நம்பகதன்மையை இழக்கிறதா தேர்தல் கமிஷன்?

புதுடில்லி : இந்திய தேர்தல் கமிஷன் மக்களின் நம்பிக்கையை இழந்து வருவதாக முன்னாள் ஐஏஎஸ் அதிகாரிகள் 66 பேர் ஜனாதிபதி ராம்நாத் கோவிந்திற்கு கடிதம் அனுப்பி உள்ளனர்.

தேர்தல் விதி மீறல்களுக்கு எதிராக நடவடிக்கை எடுக்க தேர்தல் கமிஷன் தவறி வருவதாக அந்த கடிதத்தில் புகார் தெரிவிக்கப்பட்டுள்ளதுடன், அதற்கான உதாரணங்களையும் பட்டியலிட்டுள்ளன.

மிஷன் சக்தி குறித்து நாட்டு மக்களுக்கு பிரதமர் மோடி உரையாற்றியது, தேர்தல் சமயத்தில் மோடியின் வாழ்க்கை படம் மற்றும் மோடியின் வாழ்க்கை பற்றிய வெப்சீரிஸ், நமோ டிவி.,யில் பிரதமர் மற்றும் மற்ற பா.ஜ., தலைவர்களின் உரைகள் ஒளிபரப்பப்பட்டது உள்ளிட்டவைகளை தேர்தல் விதிமீறல்களுக்காக தேர்தல் கமிஷன் நடவடிக்கை எடுக்காமல் சமரசம் செய்து கொண்டதற்கான உதாரணங்களாக பட்டியலிடப்பட்டுள்ளன.

முன்னாள் வெளியுறவு செயலாளர் சிவசங்கர் மேனன்,
டில்லி முன்னாள் துணைநிலை கவர்னர் நஜீப் ஜங்
உள்ளிட்ட 66 அதிகாரிகள் கையெழுத்திட்டு ஜனாதிபதிக்கு
எழுதி உள்ள கடிதத்தில் கூறப்பட்டிருப்பதாவது :

இந்திய தேர்தல் கமிஷனின் சுதந்திரம், வெளிப்படைதன்மை, நடுநிலைதன்மை, திறமை ஆகியன இன்று சமரசம் செய்து கொள்ளப்பட்டுள்ளது.

இந்திய ஜனநாயகத்தின் வலுவான அடித்தளமாக திகழும் தேர்தல் நடைமுறையின் நேர்மை தன்மை ஆபத்தான நிலையில் உள்ளது.

மத்தியில் ஆளும் கட்சி தேர்தல் விதிகளை தவறாகவும், அப்பட்டமாகவும் அலட்சியம் செய்து வருவதால் நாங்கள் வருத்தம் அடைந்துள்ளோம்.

பலமான விதிமீறலுக்கு எதிராக நடவடிக்கை எடுக்காமல் கோழைத்தனமாக தேர்தல் கமிஷன் தயங்கி வருகிறது என குறிப்பிடப்பட்டுள்ளது.
-
தினமலர்