அதிமுக எம்பிக்கள் 24 பேர் இடைநீக்கம்: அமளியால் மக்களவைத் தலைவர் நடவடிக்கை

**ayyasamy ram** · **ayyasamy ram** Thu Jan 03, 2019 8:24 am

-
மக்களவையில் அமளியில் ஈடுபட்ட அதிமுக எம்பிக்கள்
--------------------------------------------

மேக்கேதாட்டு அணை விவகாரத்தை எழுப்பி மக்களவையில்
புதன்கிழமை அமளியில் ஈடுபட்ட அதிமுக உறுப்பினர்கள்
24 பேரை ஐந்து நாள்களுக்கு அவை நடவடிக்கையில்
பங்கேற்பதில் இருந்து இடைநீக்கம் (சஸ்பெண்ட்) செய்து
அவைத் தலைவர் சுமித்ரா மகாஜன் உத்தரவிட்டார்.
-
மக்களவை அதன் தலைவர் சுமித்ரா மகாஜன் தலைமையில் புதன்கிழமை கூடியதும் மேக்கேதாட்டு விவகாரம் தொடர்பாக அதிமுக உறுப்பினர்களும், ஆந்திர மாநிலத்துக்கு சிறப்பு நிதியை ஒதுக்கக் கோரி தெலுங்கு தேசம் உறுப்பினர்களும் அவையின் மையப் பகுதியில் அமளியில் ஈடுபட்டனர்.
-
அவர்களை இருக்கைக்கு செல்லுமாறு சுமித்ரா மகாஜன் கேட்டுக் கொண்டும் அமளி நீடித்தது. அப்போது, சுமித்ரா மகாஜன், இதுபோன்ற செயல்பாட்டால் பிரச்னைக்கு தீர்வு கிடைக்காது. சம்பந்தப்பட்ட அமைச்சருடன் பேசுங்கள். இதுபோன்ற செயல்பாடுகள் நிறுத்தப்பட வேண்டும் எனக் கேட்டுக் கொண்டார்.
-

எனினும், உறுப்பினர்கள் தொடர்ந்து அமளியில் ஈடுபட்டதால் 40 நிமிடங்களுக்கு ஒத்திவைக்கப்பட்டது. அவை மீண்டும் 12 மணிக்கு கூடிய போதும் உறுப்பினர்கள்அமளியில் ஈடுபட்டனர். அப்போது சில உறுப்பினர்கள் காகிதத் துண்டுகளை மக்களவைச் செயலக அதிகாரிகள் அமர்ந்திருந்த பகுதியில் உள்ள மேஜை மீது பறக்க விட்டனர்.
-
அமளிக்கு மத்தியில், மத்திய சட்டத் துறை அமைச்சர் ரவி சங்கர் பிரசாத் ஆதார் மற்றும் இதர சட்டங்கள் திருத்த மசோதாவை அவையில் அறிமுகம் செய்தார். பின்னர் மதியம் 2 மணி வரை அவை ஒத்திவைக்கப்பட்டது. அவை மீண்டும் கூடிய போது, அதிமுக உறுப்பினர்கள்அவையின் மையப் பகுதியில் கூடி நின்று மேக்கேதாட்டு விவகாரத்தை எழுப்பி அமளியில் ஈடுபட்டனர்.
-
அப்போது, ரஃபேல் விவகாரம் குறித்து விவாதிக்க மக்களவைத் தலைவர் சுமித்ரா மகாஜன் அனுமதித்தார். இதில் காங்கிரஸ் தலைவர் ராகுல் காந்தி, நிதியமைச்சர் அருண் ஜேட்லி மற்றும் திரிணமூல் காங்கிரஸ் உள்பட பல்வேறு கட்சி உறுப்பினர்கள் பேசினர்.
-
தொடர்ந்து நீடித்த அமளியால் அவை மாலை 3.30 மணிக்கும், அதைத் தொடர்ந்து 5 மணிக்கும் ஒத்திவைக்கப்பட்டு பின்னர் நாள் முழுவதும் ஒத்திவைக்கப்பட்டது.
அதிமுக எம்பிக்கள் இடைநீக்கம்: முன்னதாக, அவையின் மையப் பகுதிக்கு வந்து அமளியில் ஈடுபட்டது அல்லது அவையின் விதிகளை மதிக்காமல் குந்தகம் ஏற்படும் வகையில் செயல்பட்டது ஆகிய நடவடிக்கைக்காக மக்களவை விதி எண் 374 (ஏ)-இன் கீழ் அதிமுக உறுப்பினர்கள் அசோக் குமார், பாரதி மோகன், சந்திரகாசி, ஜெயவர்தன், பரசுராமன், காமராஜ், குமார், வசந்தி, மகேந்திரன், மரகதம், நாகராஜன், வெங்கேடஷ் பாபு, அன்வர் ராஜா, சுந்தரம், ஹரி, ஏழுமலை, ராதாகிருஷ்ணன், செல்வக்குமார சின்னையன், ராஜேந்திரன், சத்யபாமா, பார்த்திபன், உதயக்குமார், பிரபாகரன், வனரோஜா ஆகியோரை அவை நடவடிக்கையில் தொடர்ந்து ஐந்து நாள்கள் பங்கேற்பதில் இருந்து இடைநீக்கம் செய்வதாக மக்களவைத் தலைவர் சுமித்ரா மகாஜன் அறிவித்தார்.
----
கட்கரியுடன் சந்திப்பு:

