதாவது, 15 அடிக்கு நிலத்தடி நீர்மட்டம்
குறைந்துள்ளது. அடுத்ததாக, திருவண்ணாமலையில், 14 அடி;
வேலுாரில், 12 அடி வரை நீர்மட்டம் குறைந்துள்ளது.
-
-------------------------------

வேலுார், தர்மபுரி, விழுப்புரம், திருவாரூர் ஆகிய மாவட்டங்களில்,
9 அடி வரையும்; காஞ்சிபுரம், கிருஷ்ணகிரி, நாமக்கல், அரியலுார்,
விருதுநகர், நீலகிரி மாவட்டங்களில், 6 அடி வரையும்; பிற
மாவட்டங்களில், 3 அடிக்குள்ளும், நிலத்தடி நீர்மட்டம் குறைந்து உள்ளது.

நாகை, திருச்சி, ஈரோடு, கோவை, திருப்பூர், திண்டுக்கல், மதுரை,
ராமநாதபுரம், தேனி மாவட்டங்களில் மட்டும், நிலத்தடி நீர்மட்டம் சற்று
உயர்ந்துள்ளதாக, ஆய்வறிக்கையில் கூறப்பட்டுஉள்ளது.

சென்னையில் நீர்மட்டம் கடும் சரிவு எங்கெங்கே?

சென்னையில் மழைநீர் சேகரிப்பு கட்டமைப்புகளை முறையாக
பராமரிக்காதது, நீர்நிலைகள் பராமரிப்பில் அரசு கோட்டை விட்டது
போன்ற காரணங்களால், நிலத்தடி நீர்மட்டம், முன் எப்போதும் இல்லாத
அளவிற்கு, கடும் சரிவை சந்தித்துள்ளது.

சென்னையில், ஒரு கடுமையான தண்ணீர் பஞ்சத்திற்கு பின், அனைத்து
வீடுகளிலும் மழைநீர் சேகரிப்பு திட்டத்தை செயல்படுத்த, 2001ல் முதல்வராக
இருந்த ஜெயலலிதா, அதிரடி உத்தரவு பிறப்பித்தார்.அப்போது, மழைநீர்
சேகரிப்பு அமைப்பை, சம்பந்தப்பட்ட அதிகாரிகள், தீவிரமாக கண்காணித்தனர்.

இதன் பயனாக, அடுத்த மூன்றாண்டுகளில், சென்னையின் நிலத்தடி நீர்மட்டம்
வெகுவாக உயர்ந்தது.சில ஆண்டுகளில், அதிகாரிகள் மட்டுமின்றி, சென்னை
வாசிகளும், இந்த அற்புத திட்டத்தை மறந்தனர். தற்போது, பழைய வீடுகள்
மட்டுமின்றி, புதிய குடியிருப்புகளில் கூட, மழைநீர் சேகரிப்பு கட்டமைப்புகளை
ஏற்படுத்துவதில்லை.

அதை கண்காணிக்க வேண்டிய, சி.எம்.டி.ஏ., மாநகராட்சி, குடிநீர் வாரிய
அதிகாரிகளும், 'கவனிப்பு' பெற்று, அமைதி காக்கின்றனர். இதன் விளைவே,
மழை பெய்யும் போது, நீரை வீணாக்கி, தற்போது கொளுத்தும் கோடையில்
தண்ணீருக்கு சென்னைவாசிகள் தவிக்கின்றனர்.

சென்னையில், அனைத்து மண்டலங்களிலும், நிலத்தடி நீர்மட்டம், கடுமையான
சரிவை சந்தித்துள்ளது. சராசரியாக, 25 அடி ஆழத்திற்கு சென்றுவிட்டது.
அதிகபட்சமாக, அம்பத்துார் மண்டலத்தில், 33 அடி ஆழத்திற்கு, நிலத்தடி
நீர்மட்டம் குறைந்துவிட்டது.

2017ல், இந்த மண்டலத்தில், 20 அடி ஆழத்தில், நிலத்தடி நீர் கிடைத்தது.
சென்னையின் பழைய மண்டலங்கள் மட்டுமின்றி, ஏரி, குளங்கள் குறைந்த,
விரிவாக்க பகுதிகளிலும், நிலத்தடி நீர்மட்டம் கடுமையான சரிவை சந்தித்துள்ளது.

விரிவாக்க பகுதிகளில், ஆலந்துார், பெருங்குடி, மாதவரம் ஆகிய மண்டலங்களில்,
மூன்று ஆண்டுகளில், நிலத்தடி நீர்மட்டம் இருமடங்கு சரிவை சரிந்துள்ளது,
சென்னை குடிநீர் வாரியம் நடத்திய ஆய்வில் தெரிய வந்து உள்ளது.
-
----------------------
தினமலர்