ஏர்போர்ட் - கிளாம்பாக்கம் இடையே வருகிறது 13 மெட்ரோ நிலையங்கள்?

சென்னை:
சென்னை விமான நிலையத்தில் இருந்து, வண்டலுார், கிளாம்பாக்கம் வரை நீட்டிக்கப்படும், மெட்ரோ ரயில் திட்டத்தில், 13 நிலையங்கள் அமைக்கப்பட உள்ளதாக, பூர்வாங்க சாத்தியக்கூறு அறிக்கையில் தெரிவிக்கப்பட்டுள்ளது

.வண்ணாரப்பேட்டை - விமான நிலையம், சென்ட்ரல் - பரங்கிமலை வரையிலான இரண்டு மெட்ரோ வழித்தடங்கள், செயல்பாட்டுக்கு வந்துள்ளன.

இந்நிலையில், கிளாம்பாக்கத்தில் அமைய உள்ள, புதிய புறநகர் பஸ் நிலையம் வரை, மெட்ரே ரயில் திட்டத்தை நீட்டிக்க, அரசு முடிவு செய்துள்ளது.இதற்கான, பூர்வாங்க சாத்தியக்கூறு அறிக்கை தயாரிக்கும் பணிகள், தனியார் நிறுவனம் வாயிலாக மேற்கொள்ளப்பட்டன.இந்த அறிக்கை தற்போது உயர் அதிகாரிகள் ஆய்வுக்கு அனுப்பப்பட்டுள்ளது.அதில், குறிப்பிடப்பட்டு உள்ள தகவல்கள்:

இந்த வழித்தடத்தில், 2049ம் ஆண்டு வரை, பயணியர் போக்குவரத்து உயர்வு குறித்த, உத்தேச மதிப்பீடு அடிப்படையில், திட்டம் வடிவமைக்கப்பட உள்ளது

விமான நிலையம் - கிளாம்பாக்கம் வரை, 16 கி.மீ., தொலைவுக்கு, மெட்ரோ ரயில் திட்டம் செயல்படுத்தப்பட உள்ளது

இவ்வழித்தடத்தில், தற்போது உள்ள போக்குவரத்து அளவு,
பிற போக்குவரத்து வசதிகள், சாலை அமைப்பு, நிலங்கள் தன்மை,
போக்குவரத்து நெரிசல் ஏற்படும் இடங்கள் ஆகியவற்றின்
அடிப்படையில், மூன்று வழிமுறைகள் உருவாக்கப்பட்டுள்ளன.

விமான நிலையத்தில் இருந்து, ஜி.எஸ்.டி., சாலை வழியாகவே,
கிளாம்பாக்கம் செல்வது,

தாம்பரம் வரை, ஜி.எஸ்.டி., சாலை - முடிச்சூர் - வண்டலுார் செல்வது,
பல்லாவரம் - குரோம்பேட்டை ராதா நகர் - அஸ்தினாபுரம் - சிட்லபாக்கம் - சேலையூர் - தாம்பரம் - முடிச்சூர் - பெருங்களத்துார் - வண்டலுார் மார்க்கம் என,
மூன்று உத்தேச வழித்தடங்கள் ஆராயப்பட்டுள்ளன.

விமான நிலையம் - கிளாம்பாக்கம் இடையே உத்தேசிக்கப்பட்டுள்ள
நிலையங்கள்:

பழைய டிரங்க் சாலை,
பல்லாவரம்,
இ.எஸ்.ஐ., மருத்துவமனை,
குரோம்பேட்டை,
அரசு மருத்துவமனை,
மெப்ஸ்,
தாம்பரம்,
இரும்புலியூர்,
பெருங்களத்துார்,
ஸ்ரீராம் சிறப்பு பொருளாதார மண்டலம்,
வண்டலுார் கேட்,
வண்டலுார் உயிரியல் பூங்கா,
கிளாம்பாக்கம் பஸ் நிலையம்.

இதன் அடிப்படையில், முறையான சாத்தியக்கூறு அறிக்கை
தயாரிப்பதற்கான முடிவுகள் எடுக்கப்படும் என, தெரியவந்தது.
-
தினமலர்