திருச்சியில் ரூ.14 லட்சம் மதிப்புள்ள கள்ளநோட்டுகள் பறிமுதல்: 3 இளைஞர்கள் கைது

திருச்சி கே.கே.நகரில் கள்ளநோட்டு தயாரித்த 3 இளைஞர்களை கைது செய்த போலீஸார், அவர்களிடமிருந்து ரூ.14 லட்சம் மதிப்பிலான கள்ள நோட்டுகள், பிரின்டர் உள்ளிட்ட இயந்திரங்களை பறிமுதல் செய்தனர்.

திருச்சி கே.கே.நகர் பகுதியில் உள்ள ஒரு வீட்டில் கள்ளநோட்டுகள் தயாரிக்கப்படுவதாக, திட்டமிட்ட குற்றத் தடுப்பு பிரிவு (ஓசிஐயூ) போலீஸாருக்கு தகவல் கிடைத்தது. அதன்பேரில் இன்ஸ்பெக்டர் ராதாகிருஷ்ணன் தலைமையிலான போலீஸார் நேற்று அதிகாலை, கே.கே.நகர் முருகவேல் நகரில் ஒரு வீட்டுக்குள் அதிரடியாக நுழைந்து சோதனையிட்டனர்.

அப்போது, அந்த வீட்டுக்குள் ஸ்கேனிங் இயந்திரம், கலர் பிரின்டர் ஆகியவற்றின் உதவியுடன் ரூ.2 ஆயிரம், ரூ.500 ஆகிய கள்ள நோட்டுகளை 3 பேர் தயாரித்துக் கொண்டிருந்தது தெரியவந்தது.

அவர்களைப் பிடித்த ஓசிஐயூ போலீஸார் நடத்திய விசாரணையில், அவர்கள் புதுக்கோட்டை மாவட்டம் பொன்னமராவதி காமராஜ் நகரைச் சேர்ந்த சுபன் மகன் பாட்ஷா(36), தஞ்சாவூர் மாவட்டம் பட்டுக்கோட்டையைச் சேர்ந்த சூரியக்குமார் மகன் ராஜாசபரீஷ்(26), திருச்சி காஜாமலையைச் சேர்ந்த வெங்கடாச்சலம் மகன் கனகராஜ்(34) என்பது தெரியவந்தது.

கைது செய்யப்பட்ட அவர்களிடம் இருந்து ரூ.14 லட்சத்து 13 ஆயிரம் மதிப்பிலான கள்ள நோட்டுகள், ஸ்கேனர் இயந்திரம், கலர் பிரின்டர், கட்டர் இயந்திரம் உள்ளிட்டவை கைப்பற்றப்பட்டன. 3 பேரிடமும் நடத்திய விசாரணையின் அடிப்படையில் சதீஷ் என்பவரைத் தேடி வருகின்றனர்.

மாலைமலர்