அரியணை அனுமன் தாங்க என்று கம்பர் அனுமனை சிறப்பித்தது ஏன்?

-
கம்ப இராமாயணம் - அயோத்தியில் இராமன் முடி சூடுதல்
எல்லோரும் அறிந்த பாடல்தான்.
-
அரியணை அனுமன் தாங்க,
அங்கதன் உடைவாள் ஏந்த,
பரதன் வெண்குடை கவிக்க,
இருவரும் கவரி வீச
விரைசெறி குழலி ஓங்க
வெண்ணெயூர்ச் சடையன் தங்கள்
மரபுளோர் கொடுக்க வாங்கி
வசிட்டனே புனைந்தான் மௌலி.
-
பொருள்
-
அரியணை அனுமன் தாங்க, = அரியணையை அனுமன்
தாங்கிக் கொள்ள
அங்கதன் உடைவாள் ஏந்த, = அங்கதன் உடை வாளை
ஏந்த
பரதன் வெண்குடை கவிக்க, = பரதன் வெண் கொற்றக்
குடை பிடிக்க
இருவரும் கவரி வீச = இலக்குவனும், சத்ருக்னனும்
கவரி வீச
விரைசெறி குழலி ஓங்க = மலர் சூடிய குழலைக் கொண்ட
அவள் பெருமிதம் கொள்ள
வெண்ணெயூர்ச் சடையன் தங்கள் = திரு வெண்ணையூர்
சடையனின்
மரபுளோர் கொடுக்க வாங்கி = முன்னோர் கொடுக்க ,
அதை வாங்கி
வசிட்டனே புனைந்தான் மௌலி. = வசிட்டன் முடி
சூட்டினான்
-
மேலோட்டமான பொருள் இதுதான்.
-
சற்று ஆழமாகச் சிந்திப்போம்
-
1. வசிட்டனே புனைந்தான் மௌலி - அது என்ன வசிட்டனே
என்று ஒரு ஏகாரம்? வசிட்டன் புனைந்தான் மௌலி என்று
சொல்லி இருக்கலாம் அல்லவா?

முதலில் பதினான்கு ஆண்டுகளுக்கு முன்பும் வசிட்டன்
தான் முடி சூட்டுவதாய் இருந்தது. அன்று நடக்கவில்லை.
இன்றும் அவனே புனைந்தான் என்று ஒரு அழுத்தம்.
-
2. அஃதெல்லாம் சரி, யார் முடி புனைந்தார்கள்?
கம்பர் அதைச் சொல்லவில்லை. இராமனுக்கு முடி
சூட்டினான் என்று சொல்லி இருக்கலாம். சொல்லவில்லை.
முடி சூட்டிக் கொண்டது அறம் , வாய்மை, நேர்மை, ஒழுக்கம்...
தனி மனிதனுக்குச் சூட்டப்பட்ட முடி அல்ல அது என்பதால்
முடி யாருக்குச் சூட்டினான் என்பதை விட்டு விடுகிறான்
கம்பன்.
-
3. எடுத்த எடுப்பில் அரியணை அனுமன் தாங்க என்று
அனுமனை சிறப்பிக்கிறான்? முதலில் பரதனை சொல்லி
இருக்கலாம், அல்லது பதினான்கு ஆண்டுகள் கூடவே வந்து
கைங்கர்யம் செய்த இலக்குவனைச் சொல்லி இருக்கலாம்,
-
இல்லை சீதையையாவது சொல்லி இருக்கலாம். அனுமனை
முன்னிறுத்தக் காரணம் என்ன?
-
அனுமன், இராமனைக் காத்தான், தற்கொலை செய்ய
இருந்த சீதையின் உயிரைக் காத்தான், நந்தி கிராமத்தில்
உயிர் விட இருந்த பரதனின் உயிரைக் காத்தான்,
போரில் அடிபட்டு உயிர் போகும் தருவாயில் இருந்த
இலக்குவனின் உயிரைக் காத்தான்.
-
இப்படி எல்லோர் உயிரையும் காத்த அனுமனுக்கு முதல்
இடம் தருகிறான் கம்பன்.
-
4. அரசனுக்கு மூன்று அடையாளங்கள் - செங்கோல்,
வெண்கொற்றக்குடை, உடைவாள் உடைவாள் என்பது
அரசின் சின்னம். குறியீடாக அங்கதனுக்கு அரசைக்
கொடுத்தேன் என்று சொல்லாமல் சொன்ன வாக்கு அது.
"அங்கதன் உடை வாள் ஏந்த "
-
5. அனுமனும், அங்கதனும் இராமனுக்கு காட்டில் கிடைத்த
உறவுகள். கானகம் போனதிலும் நன்மை இரண்டு
நல்லவர்களின் அறிமுகம் கிடைத்தது.
-
கம்பன் எந்தச் சொல்லையும் சும்மா சொல்லவில்லை
-
----------------------------
அரு. லெட்சுமணன் கோவை / சென்னை
நன்றி- மனித தேனீ