பிரதமர் மோடிக்கு பிலிப் கோட்லர் விருது!

-

பிரதமர் மோடியின் சிறந்த தலைமைப்பண்பைப்
பாராட்டும் வகையில், அவருக்கு பிலிப் கோட்லர்-
பிரசிடென்ஷியல் விருது வழங்கப்பட்டுள்ளது.

இந்த விருதைப் பெறும் முதல் அரசியல் தலைவர்
பிரதமர் நரேந்திர மோடி ஆவார்.

சந்தைப்படுத்தல் (மார்க்கெட்டிங்) மற்றும்
மேலாண்மைத் துறைகளில் சிறந்து விளங்குபவர்களைப்
பாராட்டும் நோக்கில், ஆண்டுதோறும் பிலிப் கோட்லர்
விருது அளிக்கப்பட்டு வருகிறது.

இந்த ஆண்டு முதல், நிர்வாகத்தில் சிறந்து விளங்கும்
உலக நாடுகளின் தலைவர்களுக்கும் இந்த விருது
அளிக்கப்படுகிறது.

அந்த வகையில், இந்த விருதினைப் பெறும் முதல்
அரசியல் தலைவர் என்ற பெருமை பிரதமர்
நரேந்திர மோடிக்குக் கிடைத்துள்ளது. இது குறித்து,
பிரதமர் அலுவலகம் வெளியிட்ட செய்திக் குறிப்பில்
தெரிவிக்கப்பட்டுள்ளதாவது:

மக்கள்-ஆதாயம்-பூமி என்ற கருத்துருக்களை
அடிப்படையாகக் கொண்டு இந்த விருது வழங்கப்
படுகிறது. அதன்படி, நாட்டு மக்களுக்குப் பல்வேறு
நலத்திட்டங்களை வழங்கியதற்காகவும், நாட்டில்
பொருளாதார, சமூக, தொழில்நுட்ப மேம்பாட்டை
ஏற்படுத்தியதற்காகவும், சிறந்த தலைமைப்
பண்புக்காகவும் பிரதமர் மோடிக்கு இந்த விருது
வழங்கப்பட்டுள்ளது.

பிரதமர் மோடி தலைமையின் கீழ், ஆதார் அட்டை
உள்ளிட்ட பல்வேறு திட்டங்களால் டிஜிட்டல்
நிர்வாகத் துறையில் புரட்சி ஏற்பட்டுள்ளது.

மேலும், தகவல் மற்றும் தொழில்நுட்பத் துறை
சேவைகளை வழங்குவதில் உலக நாடுகளுக்கு
முன்னோடியாக இந்தியா விளங்கி வருகிறது.

இந்தியாவில் தயாரிப்போம் திட்டம்,
டிஜிட்டல் இந்தியா திட்டம், தூய்மை இந்தியா திட்டம்
போன்றவற்றால் நாட்டில் முதலீடுகள்
அதிகரித்துள்ளது என்று விருது வழங்கும் அமைப்பு
தெரிவித்துள்ளதாகக் குறிப்பில் இடம்பெற்றுள்ளது.

நவீன கால சந்தைப்படுத்துதலின் தந்தையென
அறியப்படும் பிலிப் கோட்லர் பெயரில் இந்த விருது
வழங்கப்படுவது குறிப்பிடத்தக்கது.
-
---------------------------------
தினமணி

உள்நாட்டில் எதிர்ப்புகள் பல இருப்பினும் 
வெளிநாட்டில் மதிக்கப்படும் தலைவர்.


ரமணியன்