இதற்கிடையே, மேக்கேதாட்டு விவகாரம் தொடர்பாக அதிமுக, திமுக எம்பிக்கள் மத்திய அமைச்சர் நிதின் கட்கரியை சந்தித்து, மேக்கேதாட்டு பகுதியில் அணை கட்டுவதற்காக விரிவான திட்ட அறிக்கையை தயாரிப்பதற்கு கர்நாடகத்துக்கு அளிக்கப்பட்ட அனுமதியை திரும்பப் பெற வேண்டும் என்று வலியுறுத்தினர்.
---
மாநிலங்களவை:
9 அதிமுக, 4 திமுக எம்பிக்கள் ஒருநாள் விலகி இருக்க உத்தரவு

மேக்கேதாட்டு விவகாரத்தை எழுப்பி மாநிலங்களவையில் புதன்கிழமை அமளியில் ஈடுபட்ட 9 அதிமுக உறுப்பினர்களையும், 4 திமுக உறுப்பினர்களையும் அவை நடவடிக்கையில் இருந்து ஒருநாள் விலகி இருக்க மாநிலங்களவைத் தலைவர் வெங்கய்ய நாயுடு உத்தரவிட்டார்.

மாநிலங்களவை புதன்கிழமை காலை கூடியதும் அதன் தலைவர் வெங்கய்ய நாயுடு,பல்வேறு முக்கியமான மசோதாக்கள் தாக்கல் செய்யப்பட வேண்டியுள்ளது. அவை சுமுகமாக நடைபெற உறுப்பினர்கள் ஒத்துழைப்பு அளிக்க கேட்டுக் கொள்கிறேன் என்றார்.

அப்போது, மேக்கேதாட்டு அணை விவகாரத்தை எழுப்பி அதிமுக, திமுக உறுப்பினர்கள் அவையின் மையப் பகுதியில் அமளியில் ஈடுபட்டனர். இதனால் அவை இரு முறை அடுத்தடுத்து ஒத்திவைக்கப்பட்டது. பின்னர், கேள்விநேரத்தின் போது மாநிலங்களவைத் துணைத் தலைவர் ஹரிவன்ஷ், மாநிலங்களவைத் தலைவர் உங்கள் விவகாரம் மீது மிகுந்த அக்கறை கொண்டுள்ளார்.

சம்பந்தப்பட்ட அமைச்சரையும் உங்களுடன் பேசுவதற்கு அழைத்துள்ளார் என்றார்.
நாடாளுமன்ற விவகாரங்கள் துறை இணையமைச்சர் விஜய் கோயல், அதிமுக உறுப்பினர்களுடன் அமைச்சர் நிதின் கட்கரியை பேசுமாறு கேட்டுக் கொண்டுள்ளோம். அவரும் அவையில் இதுகுறித்து பேசுவார். இதனால், அவையை நடத்துவதற்கு அனுமதியுங்கள் என்று கேட்டுக் கொண்டார்.

எனினும், அவையின் மையப் பகுதியில் அதிமுக, திமுக உறுப்பினர்கள் அமளியில் ஈடுபட்டதால், அவை 2 மணி வரை ஒத்திவைக்கப்பட்டது. அவை மீண்டும் தொடங்கிய போது, அதிமுக, திமுக உறுப்பினர்கள் மீண்டும் ஒருசேர குரல் எழுப்பி அமளியில் ஈடுபட்டனர். இதைத் தொடர்ந்து, அமைச்சர் விஜய் கோயல், அவைத் தலைவர் வெங்கய்ய நாயுடு ஆகியோர் அமைச்சர் நிதின் கட்கரியை அவையில் பேசுவதற்கு ஒத்துழைப்புத் தருமாறு அமளியில் ஈடுபட்ட தமிழக உறுப்பினர்களிடம் கேட்டுக் கொண்டனர்.

ஆனால், அமளி நீடித்ததால், அவை விதி எண் 255-இன் கீழ் அவையில் இருந்து அதிமுகவைச் சேர்ந்த நவநீதகிருஷ்ணன், எஸ்.ஆர். பாலசுப்ரமணியன், மைத்ரேயன், லட்சுமணன், முத்துக்கருப்பன், விஜிலா சத்யானந்த், விஜயகுமார், செல்வராஜ், கோகுலகிருஷ்ணன், திமுகவைச் சேர்ந்த ஆர்.எஸ். பாரதி, திருச்சி சிவா, கனிமொழி, டி.கே. எஸ். இளங்கோவன் ஆகியோரை அன்றைய கூட்டத்தில் இருந்து ஒரு நாள் விலகி இருக்குமாறு உத்தரவிட்டார்.

பின்னர், 15 நிமிடங்களுக்கு அவை நடவடிக்கைகள் ஒத்திவைக்கப்பட்டது. ஆனாலும்அதிமுக, திமுக உறுப்பினர்கள் அவையில் இருந்தனர்.
அவை மீண்டும் கூடிய போது மீண்டும் அமளியால் அரை மணிநேரம் ஒத்திவைக்கப்பட்டது. மீண்டும் 3 மணிக்கு அவை கூடிய போது, அவையில் இருந்த அதிமுக, திமுக உறுப்பினர்கள் கோரிக்கையை வலியுறுத்தியதால் மாநிலங்களவை நாள் முழுவதும் ஒத்திவைக்கப்பட்டது.
--
தினமணி

அதிமுக எம்பிக்கள் 24 பேர் இடைநீக்கம்: அமளியால் மக்களவைத் தலைவர் நடவடிக்கை

அதிமுக எம்பிக்கள் 24 பேர் இடைநீக்கம்: அமளியால் மக்களவைத் தலைவர் நடவடிக்கை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக