போலி போலீஸ் குறித்து வயதானவர்களுக்கு விழிப்புணர்வு! சொந்த செலவில் குறும்படம் தயாரிக்கும் எஸ்.ஐ

மதுரை :

மதுரை நகரில் போலீஸ் போல் நடித்து வயதானவர்களை ஏமாற்றும் போலி போலீசாரிடம் எச்சரிக்கையாக இருப்பது எப்படி என்பது குறித்து எஸ்.ஐ., ஷர்மிளா என்பவர் தனது சொந்த செலவில் குறும்படம் தயாரித்து வருகிறார்.

60 வயதை கடந்தவர்களை குறிவைத்து 'நாங்கள் போலீஸ். அந்த பக்கம் போகாதீங்க. கலவரம் நடந்துகிட்டு இருக்கு. நகையை பத்திரமாக கழற்றி வைத்துக்கொண்டு போங்க' என உதவுவது போல், பேப்பரில் நகையை மடித்துக்கொடுப்பார்கள். 'நல்ல மனுஷங்க... கடவுள் இவுங்க ரூபத்துல வந்து, கஷ்டப்பட்டு நாம வாங்கிய நகையை காப்பாத்தி கொடுத்திருக்காரு' என பெருமூச்சுவிட்டப்படி வீட்டிற்கு வந்து பேப்பரை பிரித்து பார்த்தால் நகைக்கு பதில் சின்ன சின்ன கற்கள் இருக்கும்.

அதிர்ச்சியில் அலறியடித்து போலீஸ் ஸ்டேஷனிற்கு ஓடி வருவர். ஆண்டுதோறும் இதுபோன்ற காட்சிகள் தவறாமல் நடந்து கொண்டிருக்கின்றன.

கடந்த பிப்.,4ல் கூட மதுரை வள்ளலானந்தாபுரம் ஜெயபால் மனைவி கிருஷ்ணவேணி 67, அவனியாபுரம் பைபாஸ் ரோட்டில் நடந்து வந்தபோது 2 பேர் தங்களை 'போலீஸ்' எனக்கூறி அறிமுகமாகி, ஏழே முக்கால் பவுன் நகைகளை பேப்பரில் மடித்துக்கொடுப்பது திருடிச்சென்றனர். ஆனால் இதுவரை யாரையும் போலீசார் கைது செய்யாததுதான் ஆச்சரியம்.

போலீசாருக்கே சவால்விடும் வகையில் நகரில் வலம் வரும் போலி போலீசாரை பிடிக்க ஒருபுறம் நடவடிக்கை எடுத்தாலும், மறுபுறம் மக்களுக்கு விழிப்புணர்வு ஏற்படுத்தும் பணியில் போலீசார் ஈடுபட்டுள்ளனர்.

சமீபத்தில்கூட எம்.ஜி.ஆர்., பஸ் ஸ்டாண்டில் குற்றப்பிரிவு துணைகமிஷனர் செந்தில்குமார் இதுகுறித்து விழிப்புணர்வு ஏற்படுத்தினார். இந்நிலையில், கமிஷனர் அலுவலக எஸ்.ஐ., ஷர்மிளா என்பவர், கமிஷனர் டேவிட்சன் தேவாசீர்வாதத்தின் அனுமதி பெற்று தனது சொந்த செலவில் போலி போலீஸ் குறித்து விழிப்புணர்வு குறும்படம் எடுத்துள்ளார்.

4 முதல் 5 நிமிடங்கள் ஓடும் இப்படத்தில் முதியவர்கள் எப்படி விழிப்போடு இருக்க வேண்டும், போலி போலீசாரிடம் இருந்து எப்படி
தங்களை தற்காத்துக்கொள்ள வேண்டும் போன்ற கருத்துகள் இடம்பெற்றுள்ளன. விரைவில் பொதுமக்கள் கூடும் இடங்களில் இப்படம் திரையிடப்பட உள்ளது.
-
தினமலர்