4 பேரவைத் தொகுதிகளுக்கான இடைத் தேர்தல்: 152 வேட்புமனுக்கள் ஏற்பு; 104 மனுக்கள் நிராகரிப்பு

நான்கு சட்டப் பேரவைத் தொகுதிகளுக்கு நடைபெறவுள்ள
இடைத் தேர்தலில் போட்டியிட தாக்கல் செய்யப்பட்ட வேட்பு
மனுக்களில் 152 மனுக்கள் ஏற்கப்பட்டன.
104 மனுக்கள் நிராகரிக்கப்பட்டன.

வேட்புமனுக்களைத் திரும்பப் பெற வரும் 2-ஆம் தேதி கடைசி
நாளாகும். அன்றைய தினம் மாலை 3 மணிக்குப் பிறகு இறுதி
வேட்பாளர் பட்டியல் வெளியிடப்பட உள்ளது.

திருப்பரங்குன்றம், சூலூர், அரவக்குறிச்சி, ஓட்டப்பிடாரம் ஆகிய
சட்டப் பேரவைத் தொகுதிகளுக்கு வரும் 19-இல் இடைத் தேர்தல்
நடைபெறவுள்ளது. இந்தத் தேர்தலில் போட்டியிட கடந்த 22-ஆம்
தேதி வேட்புமனு தாக்கல் தொடங்கியது.

வேட்புமனு தாக்கல் செய்ய கடந்த திங்கள்கிழமை கடைசி நாளாகும்.
மொத்தம் 256 வேட்புமனுக்கள் அளிக்கப்பட்டிருந்தன.

மனுக்கள் பரிசீலனை:

இடைத் தேர்தலில் போட்டியிட அளிக்கப்பட்டிருந்த 256 வேட்பு
மனுக்களின் மீதான பரிசீலனை செவ்வாய்க்கிழமை காலையில்
தொடங்கி நடைபெற்றது.

மொத்த வேட்புமனுக்களில் 104 வேட்புமனுக்கள் நிராகரிக்கப்பட்டன.
152 வேட்புமனுக்கள் ஏற்கப்பட்டன. வேட்புமனுக்களைத் திரும்பப்
பெற வரும் 2-ஆம் தேதி கடைசி நாளாகும்.

புதன்கிழமை (மே 1) அரசு விடுமுறை தினம் என்பதால் அன்றைய
தினம் வேட்புமனுக்களைத் திரும்பப் பெற முடியாது. எனவே,
வரும் 2-ஆம் தேதி ஒரு நாள் மட்டுமே கால அவகாசம் உள்ளது.
அன்றைய தினம் காலை 10 மணி முதல் பிற்பகல்
3 மணிக்குள்ளாக வேட்புமனுக்களைத் திரும்பப் பெறலாம்.

ஆண்கள்-பெண்கள்: வரும் 2-ஆம் தேதி மாலை 3 மணிக்கு மேல்
இறுதி வேட்பாளர் பட்டியல் வெளியிடப்படும். அதிலிருந்து இடைத்
தேர்தலில் எத்தனை பேர் போட்டியிடுவார்கள் என்ற விவரம்
தெரியவரும்.

ஏற்கப்பட்ட வேட்புமனுக்களில், 148 மனுக்கள் ஆண்கள் தாக்கல்
செய்ததாகும். 4 மட்டுமே பெண்கள் அளித்தவையாகும். தேர்தல்
ஆணையத்தால் அங்கீகரிக்கப்பட்ட அரசியல் கட்சிகள் சார்பில்
8 மனுக்களும், பதிவு செய்யப்பட்ட கட்சிகள் சார்பில் 31 மனுக்களும்,
சுயேச்சைகள் சார்பில் 113 மனுக்களும் அளிக்கப்பட்டுள்ளன.

இறுதி வேட்பாளர் பட்டியல் வெளியிடப்படும் வியாழக்கிழமை
(மே 2) சுயேச்சை வேட்பாளர்களுக்கான சின்னங்கள் தேர்தல்
நடத்தும் அதிகாரியால் ஒதுக்கீடு செய்யப்படும்.
-
தினமணி