பீகார் துயரம்: மூளைக்காய்ச்சலுக்கு 69 குழந்தைகள் பலி

-
பாட்னா :
பீகார் மாநிலத்தில் பரவியுள்ள மூளைக்காய்ச்சல் நோய்க்கு
இதுவரை 69 குழந்தைகள் பலியாகியுள்ளனர். தொடர்ந்து
பலிகளின் எண்ணிக்கை உயரக்கூடும் என்ற துயரச் செய்தியால்
அம்மாநில மக்கள் பெரும் சோகத்தில் ஆழ்ந்துள்ளனர்.

117 பேர் அனுமதி :

பீகார், முசாபர்பூர் மாவட்டத்தில் கடந்த ஜனவரியில் குழந்தைகளை
இந்த நோய் தாக்கியது. அதிலிருந்து இதுவரை இந்த நோய்
பாதிக்கப்பட்டு 117 பேர் ஆஸ்பத்திரியில் அனுமதிக்கப்பட்டுள்ளனர்.

அவர்களில் பலருடைய நிலைமை கவலைக்கிடமாக உள்ளது.
முசாபர்பூர், கயா ஆகிய மாவட்டங்களில் நோய் தாக்கம் அதிக
அளவில் உள்ளது.

'அக்யூட் என்சபிலிட்டிஸ் சிண்ட்ரோம்' மற்றும் 'ஜப்பான்
என்சபிலிட்டிஸ்' என 2 வகையான மூளைக்காய்ச்சல் பரவி இருப்பது
கண்டுபிடிக்கப்பட்டுள்ளது.

இதில் முசாபர்பூர் பகுதியில் அக்யூட் என்சபிலிட்டிஸ் சிண்ட்ரோம்
மூளைக்காய்ச்சலும் கயா பகுதியில் ஜப்பான் என்சபிலிட்டிஸ்
மூளைக்காய்ச்சலும் பரவி இருக்கிறது.

பலி எண்ணிக்கை 69 :

இன்று, முஷாபர் பூர் கிருஷ்ணா மருத்துவ கல்லுாரி மருத்துவமனையில்
பலியான குழந்தைகளின் எண்ணிக்கை 58 ஆக உயர்ந்தது. கெஜ்ரிவால்
மருத்துவமனையில் இறந்த குழந்தைகளின் எண்ணிக்கை 11 ஆக
உயர்ந்து இதுவரை மொத்தம் 69 குழந்தைகள் பரிதாபகரமாக
பலியாகியுள்ளனர்.

பீகாரில் பீதி ;

குழந்தைகள் அடுத்தடுத்து உயிரிழப்பு மக்களை பீதிக்குள்ளாக்கி
இருக்கிறது. இதைத் தொடர்ந்து நிலைமையை ஆராய்வதற்காக மத்திய
நிபுணர் குழு அனுப்பி வைக்கப்பட்டுள்ளது. அவர்கள் பல்வேறு
இடங்களுக்கு சென்று ஆய்வு நடத்துவதுடன் சிகிச்சைகளும் மேற்கொண்டு
வருகிறார்கள்.

மத்திய அமைச்சர் விரைவு :

பெண்கள் மற்றும் குழந்தைகள் நலத்துறை மூலம் குழந்தைகளுக்கு
ஊட்டச்சத்து உணவு வழங்கவும் ஏற்பாடு செய்யப்பட்டுள்ளது.
நாளை ஜூன் 15 ல், மத்திய சுகாதாரத்துறை அமைச்சர் ஹர்ஷவர்தன்
பீகாரின், முஷாபர்பூர் சென்று, பாதிக்கப்பட்ட குழந்தைகளை பார்வையிட
உள்ளார்.
-
-------------------------------
தினமலர்