ஜிஎஸ்டி முழுமையாக மாற்றி அமைக்கப்படும்: ப.சிதம்பரம்

மக்களவைத் தேர்தலில் வென்று காங்கிரஸ் கட்சி ஆட்சிக்கு
வந்தவுடன் ஜிஎஸ்டி வரிவிதிப்பு முறை முழுமையாக மாற்றி
அமைக்கப்படும் என காங்கிரஸ் கட்சியின் முன்னாள் மத்திய
அமைச்சர் ப. சிதம்பரம் தெரிவித்தார்.

மதுரையில் சனிக்கிழமை, காங்கிரஸ் கட்சி தேர்தல் அறிக்கையின்
தமிழாக்கத்தை வெளியிட்டு செய்தியாளர்களிடம் அவர் கூறியதாவது:

காங்கிரஸ் கட்சித் தலைமை வெளியிட்ட தேர்தல் அறிக்கையின்
மையக் கருத்துகளை மட்டும் தமிழாக்கம் செய்து இங்கே
வெளியிடுகிறோம். இதில் முக்கியமாக 2023-ஆம் ஆண்டிக்குள்
நாட்டில் வறுமை ஒழிக்கப்படும்,

மாநிலங்களின் அதிகாரங்கள் வலுவாக்கப்படும், விவசாயமும்,
விவசாயிகளின் வாழ்க்கை தரமும் மேம்படுத்தப்படும், வேலைவாய்ப்பு
அதிகப்படுத்தப்படும் என்பன உள்ளிட்ட வாக்குறுதிகள் பிரதானமாக
இடம் பெற்றுள்ளன.
-
இந்த அறிக்கையில் உள்ள அனைத்து அறிவிப்புகளையும்
5 ஆண்டுகளில் நிறைவேற்றுவோம் என்ற நம்பிக்கை உள்ளது.

தற்போதைய காங்கிரஸ் கட்சித் தலைவர் ராகுல் காந்தி விஞ்ஞான
அறிவு உள்ளிட்ட புதுமையான சிந்தனைகளை கொண்டவர்.

ஜிஎஸ்டி வரி முறை: காங்கிரஸ் ஆட்சி வந்தவுடன் ஜிஎஸ்டி வரிவிதிப்பு
முறை முழுமையாக மாற்றி அமைக்கப்படும். பெட்ரோல், டீசல் வரி
ஜிஎஸ்டியில் சேர்க்கப்படும். மக்களின் அத்தியாவசிய தேவையான
சமையல் எரிவாயு உருளையின் விலை கட்டுப்படுத்தப்படும்.

இந்த தேர்தல் அறிக்கையில் நதிநீர் இணைப்பு குறித்து
குறிப்பிடப்படவில்லை. அதற்கான நிபுணர்களை கொண்டு தனியாக
ஒரு அறிக்கை தயாரிக்க திட்டமிட்டுள்ளோம். மேலும் நாட்டில் உள்ள
அனைத்து நீர்நிலைகளை மேம்படுத்தி, அவை மக்களுக்கு முழுமையாக
பயனளிக்கக் கூடிய வகையில் கொண்டுவரப்படும்.
-
கிடப்பில் உள்ள சேது சமுத்திரத் திட்டம் செயல்படுத்தப்படும்.
அதுகுறித்து உச்சநீதிமன்றம் அளிக்கும் தீர்ப்பைப் பொருத்து
செயல்பட உள்ளோம். ஏழு பேர் விடுதலையை காங்கிரஸ் கட்சி
எதிர்க்கவில்லை.

அவர்களின் விடுதலையை நீதிமன்றம்தான் முடிவு செய்ய வேண்டும்.
தமிழக மீனவர் அமைப்பு, இலங்கை மீனவர் அமைப்புகளை அழைத்து
பேச்சுவார்த்தை நடத்தினால்தான் மீனவர் பிரச்னைக்கு தீர்வு கிடைக்கும்.
-
காங்கிரஸ் ஆட்சியில் தொழில் வளர்ச்சி இல்லை எனக் கூறும்
அதிமுகவினர், கடந்த 8 ஆண்டுகளில் நாட்டில் எத்தகைய தொழில்
வளர்ச்சியை கொடுத்துள்ளார்கள் என்பதை அவர்கள் கூற வேண்டும்
என்றார்.
-
இதில் காங்கிரஸ் கட்சி அகில இந்திய செயலர் சஞ்சய் தத், தமிழக
காங்கிரஸ் கட்சி தலைவர் கே.எஸ். அழகிரி, மதுரை மாநகர் மாவட்டத்
தலைவர் வி.கார்த்திகேயன், மாநில பொதுச் செயலர் கே.சிரஞ்சீவி,
மதுரையின் மார்க்சிஸ்ட் கம்யூனிஸ்ட் கட்சி வேட்பாளர் சு. வெங்கடேசன்
உள்ளிடோர் உடனிருந்தனர்.
-
----------------------------------------தினமணி

ஜிஎஸ்டி குறைத்தல் பலருக்கும் நன்மை பயக்கும்.