மாணவியர் மற்றும் ஆசிரியைகள் முகத்திரை அணிய தடை விதித்த முஸ்லிம் கல்விக் குழுமம்

திருவனந்தபுரம் :
கேரளாவில் முக்கிய இஸ்லாமிய கல்வி அமைப்பு ஒன்று தனது 150 கல்வி நிறுவனங்களிலும் மாணவிகள் மற்றும் ஆசிரியைகள் பர்கா மற்றும் நிக்காப் என்னும் முகத்திரைக்கு தடை விதித்துள்ளது.

கேரளாவில், கோழிக்கோடு நகரை மையமாக வைத்து செயல்பட்டு வருவது, முஸ்லிம் எஜூகேஷனல் சொசைட்டி (எம்.இ.எஸ்). இந்நிறுவனம் கேரள மாநிலத்தில் 10 கல்லுாரிகள், 18 கலை மற்றும் அறிவியல் கல்லுாரிகள், 12 உயர்நிலைப்பள்ளிகள் மற்றும் 36 சி.பி.எஸ்.இ., பள்ளிகள் உள்ளிட்ட 150 கல்வி நிறுவனங்களை நடத்தி வருகிறது.

பர்கா, நிக்காப் தடை:

இந்த நிறுவனம் வெளியிட்டுள்ள சுற்றறிக்கையில், '' முஸ்லிம் கல்விக் குழுமத்தில் பயிலும் மாணவியர் மற்றும் ஆசிரியைகள் எவ்வித முகத்திரைகளையும் வளாகத்திற்குள் அணியக் கூடாது. இது நடப்பு ஆண்டின் (2019-20) புதிய விதிமுறையாக நடைமுறைப்படுத்தப்பட்டுள்ளது.

இந்த முடிவு, கல்வி நிறுவனங்களில் நடைமுறையில் உள்ள உடைநெறிகளில் மாற்றம் செய்யலாம் என்ற உயர்நீதிமன்றத்தின் வழிகாட்டுதல் படியே எடுக்கப்பட்டுள்ளது. எவ்வித கலாசாரத்தையும், பாதிக்கும் வகையில் இந்த விதிமுறை அறிமுகப்படுத்தப்படவில்லை,''என்று அதில் கூறப்பட்டுள்ளது.

கோர குண்டுவெடிப்பு

இலங்கை தலைநகர் கொழும்புவில்,கடந்த ஈஸ்டர் பண்டிகை அன்று தேவாலயங்கள் மற்றும் நட்சத்திர விடுதிகள் உள்ளிட்ட முக்கிய இடங்களில் ஐ.எஸ்., பயங்கரவாதிகள் பயங்கர வெடிகுண்டு தாக்குதல்களை நடத்தினர். இதில் 253 பேர் கொல்லப்பட்டனர். 500 க்கும் அதிகமானோர் படுகாயமடைந்தனர்.

கடந்த ஏப்ரல் 29 முதல், பெண்கள் நிக்காப் முகத்திரைகள், மாஸ்குகள் மற்றும் பர்கா அணியத் தடை விதிக்கப்பட்டுள்ளது. இது மக்களை எளிதில் அடையாளம் காணவும், மக்களின் பாதுகாப்பு கருதியும் மேற்கொள்ளப்படுவதாக இலங்கை அதிபர் மைத்ரிபால சிறிசேனா அறிவித்துள்ளார்.

காசர்கோடு பகீர்!

இலங்கை குண்டுவெடிப்பை அடுத்து, இந்தியாவில் நடந்த அதிரடி சோதனையில் கேரள மாநிலம் காசர்கோட்டில், கடந்த ஏப்ரல் 30 அன்று, அபுபக்கர் சித்திக், அகமது அராபத் மற்றும் பாலக்காட்டை சேர்ந்த ரியாஸ் அபுபக்கர் போன்றோர் இந்திய தேசிய புலனாய்வு முகமையால் (என்.ஐ.ஏ) கைதுசெய்யப்பட்டனர்.

இவர்கள் கேரளாவில் தற்கொலை படை தாக்குதலை நடத்த இருந்ததாக குற்றம்சாட்டப்பட்டுள்ளது. இந்தப் பின்னணியில் முஸ்லிம் கல்விக் குழுமம்
ஒன்றே பர்கா உள்ளிட்ட முகத்திரை அணியத்தடை விதித்திருப்பது
முக்கியத்துவம் பெறுகிறது.

ஆனால், சமஸ்தா என்னும் இஸ்லாமிய அடிப்படை வாத அமைப்பு ஒன்று,
கேரளக் கல்வி குழுமத்தின் முடிவை கண்டித்துள்ளது. இஸ்லாமிய
நெறிகளுக்கு விரோதமானது என்று கண்டித்துள்ள அந்த அமைப்பு,
இந்த முடிவை திரும்பப்பெறுமாறும் வலியுறுத்தியுள்ளது.

தினமலர்